وڭتۇستىك قازاقستان وبلىسىندا جۋرناليستەر مەن بلوگەرلەردىڭ باسىن قوسقان «اقپاراتتىق قوعام: ب ا ق جانە الەۋمەتتىك جەلىدەگى قۇقىقتىق مادەنيەت» اتتى سەمينار ءوتتى. وبلىستىق ىشكى ساياسات باسقارماسى، قازاقستان جۋرناليستەر وداعىنىڭ وبلىستىق فيليالى جانە قازاقستان حالقى اسسامبلەياسىنىڭ وقو بويىنشا فيليالى بىرلەسىپ ۇيىمداستىرعان ءىس-شاراعا سوت، قۇقىق قورعاۋ ورگاندارى، ادىلەت دەپارتامەنتى وكىلدەرى قاتىستى.
جۋرناليستەردىڭ جانە الەۋمەتتىك جەلى قولدانۋشىلارىنىڭ اقپارات بەرۋ ءتاسىلىن دامىتۋ مەن اقپارات تاراتۋداعى قۇقىقتىق جاۋاپكەرشىلىگىن ارتتىرۋ ماقساتىندا ۇيىمداستىرىلعان باسقوسۋدا قوعام مەن ب ا ق وكىلدەرىنىڭ اراسىندا بايلانىس ورناتۋ ماسەلەسى ءسوز بولدى. جيىندا وقو اكىمىنىڭ باسپا ءسوز قىزمەتىنىڭ جەتەكشىسى بەيسەن تاجىبايەۆ كىرىسپە ءسوز سويلەپ، باسپا ءسوز قىزمەتكەرلەرى مەن جۋرناليستەردىڭ بىرىگىپ جۇمىس ىستەۋى، اقپارات تاراتۋداعى الەۋمەتتىك جەلىلەردىڭ ورنى تۋرالى ايتتى. سونداي-اق، سەمينارعا قاتىسۋشىلار «باق-تا كريمينوگەندى جانە الەۋمەتتىك-تۇرمىستىق سيپاتتاعى اقپارات تاراتۋدىڭ تاسىلدەرى»، «بۇقارالىق اقپارات قۇرالدارىنىڭ اقپارات تاراتۋداعى قۇقىقتىق جاۋاپكەرشىلىگى» تاقىرىبىندا ءسوز سويلەدى. ال وبلىستىق ىشكى ساياسات باسقارماسىنىڭ اقپاراتتىق ساياسات جانە ب ا ق مونيتورينگى ءبولىمىنىڭ باسشىسى دامير ءجۇنىسوۆ «ب ا ق جانە اقپاراتتىق تەحنولوگيالاردىڭ قوعامعا اسەرى» تاقىرىبىندا بايانداما جاسادى.
بۇدان بولەك، باسقوسۋدا جۋرناليستەردىڭ جانە الەۋمەتتىك جەلى قولدانۋشىلارىنىڭ اقپارات تاراتۋداعى ەتيكا ماسەلەلەرى مەن ادام قۇقىعى جايى تالقىعا سالىندى. قالام ۇستاعان قاۋىم وسى ماسەلەلەرگە قاتىستى وزدەرىنىڭ پىكىرلەرىن ءبىلدىرىپ، ويلارىن ورتاعا سالدى.
پىكىر قالدىرۋ