Whatsapp مەسسەندجەرىندە Instagram مەن Facebook ۆيدەولارىن كورۋگە مۇمكىندىك بەرەتىن قوسىمشا فۋنكسيا پايدا بولدى، دەپ حابارلايدى Hi-Tech جاڭالىقتارى.
ەندى قولدانۋشىلارعا وزگە قولدانۋشى جىبەرگەن ۆيدەونى تاماشالاۋ ءۇشىن چاتتان شىعۋدىڭ قاجەتى بولمايدى. ۆيدەو «سۋرەت ىشىندەگى سۋرەت» رەجيمىندە تىكەلەي قوسىمشانىڭ وزىندە ويناتىلادى. قولدانۋشى ۆيدەونى كورىپ وتىرىپ، سول مەزگىلدە دوستارىنا جىبەرە الادى.
جاڭا فۋنكسيا iOS جانە Android وپەراسيالىق جۇيەسىندەگى سمارتفون يەلەرى ءۇشىن قولجەتىمدى. فۋنكسيانى قولدانۋ ءۇشىن قوسىمشانىڭ سوڭعى نۇسقاسىن جۇكتەپ الۋ كەرەك. بۇل جاڭارتۋ Facebook-قا تيەسىلى ءتۇرلى سەرۆيستەر اراسىنداعى بايلانىستى جەڭىلدەتۋگە ارنالعان.
وسىعان ۇقساس مۇمكىندىكتى Whatsapp مەسسەندجەرى You Tube ۆيدەولارى ءۇشىن بىلتىرعى جىلدىڭ قاراشاسىندا ىسكە قوسقان بولاتىن.
سونىمەن قاتار مەسسەندجەردىڭ سوڭعى نۇسقاسىندا توپ اكىمشىسىنىڭ فۋنكسيالارى دا كەڭەيتىلگەن. ەندى توپتى قۇرعان اكىمشى توپ مۇشەلەرىنەن بەكىتكەن اكىمشىنىڭ باسقارۋ قۇقىعىن كەرى قايتارا الادى جانە توپتىڭ تاقىرىبىن، سۋرەتىن، توپ سيپاتتاماسىن وزگەرتەتىن مۇشەلەردى وزدەرى تاڭداي الادى. بۇل پارامەترلەردى "توپ باپتاۋلارى" بولىمىنەن تابۋعا بولادى.
پىكىر قالدىرۋ