شىعىس قازاقستان وبلىسىنىڭ اكىمى
د. ك. احمەتوۆ مىرزاعا،
وسكەمەن قالاسىنىڭ اكىمى
ق. م. تۇمابايەۆ مىرزاعا
وبلىستاعى ءبىرقاتار قوعامدىق-ساياسي
ۇيىمداردان
ۇسىنىس حات
ەلباسىنىڭ «رۋحاني جاڭعىرۋ» باعدارلاماسىنا وراي وبلىسىمىزدا ءوزىڭىزدىڭ ساليقالى باسشىلىعىڭىزبەن ءبىرقاتار وڭدى شارالار جۇزەگە اسىپ، قازاقشا ايتساق ءوڭىر جۇرتشىلىعىنىڭ ولگەنى ءتىرىلىپ، وشكەنى جانباسا دا ءبىرشاما سەرگىپ، سەرپىلىپ قالعانى راس. بۇل شاعىن حاتتا ول شارالاردى تىزبەلەپ جاتۋ ارتىق. دەسەك تە ونوماستيكا، توپونيميكا ماسەلەلەرىنە كەلگەندە ەلباسىنىڭ تالاپ-تىلەكتەرىنە جاۋاپ بەرە الماي، جەر شۇقىپ قالاتىن تۇستارىمىز دا جەتەرلىك. ارينە، «رۋحاني جاڭعىرۋ: بولاشاققا باعداردا» نۇرسۇلتان ءابىش ۇلى نازاربايەۆ مەملەكەتىمىزدىڭ نەگىزىن قۇراپ وتىرسا دا قازاق حالقىنىڭ وسى ۋاقىتقا دەيىن جوعارىداعى ماسەلەلەردە ماندىمدى جۇمىستار تىندىرۋعا مۇمكىندىگى بولماعانىن، ەندى ونى كەشەۋىلدەتسەك كەش بولاتىنىن دا ەمەۋىرىنمەن جەتكىزۋگە تىرىسقان.
وزدەرىڭىزگە بەلگىلى، شىعىس قازاقستان، ونىڭ ىشىندە اسىرەسە وسكەمەن، زىريان، ريددەر، شەمونايحا قالالارىنىڭ كوشە اتاۋلارى سوناۋ كەڭەستىك كەزەڭدەگى كەيىپ-بولمىسىن كوپ بۇزا قويعان جوق. اسىرەسە، وبلىس ورتالىعى وسكەمەن كوشەلەرى ءالى كۇنگى كەشەگى بولشيەۆيكتىك اتاۋلارمەن سىرەسىپ تۇر. قازان توڭكەرىسىنىڭ «توركىن جۇرتى» - رەسەيدىڭ ءوزى ولاردان باياعىدا ارىلىپ، تازارىپ، جاڭعىرىپ العان. ال، وبلىسىمىزدىڭ قالالارى مەن اۋىلدارى وسكەمەنگە قاراپ بوي تۇزەيتىنى – شىندىق.
ارداقتى دانيال كەنجەتاي ۇلى!
ءسىزدىڭ وسكەمەن قالاسى اكىمىنە قالاداعى 20-دان استام كوشەلەردىڭ اتاۋلارىن «رۋحاني جاڭعىرۋعا...» ساي كەلەتىندەي ەتىپ وزگەرتۋ جايلى نۇسقاۋ بەرگەنىڭىزدى ەستىپ، قاتتى قۋاندىق. ءسىز باسشىلىق جاساعان كەزدە قالاداعى 700-دەن استام كوشەلەردىڭ تىم قۇرىسا 30 پايىزى قازاقشالانىپ قالسا، ەرتەڭگى كۇنى ەلىمىز مەن جۇرتىمىزدىڭ اۋزىندا وسى ءبىر يگىلىكتى ءىسىڭىز قالاتىنى شىندىق. جۋىردا جەرگىلىكتى باسپا ءسوز بەتتەرىندە: «وسكەمەندەگى ۆوروشيلوۆ كوشەسىنىڭ اتاۋى جاقيا ءشايجۇنىسوۆتىڭ اتىمەن اتالعالى جاتىر» دەگەندەي حابارلاردى بىرنەشە مارتە وقىپ قالدىق. اڭگىمە مىنادا.
