ارقالىقتاعى ەكىدىن اۋىلىنىڭ تۇرعىنى ءوزىن قورلاعان بۇزاقىلاردى جاۋاپكەرشىلىككە تارتا الماي، قۇقىق قورعاۋ ورگاندارىنىڭ نەمقۇرايلىعىنا نارازى. 22 جاستاعى قىزدىڭ ءىسىن ادۆوكات ايمان وماروۆا قولعا الماقشى. ەكى جاق اراسىنداعى داۋدىڭ نەگە اكەلىپ سوعاتىنى بەلگىسىز. سەبەبى بۇل جاعدايدا 14 ادامعا قارسى ءىس قوزعالماقشى دەپ جازادى Qamshy.kz اقپارات اگەنتتىگى  NewTimes.kz-كە سىلتەمە بەرىپ.

 تانىمال ادۆوكات ايمان وماروۆانىڭ ايتۋىنشا، قيىن جاعدايعا دۋشار بولعان ادامداردان وعان ءجيى حات كەلەدى. وسى جولى ادۆوكاتقا ارقالىقتان 22 جاستاعى قىزدان حات كەلگەن.

«مەن قوستاناي وبلىسى ارقالىق قالاسىنىڭ جانىنداعى ەكىدىن اۋىلىنىڭ تۋماسىمىن. بۇل حاتتى سىزگە جازۋداعى سەبەبىم – ادىلدىك ءۇشىن كۇرەس. مەنى 14 جىگىت زورلاپ، قورلادى. وسى ۋاقىتقا دەيىن بۇل جاعدايدى ەشكىمگە ايتپاعان بولاتىنمىن. ۇيالىپ، قورقىپ ءجۇردىم. ءقازىر مەنىڭ اياعىم اۋىر. تۋىستارىم مەن اتا-انام مەنىڭ اياعىم اۋىر ەكەنىن بايقاعان سوڭ بارلىق ءمان-جايدى ءبىلدى»،-دەپ جازادى حاتىندا قىز.

قىزدىڭ ايتۋىنشا، بارلىعى 2017 جىلى باستالعان. ول سىنىپتاسىنىڭ تويىنا بارىپ، سونداعى قوناقتاردىڭ ءبىرىنىڭ ايەلى بۇنى وزىمەن بىرگە سىرتقا شىعىپ كەلۋدى سۇراعان.

«دارەتحاناعا بارا جاتىر ەدىك، الدىمىزعا كولىك كەلىپ توقتادى دا، ودان ە.م شىعىپ، مەنى ەركىمنەن تىس كولىككە وتىرعىزدى. مەنىڭ جانىمدا كەلە جاتقان جۇكتى ايەلدىڭ كۇيەۋى-مەنىڭ سىنىپتاسىم كولىككە جۇگىرىپ كەلدى، الايدا ۇلگەرمەي قالدى. كولىك ءجۇرىپ كەتتى، سالوندا: ە:ت، ن.س، ا.و، ە.م – بارلىعى ءتورت ادام وتىرعان. مەنى ب. ەسىمدى جىگىتتىڭ اۋىل سىرتىنداعى ۇيىنە اپاردى. ەڭ ءبىرىنشى مەنى ە.م زورلادى، ودان كەيىن ا.و، ە.ت، ن.س. ءبارى بىتكەن سوڭ مەنى كافەگە اپارىپ، لاقتىرىپ كەتتى. ۇزاق ۋاقىت وزىمە كەلە الماي، ۇيگە ارەڭ جەتتىم. الايدا قاتتى قورىققاندىقتان، ەشكىمگە ايتا المادىم»،-دەيدى قىز.

قىزدىڭ ايتۋىنشا بىرنەشە ايدان كەيىن ونى تاعى 14 جىگىت زورلاعان. ول بۇزاقىلاردىڭ بىرەۋىنەن باسقالارىنىڭ ەسىمدەرىن بىلەتىنىن جازادى. سىنىپتاسىنىڭ ۇيىنەن شىققان ول كوشەدە ءبىر توپ بالالارعا ۇرىنىپ قالعان.

2017 جىلدىڭ قىركۇيەگىندە بويجەتكەن تاعى دا قورلىققا ۇشىراعان. ونىڭ ايتۋىنشا، قىزدىڭ سىنىپتاستارى وزدەرىن ەرسى ۇستاعان. قۇربىسىنىڭ ۇيىنە وتىرعاندا قاسىنا ەكى جىگىت كەلگەن. قىزدىڭ ءوزىن شىعارىپ سالۋىن سۇراعانىمەن، قۇربىسى ونىڭ جالعىز ءوزىن جىبەرگەن كورىنەدى. سول جول قىز تاعى زورلىققا ۇشىراعان.

ءۇش ايدا ءۇش رەت زورلانعان قىز ەندى جۇكتى بولىپ قالعان.

2018 جىلى ول ارقالىق قالاسىنىڭ ىىد-نە ارىز جازعان. الايدا قىز كورسەتكەن جىگىتتەردىڭ بارلىعىنان جاۋاپ الىنباعان.

«ءقازىر مەن ەمدەلىپ جاتىرمىن. ال مەنى قورلاعاندار بوستاندىقتا ءجۇر»،-دەپ قاپالانادى ول.

ول حاتىندا ايمان وماروۆانىڭ وزىنە كومەكتەسۋىن سۇراعان.

«قازىرگى ۋاقىتتا مەن باس پروكۋراتۋراعا ءىستى باقىلاۋعا الۋ جونىندە حات جولدادىم، سونىمەن بىرگە ىىم-گە ءىستى ارقالىق قالاسىنىڭ ءىىد قىزمەتكەرلەرىنە ەمەس، قوستاناي وبلىسىنىڭ ىىد-گە جىبەرۋدى سۇرادىم»،-دەيدى ا.وماروۆا.