وڭتۇستىك قازاقستان وبلىسى، شاردارا قالاسىنداعى سپورت كەشەنىندە «قازاقستان بارىسى» رەسپۋبليكالىق تۋرنيرىنە وبلىستىق ىرىكتەۋ ءوتتى. سايىسقا وبلىستاعى قالا مەن اۋدانداردان بارلىعى 26 پالۋان قاتىستى.

جەرەبە بويىنشا پالۋانداردىڭ قارسىلاستارى انىقتالعان سوڭ بەلدەسۋلەر باستالدى.  زالعا تولعان جانكۇيەرلەر، ارنايى قوناق بوپ كەلگەن اقساقالدار قاۋىمى پالۋانداردىڭ كۇرەسىن تۇشىنا تاماشالاپ، سپورتشىلارعا دەم بەرىپ وتىرىستى. بوز كىلەم ۇستىندەگى العاشقى بەلدەسۋ بايدىبەك اۋدانىنىڭ سپورتشىسى سامات ەسەن مەن شىمكەنت قالاسىنىڭ اتىنان سىنعا تۇسكەن ءادىلجان ىستىبايەۆتاردىڭ اراسىندا ءوتتى. 5 مينۋتقا سوزىلعان سايىستا ىستىبايەۆ ۇپاي سانىمەن جەڭىسكە جەتتى.

كىلەمگە ەكىنشى بوپ شىققان سوزاقتىق ەراسىل سارتايەۆ پەن سايرامدىق بەكزات قاسىموۆتىڭ بەلدەسۋلەرى ۇزاققا سوزىلعان جوق. 1 مينۋت 36 سەكۋندتا قارسىلاسىن اتىپ ۇرعان بەكزات قاسىموۆتىڭ قولىن تورەشى جوعارى كوتەردى. 

تارتىستى وتكەن بەلدەسۋدە بابى مەن باعى قاتار كەلىسكەن مىقتىلار جەڭىسكە جەتىپ وتىردى. العاشقى سايىسىن ايقىن باسىمدىقپەن جەڭىپ شىققان شاردارالىق پالۋان، سامبو كۇرەسىنەن الەم چەمپيونى قايسار ءشامشيددينوۆ جۇلدەلى ءۇشىنشى ورىندى باعىندىردى.

اقتىق سىندا ورداباسىلىق بەيبارىس ءابدىعاني مەن تاعى ءبىر شاردارالىق داڭقتى پالۋان ەرسۇلتان مۇزاپپاروۆ كەزدەستى. قازاق كۇرەسىنەن ەكى دۇركىن «ەۋرازيا بارىسى» اتاعىن، بىلتىرعى جىلى الەم چەمپيونى اتاعىن جەڭىپ العان ەرسۇلتان شيراق قيمىلىمەن، شەبەر ادىسىمەن قارسىلاسىن قاپى قالدىرىپ، تازا جەڭىسكە جەتتى.

وسىلايشا ەرسۇلتان مۇزاپپاروۆ - «وڭتۇستىك بارىسى» اتاعىن قانجىعاعا بايلاپ، جانكۇيەرلەرىن كەزەكتى رەت قۋانتىپ تاستادى.  تۋرنير سوڭىندا اۋدان اكىمىنىڭ ورىنباسارى باۋىرجان شومپييەۆ ەرسۇلتان مۇزاپپاروۆقا 300 مىڭ تەڭگە سىياقى مەن جەڭىس بەلبەۋىن، «وڭتۇستىك بارىسى» كۋبوگىن سالتاناتتى جاعدايدا تاپسىردى.

ەكىنشى ورىن يەلەنگەن بەيبارىس ءابدىعانيعا 200 مىڭ، ءۇشىنشى ورىن يەلەنگەن قايسار شامشيددينوۆكە 100 مىڭ تەڭگە سىياقى بەرىلدى. ويىن بارىسىندا ۇزدىك ونەر كورسەتكەن باسقا دا ءبىرقاتار سپورتشىلارعا ارنايى سىيلىقتار بەرىلدى.