جاقيا ءشايجۇنىسوۆتىڭ كەزىندەگى سەمەي وبلىسى اۋماعىندا، اتاپ ايتار بولساق، كوكپەكتىدەگى ءبىلىم بەرۋ سالاسىنا سىڭىرگەن ەڭبەگى مول ەكەندىگى شىندىق. ەڭبەك وتەمىنە دەپ ول اعامىزدىڭ ومىراۋىنا سوسياليستىك ەڭبەك ەرىنىڭ قىزىل جۇلدىزى تاعىلعان. لەنين وردەنىمەن القالانعان. انەۋ ءبىر جىلدارى سەمەيدەگى ۇلكەن ءبىر كوشەگە ءشايجۇنىسوۆ اتاۋى بەرىلدى. ارتتا قالعان ۇرپاقتارىنا، حالقىنا ول كىسىنىڭ ارۋاعى ريزا!
وسكەمەندەگى ۆوروشيلوۆ كوشەسى - اباي داڭعىلىن قيىپ وتەتىن ۇلكەن كوشە. ەگەردە ول كوشەگە شىنىندا دا حالقىنىڭ ارداقتىسىنىڭ اتاۋى بەرىلەر بولسا، وعان اسا ۇلكەن اقىن، ءىرى فيلوسوف، كەمەڭگەر اۋدارماشى، اباي اعاسىنىڭ ءپالساپاسىن زاڭدى تۇردە جالعاستىرۋشى، ەرەن تۇركىتانۋشى، قازاق شەجىرەسىنىڭ نەگىزىن قالاعان، ونى ۇرپاققا قالدىرىپ كەتكەن شاكارىم قۇدايبەردى ۇلىنىڭ اتىن بەرۋ كەرەك!!! اباي مەن شاكارىم – ۇلتىمىزدىڭ ابىرويى مەن ار-وجدانى! سول ەكى الىپتىڭ اتتارىن يەمدەنگەن قوس كوشە دانالىق پەن تاعىلىمنىڭ ۇلگىسىندەي بولىپ قيىلىسىپ جاتسا، شىعىس قازاقستاننىڭ بارشا جۇرتى ريزا بولاتىنى اقيقات!!!
سونىمەن قاتار تاعى دا ءبىر ايتپاي كەتۋگە مۇلدەم بولمايتىن ماسەلە بار، ول – وسكەمەندەگى ۋشانوۆ الاڭىن جاڭعىرتۋ. وتكەن عاسىرداعى قىلىشىنان قان سورعالاعان بولشيەۆيك ۋشانوۆقا قويىلعان ەسكەرتكىشتى جۇلىپ تاستاپ، بۇگىنگى جانە كەلەر ۇرپاق ساناسىن جاڭعىرتۋىمىز قاجەت! ول الاڭعا الاش كوسەمى ءاليحان بوكەيحانوۆتىڭ ەسىمىن بەرىپ، سول ارىستىڭ ەسكەرتكىشىن قويۋ ءلازىم!
ەلباسىنىڭ ەلىمىزدىڭ ستراتەگيالىق دامۋىندا باسىم باعىت دەپ ەكپىن ءتۇسىرىپ وتىرعان «رۋحاني جاڭعىرۋ...» باعدارلاماسىنىڭ – سىزدەر ءۇشىن دە اسا ماڭىزدى ەكەنىن وتە جاقسى تۇسىنەمىز. سوندىقتان دا ەل مەن جۇرتقا ءسىڭىرىپ جۇرگەن ەڭبەكتەرىڭىزدى قارىزىم دەپ ەمەس، پارىزىم دەپ تۇسىنەتىن سىزدەردىڭ بولاشاقتاعى شارۋالارىڭىزعا ساتتىلىكتەر تىلەي وتىرىپ، وسى ءبىر ۇلتتىق-ساياسي ماسەلەلەردى وڭدى شەشەر دەگەن ۇمىتتەمىز!
ق ر جازۋشىلار وداعى شقو فيليالىنىڭ
ديرەكتورى: ءا. قاڭتاربايەۆ.
«ق ر سالالىق كاسىپوداعى» شقو فيليالىنىڭ
ءتوراعاسى: ت. تۇسىپبەكوۆ.
«التاي اسۋ» قوعامدىق بىرلەستىگىنىڭ اتقارۋشى
ديرەكتورى: س. قۇسانبايەۆ.
شق وبلىستىق اقساقالدار القاسىنىڭ
ءتوراعاسى: ج. ءاشىموۆ.
وسكەمەن قالالىق ارداگەرلەر كەڭەسى
ءتوراعاسىنىڭ ورىنباسارى: س. اقانوۆ.
