ۇلى وتان سوعىسى جىلدارىندا قازاقستاندىق جاۋىنگەرلەر ەرەن ەرلىكتىڭ جارقىن ۇلگىسىن كورسەتتى. سونىڭ ناتيجەسىندە 500-گە جۋىق وتانداسىمىز كەڭەس وداعىنىڭ باتىرى اتاندى. الايدا، بۇل ءتىزىمنىڭ بۇدان دا كوپ بولۋى ابدەن مۇمكىن ەدى. سەبەبى، تاعى دا 100-گە جۋىق وتانداسىمىز وسىنداي ەڭ جوعارى ناگراداعا ۇسىنىلىپ، ءتۇرلى سەبەپتەرگە بايلانىستى ول ماراپاتتارىنا قول جەتكىزە المادى. ءتىپتى ولاردىڭ ناگراداعا ۇسىنىلعانىن دالەلدەيتىن ماراپات پاراقتارى دا تابىلىپ، ناقتى دەرەكتەرمەن دالەلدەنگەن. وسىعان وراي «نۇر وتان» پارتياسى وسىنداي ارداگەر اتالارىمىزعا تاعزىم رەتىندە ولاردىڭ ۇرپاقتارىمەن كەزدەسىپ، قولداۋ كورسەتۋ ماقساتىندا «ەرلىك ەشقاشان ۇمىتىلمايدى» اتتى ارنايى اكسيانى قولعا الدى.
بۇگىن وسى اكسيا اياسىندا پارتيا ءتوراعاسىنىڭ ءبىرىنشى ورىنباسارى ماۋلەن اشىمبايەۆ استانا قالاسىندا كەڭەس وداعىنىڭ باتىرى اتاعىنا ۇسىنىلىپ، التىن جۇلدىزىن الا الماي كەتكەن امانشا مەڭدىعالييەۆ اتامىزدىڭ شاڭىراعىنا ارنايى بارىپ، ونىڭ ۇرپاقتارىمەن كەزدەستى.
امانشا اتا ايگىلى پانفيلوۆ ديۆيزياسىنىڭ قۇرامىندا ماسكەۋ تۇبىندەگى قيان-كەسكى ۇرىسقا قاتىسقان. اۋىر جاراقاتىنا قاراماستان 362ء-شى وزدىگىنەن جۇرەتىن ارتيللەريا پولكىن باستاپ بەرلينگە دەيىن جەتەدى. سول جەردە امانشا اتامىزدىڭ باتارەياسى جاۋ اسكەرىنە ويسىراتا سوققى بەرىپ، ناتيجەسىندە كەڭەس اسكەرى گەرمانيا استاناسىنىڭ شىعىس بولىگىنە باسىپ كىرۋگە مۇمكىندىك الادى. وسى ەرلىگى ءۇشىن ول بىردەن كەڭەس وداعىنىڭ باتىرى اتاعىنا ۇسىنىلدى. الايدا سول ءبىر التىن جۇلدىزعا قول جەتكىزە الماي كەتتى. ءبىراق ەرلىك ەشقاشان ۇمىتىلمايدى. تاۋەلسىزدىك العاننان كەيىن ەلباسىنىڭ جارلىعىمەن امانشا مەڭدىعالييەۆكە «وتان» وردەنى سالتاناتتى جاعدايدا تابىس ەتىلدى. جەتى بالا تاربيەلەپ وسىرگەن ارداگەر اتامىز 28 نەمەرە ءسۇيدى. امانشا اتا 2008 جىلى 90 جاسىندا دۇنيەدەن وزدى.
بۇگىندە باتىردىڭ وتىن وشىرمەي، قاراشاڭىراقتا ۇلى اسىلبەك مەڭدىعالييەۆ وتىر. ول دا اكە جولىن جالعاپ، اسكەري ءومىردى تاڭداعان. ءوز سوزىندە «نۇر وتان» پارتياسى ءتوراعاسىنىڭ ءبىرىنشى ورىنباسارى نۇروتاندىقتار جاڭا باستاما ارقىلى تاريحي ادىلەتتىلىكتى قالپىنا كەلتىرىپ، ارداگەرلەردىڭ وزدەرى كورە الماي كەتكەن قۇرمەتتى بۇگىنگى ۇرپاقتارىنا كورسەتۋ ارقىلى جاستاردى وتانسۇيگىشتىككە باۋلۋدى كوزدەيتىنىن جەتكىزدى.
