« ... ادۆوكاتتاردىڭ قۇقىقتارى مەن سوتقا دەيىنگى ساتىداعى سوت باقىلاۋىنىڭ اياسى كەڭەيدى. قۇقىق قورعاۋ ورگاندارىنىڭ وكىلەتتىگى مەن جاۋاپكەرشىلىك شەگى ايقىندالدى.  سوندىقتان ازاماتتاردىڭ كونستيتۋسيالىق قۇقىقتارىنا كەپىلدىكتى نىعايتۋ، قۇقىق ۇستەمدىگىن قامتاماسىز ەتۋ، قۇقىق قورعاۋ قىزمەتىن ىزگىلەندىرۋ جۇمىستارىن جالعاستىرۋ قاجەت» دەگەن ەدى ق ر پرەزيدەنتى نۇرسۇلتان نازاربايەۆ «ءتورتىنشى ونەركاسىپتىك ريەۆوليۋسيا جاعدايىنداعى دامۋدىڭ جاڭا مۇمكىندىكتەرى» جولداۋىندا.  

جۋىردا ورال قالاسىنداعى  دوستىق ۇيىندە بقو قحا-نىڭ ۇيىمداستىرۋىمەن «باتىس قازاقستان وبلىسىندا مەدياسيانى دامىتۋدىڭ ءتيىمدى ادىستەرى» اتتى فورۋم ءوتتى. باسقوسۋعا باتىس قازاقستان وبلىسىنىڭ  اكىمى التاي كولگىنوۆ جانە كاسىبي،  قوعامدىق مەدياتورلار، قۇقىق قورعاۋ قۇرىلىمدارىنىڭ قىزمەتكەرلەرى، اۋدان اكىمدەرىنىڭ ورىنباسارلارى قاتىستى.

– ءبىز كوپ ۇلتتى ەلمىز، كوپ ۇلتتى ەل قاشاندا ىمىرا مەن بىتىمگە دىلگەر. ال مەدياتور قاشاندا ادامداردى ىمىراعا، تۇسىنىسۋگە شاقىرادى. ياعني داۋ-جانجالدى ورشىتپەيدى. بۇرىن ول قازاقتا تەك بيلەردىڭ ءتول ءىسى بولعان. ناتيجەسىندە بۇرىنعى قازاق قوعامىندا داۋ-جانجالدان تۋىنداعان كيكىلجىڭ تەرەڭدەمەگەن. ءسويتىپ، ادامدار بىر-بىرىمەن بارىنشا تاتۋلىقتا ءومىر سۇرۋگە مۇددەلىلىك تانىتقان. بىزدە مەدياسيا جۇيەسىنىڭ قولدانىسقا ەنگەنىنە تاپ كوپ ۋاقىت وتە قويعان جوق. سوعان قاراماستان، ءقازىر وڭىردە جۇزدەن استام مەدياسيا كابينەتى بار. دەمەك، جۇمىس باياۋ بولسا دا، ىلگەرىلەپ كەلەدى. ءالى دە قيىندىقتار جەتكىلىكتى. ولاي بولسا، فورۋمدا تەك جەتىستىكپەن شەكتەلىپ قالماي، قيىنشىلىقتار تۋرالى دا باتىل ايتۋ قاجەت، – دەدى جيىندى اشقان التاي سەيدىر ۇلى.

باتىس قازاقستان وبلىستىق سوتىنىڭ ءتوراعاسى بەك امەتوۆ 2011 جىلى قابىلدانعان «مەدياسيا تۋرالى» زاڭدى جۇزەگە اسىرۋدا بەلگىلى ءبىر جۇمىستار تىندىرىلعانىمەن، ءالى داۋ-جانجالدى سوت ۇدەرىمىنە جەتكىزبەي شەشۋدە پايدالانىلماي جاتقان مۇمكىندىكتەر بارىن ايتتى. ونىڭ پايىمداۋىنشا، ءوڭىردىڭ بارلىق ەلدى مەكەنىندە مەدياسيا كابينەتتەرى جۇمىس ىستەيدى. ءبىراق ولاردىڭ ۇگىت-ناسيحات جۇمىسى ماردىمسىز. سوندىقتان وبلىستىق قحا نەگىزىندە مەدياتورلاردى وقىتۋ جۇمىسىن ۇيىمداستىرۋ قاجەت. جۇمىس ساپاسى دا كۇن تارتىبىنەن تۇسپەۋى ءتيىس. ەگەر مەدياتورلار جۇمىسى جاپپاي ءورىس السا، سوتتارعا تۇسەر سالماق ازايار ەدى. جالپى، مەدياسيا جۇمىسىن جەڭىلدەتۋ ماقساتىندا بىلتىر وڭىردە ەلىمىزدە تۇڭعىش رەت «سيفرلى مەدياسيا» قاناتقاقتى جوباسى ەنگىزىلگەن. سونداي-اق مەدياتورلاردىڭ باسىن قوساتىن ورتالىق نە بىرلەستىك قۇرۋ دا العاش رەت بىزدە قولعا الىنباق. جيىندا ورالداعى كاسىبي مەدياتور، «تاتۋلاس» كاسىبي مەدياتورلار مەكەمەسىنىڭ باسشىسى ماۋلينا حابييەۆا، №2 قالالىق سوتتىڭ سۋدياسى التىن ايتۋاروۆا جانە باسقالارىنىڭ كۇن تارتىبىندەگى ماسەلە بويىنشا حابارلامالارى تىڭدالدى. فورۋم سوڭىندا «قوعامدىق مەدياتورلار وداعى» قۇرىلىپ، ونىڭ ءتورايىمى بولىپ  بورلىلىك مايرا سەلبايەۆا سايلاندى. ال الۋا ريحيشيەۆا «بقو مەدياتورلار وداعى» قاۋىمداستىعىنىڭ ءتورايىمى بولدى.