الدا ەگىن ەگۋ ناۋقانى كەلە جاتىر. كۇننىڭ قىزۋى مولايىپ، جىلۋى جەرگە جەتكەن شاقتا ديقاندار قاۋىمى جەر جىرتۋ شارۋاسىنا كىرىسەتىنى ءمالىم. زەينەتى مەن بەينەتى قاتار جۇرەتىن ەگىنشىلىك كاسىبىنە تىڭعىلىقتى تۇردە دايىندىقپەن بارعان دۇرىس. وسى ورايدا باتىس قازاقستان وبلىسىنداعى دالالىق جۇمىستارعا دايىندىق پىسىقتالدى.

باتىس قازاقستان وبلىستىق اۋىل شارۋاشىلىعى باسقارماسى باسشىسىنىڭ ورىنباسارى ساتقان ءومىرزاقوۆتىڭ ايتۋىنشا، بيىل اۋىل شارۋاشىلىعى داقىلدارىنىڭ القابى 513،5 مىڭ گەكتارعا جوسپارلانعان. كوكتەمگى دالالىق جۇمىستاردى ۋاقتىلى جانە  ساپالى جۇرگىزۋ ماقساتىندا ءتيىستى شارالار قابىلدانىپ، جۇمىستار اتقارىلعان. جوسپارعا سايكەس بارلىق ءداندى داقىلدىڭ القابى 259،0 مىڭ گەكتاردى قۇرايدى ەكەن. كوكتەمگى ەگىستىك جۇمىستارىنا 630-عا جۋىق شارۋاشىلىق قۇرىلىمى قاتىسادى دەگەن جوسپار بار. وبلىستا ءداندى داقىلدار ەگۋمەن 460، كارتوپ وسىرۋمەن 105، مايلى ءداندى داقىلدار ەگۋمەن 64 جانە باۋ-باقشا ونىمدەرىن وسىرۋمەن 67 شارۋاشىلىق اينالىسادى. سونداي-اق 71،0 مىڭ گەكتار جەرگە كۇزدىك داقىلدار ەگىلگەن.

ال «اگرارلىق نەسيە كورپوراسياسى» اق وبلىستىق فيليالىنىڭ ديرەكتورى ەرلان نىسانعالييەۆتىڭ ايتۋىنشا، اگرارلىق نەسيە كورپوراسياسى بقو-داعى  اگروونەركاسىپ سالاسىنا جالپى 20 ملرد. تەڭگەدەن استام قارجى سالعان. فيليالدىڭ كرەديتتىك پورتفەلى بۇگىندە 12 ملرد. تەڭگەنى قۇرايدى ەكەن. جىل سايىن كوكتەمگى ەگىستىك جۇمىستارىنا باعىتتالعان نەسيە رەسۋرستارى مەملەكەتتىك باعدارلامالار جانە كورپوراسيانىڭ ءوز قاراجاتى ەسەبىنەن بولىنەدى. بىلتىر وسى ماقساتقا 34 اۋىل شارۋاشىلىعى تاۋار وندىرۋشىگە 612 ملن. تەڭگە كولەمىندە نەسيە بەرىلگەن. اتالمىش قارجى  تولىق وتەلگەن. بيىلعى كوكتەمگى دالالىق جۇمىستارىنا «كەڭ دالا» باعدارلاماسى بويىنشا 547 ملن. تەڭگە كولەمىندە نەسيە بەرۋ جوسپارلانىپ وتىر. سوعان وراي بۇگىندە 17 شارۋاشىلىق قۇرىلىمىنان 474 ملن. تەڭگەگە ءوتىنىش ءتۇسىپتى. قازىرگى تاڭدا 10 شارۋاشىلىققا 265 ملن. تەڭگە بەرىلگەن. ەرلان بەركىن ۇلى ايتىپ وتكەندەي، ەگىن ەگۋ جۇمىستارىنا «اگروبيزنەس» باعدارلاماسى بويىنشا 28 شارۋاشىلىقتان 460  ملن. تەڭگەگە وتىنىمدەر تۇسسە، قاراجاتتىڭ 232 ملن. تەڭگەسى شارۋالارعا بەرىلگەن.

          اۋىل شارۋاشىلىعى  كەز كەلگەن قوعام ەكونوميكاسىنىڭ، ادامزات تىرشىلىگىنىڭ ، بارلىق ءوندىرىستىڭ نەگىزى. سوندىقتان اگرارلىق ساياساتتى جۇرگىزۋدەگى بقو-داعى  وڭدى باستامالار جالعاسىن تابا بەرەتىن بولادى.