بالالاردى شىعارماشىلىققا باۋليتىن الەمدىك باعدارلاماعا قازاق ءتىلى ەنگىزىلدى، دەپ حابارلايدى Qamshy.kz اقپارات اگەنتتىگى.
«زەردە» ۇلتتىق ينفوكوممۋنيكاسيا حولدينگى» اق-نىڭ باستاماسىمەن «Scratch» اتتى الەمدىك باعدارلاماعا قازاق ءتىلى ەنگىزىلدى. بۇل تۋرالى حولدينگتىڭ سيفرلىق داعدىلاردى دامىتۋ باسقارماسىنىڭ ديرەكتورى لاۋرا جۇمانالييەۆا بايانداپ بەردى.
وسىنداي جوبا ارقىلى بالالاردىڭ لوگيكاسى دامىپ، بولاشاقتا شىعارماشىلىق شىڭىنا شىققانىن نيەت ەتكەن «زەردە» حولدينگى ماسساچۋسەتس تەحنولوگيا ينستيتۋتىنىڭ زەرتتەۋ ورتالىعىمەن بىرلەسە وتىرىپ، باعدارلاماعا قازاق ءتىلىن ەنگىزىپتى. بۇعان قوسا، ونداعى بارلىق جۇيەنى تولىقتاي مەملەكەتتىك تىلگە اۋدارىپ، تەحنيكالىق جۇمىستارىمەن 3 اي بويى اينالىسقان.
«سكرەچ جوباسىنا Lifelong Kindergarten (متي) اتتى زەرتتەۋ ورتالىعىمەن بىرلەسىپ، مەملەكەتتىك ءتىلدى ەنگىزدىك. ءبىزدىڭ ماقسات – بۇل باعدارلامانىڭ قازاق ءتىلدى بالالارعا قولجەتىمدى بولعانى»، – دەپ اتاپ ءوتتى لاۋرا جۇمانالييەۆا.
اقش، ۇلىبريتانيا، وڭتۇستىك كورەيا سىندى مەملەكەتتەردە اتالعان جوبانى مەكتەپ باعدارلاماسىنا ەنگىزگەن. ال، 2017 جىلى «زەردە» حولدينگىنىڭ باستاماسىمەن تاجىريبە رەتىندە استانا قالاسىنداعى №27 مەكتەپتىڭ وقۋشىلارى سكرەچ ارقىلى باعدارلامالاۋ نەگىزدەرىن ۇيرەنۋدە.
بۇل باعدارلاماسىنىڭ ارتىقشىلىقتارى: باعدارلامالاۋدىڭ نەگىزىن ۇيرەتىپ، بالانىڭ شىعارماشىلىق قىرىن اشادى، كرەاتيۆتىلىككە باۋليدى.
«ءبىز بالالاردى دامىتقىمىز كەلەدى. لوگيكالىق ويلاۋ جۇيەسى مەن جاسامپازدىقتى يگەرگەنىن قالايمىز. كىشكەنتايىنان ءوز يدەيالارىن جۇزەگە اسىرا السا دەيمىز»، – دەدى ل. جۇمانالييەۆا.
ايتا كەتەيىك، Scratch – بالالاردى دامىتۋعا ارنالعان ينتەرنەت-قاۋىمداستاستىق. وندا ولارعا كوپتەگەن انيماسيا مەن ويىنداردى قۇراستىرۋدى ۇيرەتەدى. سونداي-اق، ول تۋىندىسىن الەمدىك دەڭگەيدە بولىسە الاتىن بولادى. سكرەچ جوباسىن الەم تۇرعىندارى 2002 جىلدان بەرى قولدانۋدا. وعان 22 ملن. ادام تىركەلگەن. كۇن سايىن 25 مىڭ وقىرمان جازىلىپ، 30 مىڭ جاڭا جوبالار جاسالۋدا. 2017 جىلى 30 ملن. جاڭا جوبا جاسالعان. بۇل بالالاردى كىشكەنتايىنان شىعارماشىلىققا باۋلىپ، ءتۇرلى تۋىندىلار جاساۋعا جاردەمدەسەدى.
مۇرات راحيمجانوۆ