– ءبىز ادامزات تاريحىنداعى ەڭ قانقۇيلى سوعىستا قازاقستاندىقتاردىڭ ۇلى جەڭىستى جاقىنداتۋعا ولشەۋسىز ۇلەس قوسقانىن ەشقاشان ۇمىتپاۋىمىز كەرەك. سوندىقتان «ەرلىك ەشقاشان ۇمىتىلمايدى» اتتى ارنايى اكسيانى قولعا الىپ وتىرمىز. بۇگىن وسى باستاما اياسىندا نۇروتاندىقتار ەلىمىز بويىنشا قايتپاس قايسارلىقتىڭ جارقىن ۇلگىسىن كورسەتسە دە وزىنە تيەسىلى باتىر اتاعىن الا الماي كەتكەن ارداگەرلەردىڭ شاڭىراقتارىنا ارنايى بارىپ، ولاردىڭ ۇرپاقتارىنا قۇرمەت كورسەتۋدە. پارتيا تاراپىنان وسىنداي ارداگەرلەردىڭ ەسىمدەرىن مەكتەپتەر مەن كوشەلەرگە بەرۋگە قاتىستى دا ءتيىستى جۇمىستار جۇرگىزىلەتىن بولادى. بۇنى وسكەلەڭ ۇرپاققا ەرەن ەرلىكتى دارىپتەيتىن يگى ءىس دەپ ەسەپتەيمىن. سوندىقتان بىزدەر ءوز باتىرلارىمىزدىڭ ەرلىكتەرىن ماڭگىلىك جادىمىزدا ساقتاپ، ولارعا لايىقتى قۇرمەت كورسەتۋگە ءتيىسپىز، – دەدى ماۋلەن اشىمبايەۆ.
وتكەن مەرەكەلىك كۇندەردە «ەرلىك ەشقاشان ۇمىتىلمايدى» اكسياسى اياسىندا نۇروتاندىقتار ەلىمىز بويىنشا 8 ارداگەردىڭ وتباسىنا ارنايى بارىپ، ولاردىڭ ۇرپاقتارىمەن كەزدەستى. امانشا مەڭدىعالييەۆپەن بىرگە بۇل قاتاردا اتىراۋلىق ءجاميلا جۇماشيەۆا، شىعىسقازاقستاندىق بالتابەك جەتپىسبايەۆا، تارازدىق يبرايم سۇلەيمەنوۆ، قوستانايلىق قاسىم احمەتوۆ، اقتاۋلىق يساتاي سۇيەۋبايەۆ جانە پاۆلودارلىق ارداگەرلەر سەمباي قالييەۆ پەن قابىش كوكتايەۆ بار. بۇلار جوعارى ناگراداعا ۇسىنىلىپ، سول ماراپاتىن الا الماي كەتكەن ارداگەر اتا-اجەلەرىمىز. الداعى ۋاقىتتا پارتيانىڭ قولداۋىمەن وسى باعىتتاعى جۇمىستار ودان ءارى جالعاسىپ، جوعارىدا ايتقان جۇزدەن استام ارداگەردىڭ ءبارى انىقتالاتىن بولادى. وسى باستامانىڭ ناتيجەسى رەتىندە «ەرلىك ەشقاشان ۇمىتىلمايدى» اتتى كىتاپ باسىلىپ شىعارىلماق. وعان اتالعان ارداگەرلەر تۋرالى جان-جاقتى مالىمەتتەر، ولاردىڭ ەرلىكتەرى جايىندا تىڭعىلىقتى دەرەكتەر ەنەتىن بولادى.
سونىمەن قاتار «نۇر وتان» پارتياسى ءتوراعاسىنىڭ ءبىرىنشى ورىنباسارى بۇگىندە استانا قالاسىندا تۇراتىن وزگە دە ۇلى وتان سوعىسى ارداگەرلەرىنىڭ ۇيلەرىنە ارنايى بارىپ، جەڭىس كۇنىمەن قۇتتىقتادى. اتاپ ايتقاندا، پارتيا تاراپىنان ايگىلى كۋرسك شايقاسىنا قاتىسىپ، حاركوۆ، كييەۆ قالالارى مەن پولشانى جاۋدان ازات ەتكەن، بيىل 97 جاسقا تولاتىن سەيىلبەك ۋسين اتا مەن سوعىس جىلدارى گوسپيتالدە جۇمىس ىستەگەن، مايدانعا ازىق-تۇلىك پەن دارى-دارمەك جىبەرۋ جۇمىستارىنا دا ارالاسىپ، كەيىن 2ء-شى ۋكراينا فرونتىندا قىزمەت ەتكەن ەكاتەرينا پيساريەۆا اجەيگە قۇرمەت كورسەتىلدى. جالپى مەرەكە كۇنى نۇروتاندىقتار ەلىمىز بويىنشا ەكى مىڭنان استام ۇلى وتان سوعىسى ارداگەرىنىڭ ۇيلەرىنە ارنايى بارىپ قۇتتىقتاعانىن اتاپ وتكەن ءجون.
پىكىر قالدىرۋ