قاراعاندى وبلىسى ۇلىتاۋ اۋدانى العاباس اۋىلىنىڭ تۇرعىنى تۋعان قارىنداسىن ءولتىردى دەگەن كۇدىكپەن ۇستالدى، دەپ حابارلايدى Qamshy.kz اقپارات اگەنتتىگى tengrinews.kz-كە سىلتەمە جاساپ.  

قىلمىستىق ءىس اۋدانارالىق سوتتا قارالىپ جاتىر. تەرگەۋشىلەردىڭ ويىنشا، قىلمىس بيىل 16 اقپاندا بولدى. ونىڭ ءمان-جايى ءقازىر عانا انىقتالدى.

سوتتا 35 جاستاعى ەر ادام تۋعان قارىنداسىن ماس كەزىندە ولتىرگەنى ايتىلدى. اعاسى مەن قارىنداسىنىڭ اراسىندا ۇرىس بولعان.

قىلمىس بولعان كۇنى ەر ادام ۇيىنە ەكى بوتەلكە ىشىمدىكپەن كەلگەن. ەر ادام كەشكى اس كەزىندە ىشىمدىك ىشە باستاعان.

«اعاسىنىڭ قىلىعى قارىنداسىنا ۇناماي، ول ءوز نارازىلىعىن ءبىلدىردى. ەكەۋى ۇرىسا باستادى. وسى ۋاقىتتا ەر ادام ۇستەلدەن پىشاقتى الىپ قارىنداسىنا شابۋىلداعان. شوشىپ كەتكەن ايەل جاتىن بولمەگە قاشقان. اعاسى ونى سوققىعا جىعىپ، قولىمەن، اياعىمەن ۇرعان، پىشاق سۇققان» دەلىنگەن قىلمىستىق ءىس ماتەريالىندا.

سوت مەديسينا ساراپتاماسىنىڭ قورىتىندىسىنا سايكەس، ايەلدىڭ جۇرەگى مەن وكپەسى زاقىمدانعاندىقتان قايتىس بولعان. اعاسى تۋعان قارىنداسىن ولتىرگەننەن كەيىن وقيعا ورنىنان قاشىپ كەتكەن، ءبىراق كوپ ۋاقىت وتپەي ۇستالدى.