ارمەنيانىڭ سوڭىنان 11 مامىردا ۋكراينا جوعارعى راداسى «جەڭىس كۇنىن» 8 مامىرعا اۋىستىردى. زاڭ جوباسىن پارلامەنتكە دەپۋتات اندرەي دەنيسەنكو ۇسىنعان.  پارلامەنت سايتىندا جاريالانعانداي، كەشە عانا ۇسىنىلعان زاڭعا وزگەرىس بۇگىن ماقۇلداندى. ءارى مەرەكەلىك كۇن اتاۋىن «ەۋروپادا ءناسيزمدى جەڭىس كۇنى جانە ەسكە الۋ مەن كەلىسىم كۇنى» دەپ اتاعان.

ايتا كەتەتىن بولساق، 8 مامىردا ارمەنيا پارلامەنتى پرەمەر-مينيستر ەتىپ سايلاعان وپپوزيسيا وكىلى نيكول پاشينيان 9 مامىرداعى جەڭىس كۇنى مەرەكەسىن 8 مامىرعا اۋىستىرىپ، ازا تۇتۋ جانە ءبىتىسۋ كۇنى دەپ اتاۋعا جارلىق شىعارعان بولاتىن.

«جەڭىس كۇنى» اتالاتىن مەرەكەلىك داتانىڭ ۋاقىتى ەكىنشى دۇنيەجۇزىلىك سوعىستا سسسر مەن فاشيستىك گەرمانيا اراسىنداعى كاپيتۋلياسياعا قول قويىلعان ۋاقىت ماسكەۋ ۋاقىتىمەن 9 مامىر تۇنگى ءبىر. رەيمس جەرگىلىكتى ۋاقىتىمەن 8 مامىر كەشكى 11.

ەسكە سالساق، قازاقستاندا جىل سايىن «جەڭىس كۇنى» شەرۋى ءوتىپ، سوعىس قۇرباندارىنا ارنالعان ەسكەرتكىشتەرگە گۇل شوقتارى قويىلىپ تۇرادى. ال 2014 جىلدان باستاۋ العان «ولمەس پولك» شەرۋىنە بيىل قازاقستاننىڭ قالالارىنان جالپى سانى 100 مىڭداي ادام قاتىسقانى ايتىلدى. وزدەرىنىڭ سوعىسقا قاتىسقان تۋىستارىنىڭ پورترەتتەرىن الىپ، كوشەلەردە شەرۋ وتكىزۋدى قولدامايتىندار دا بار. مىسالى بيىل تاجىكستاندا «ماڭگى ولمەس پولك» شەرۋى وتپەدى. ەكىنشى دۇنيەجۇزىلىك سوعىس كەزىندە قازا تاپقانداردى ەسكە الۋ شاراسىنا دۋشانبە قالاسىنىڭ بيلىگى رۇقسات بەرمەگەن.