يراندا ءماجىلىس پارلامەنتىنىڭ دەپۋتاتتارى اقش-تىڭ تۋىن ورتەدى. تۋ قاعازدان جاسالعان. يراندىقتاردىڭ بۇل ارەكەتىنە اقش پرەزيدەنتى دونالد ترامپتىڭ «امەريكا يادرولىق كەلىسىمنەن شىعادى» دەگەن مالىمدەمەسى سەبەپ بولعان.

بۇعان قوسا دەپۋتاتتار «امەريكا جويىلسىن!» دەگەن ۇندەۋلەرىن ايتتى.

Reuters اگەنتتىگىنىڭ دەرەگىنە سۇيەنسەك، ءماجىلىس وكىلى ءالي لاريجاني امەريكالىق باسشىنىڭ شەشىمىن «ديپلوماتيالىق شوۋ» دەپ اتادى. ۆاشينگتوننىڭ يادرولىق كەلىسىمنەن شىققانىن وزىنە دە، بۇكىل الەمگە دە ءقاۋىپ توندىرەدى دەپ ەسەپتەيدى ءالي لاريجاني.

بۇعان دەيىن يران دونالد ترامپتىڭ اقش-تىڭ تەگەرانمەن يران يادرولىق باعدارلاماسىن دامىتۋ كەلىسىمىنەن شىققانىن «تاريحي قاتەلىك» دەپ اتاعان.

يران پرەزيدەنتى حاسان ءروۋحانيدىڭ مالىمدەۋىنشە، اقش كەلىسىمنىڭ جالعىز مۇشەسى ەمەس، سول سەبەپتى يران تەگەرانمەن بىرگە كەلىسىمگە وتىرعان قالعان التى دەرجاۆانىڭ ۇستانىمىن كۇتكەن ءجون دەپ شەشكەن.

ايتا كەتەيىك، 8 مامىردا دونالد ترامپ اقش-تىڭ يراننىڭ يادرولىق باعدارلاماسى جونىندەگى بىرلەسكەن جوسپارىنان شىعاتىنىن حابارلاعان.

«كەلىسىم يرانعا ءوزىنىڭ يادرولىق باعدارلاماسىن كەڭەيتۋگە عانا جول اشتى. ول كەلىسىمدە ماڭىز جوق. يراننىڭ ۋادەسى وتىرىك ەكەنىن ءبىز دالەلدەي الامىز. بۇل بەيبىتشىلىك اكەلمەگەن ءبىرجاققتى كەلىسىم بولدى. ول ەشقاشان بەيبىتشىلىك اكەلمەيدى. مەن بۇل كەلىسىمنىڭ قالۋىنا جول بەرسەم، وندا ول بۇكىل تاياۋ شىعىستا يادرولىق قارۋلانۋ جارىسىنا الىپ كەلەدى. مەن اقش-تىڭ يادرولىق كەلىسىمنەن شىققانىن جاريالايمىن»، - دەگەن ەدى ترامپ.