بۇگىن وڭتۇستىك قازاقستان وبلىسى اكىمدىگىندە ق ر ۇكىمەت باسشىسىنىڭ ورىنباسارى، اۋىل شارۋاشىلىعى ءمينيسترى ءومىرزاق شوكەيەۆتىڭ توراعالىعىمەن القالى جيىن ءوتتى. ماجىلىستە وڭىردەگى اۋىل شارۋاشىلىعى جەرلەرىن سۋارۋ جانە شەگىرتكە زيانكەستەرىنەن قورعاۋ ماسەلەلەرى قارالدى.

باسقوسۋعا وبلىس اكىمى جانسەيىت تۇيمەبايەۆ پەن ق ر اۋىل شارۋاشىلىعى ۆيسە-مينيسترى گۋلميرا يسايەