تۇركيا پرەزيدەنتى تايىپ ەردوعان بۇۇ-نى الەمدىك پروبلەمالاردى شەشە المايدى دەپ ايىپتادى. مۇنداي مالىمدەمەنى پرەزيدەنت ون شاقتى پالەستينالىقتىڭ گاز سەكتورىندا كوز جۇمىپ، سول ايماقتا ورناعان قاقتىعىس كەزىندەگى بۇۇ ارەكەتسىزدىگىنە قاتىستى جاساعان دەپ حابارلايدى ريا نوۆوستي.

ەردوعاننىڭ ايتۋىنشا، ۇيىمنىڭ جاعدايى ادبەن ناشارلاپ كەتكەن.

«ەگەر اتالعان قاقتىعىستار الەمنىڭ باسقا تۇكىپىرىندە بولىپ جاتسا، بۇكىل الەمدە قارسىلىق پەن نارازىلىق باستالار ەدى. الايدا الەمدىك قوعامداستىق ءيزرايلدىڭ پالەستينالىقتارعا قارسى ارەكەتىنە بەيجاي قاراپ وتىر»،-دەدى ەردوعان.

پرەزيدەنتتىڭ ايتۋىنشا، بۇۇ يزرايل بيلىگىنىڭ بەيبىت جاتقان پالەستينالىقتارعا قارسى ارەكەتتەرىنە توسقاۋىل بولۋى كەرەك. «ەگەر يزرايلدىك جاۋىزدىققا جاۋاپ قايتارىلماسا الەمدە باسكەسەرلەر بيلەگەن بەيبەرەكەتسىز ورنايدى»،-دەيدى ول.

 وسىعان دەيىن ەردوعان اقش-تى يزرايل ساياساتىنا بولىساتىنىن ايتىپ ايىپتاعان.

ايتا كەتەيىك، گاز سەكتورىنداعى تارتىپسىزدىكتەر دۇيسەنبى كۇنى باستالعان. يزرايل ساربازدارى نارازىلىق  اكسياسىنا شىققان حالىققا وق اتقان. قاقتىعىستار ناتيجەسىندە 61 پالەستينالىق كوز جۇمىپ، مىڭنان اسا بالا جارالانعان. وسىعان بايلانىستى پالەستينا مەن تۇركيا ءۇش كۇندىك ازا تۇتۋ كۇنىن جاريالادى.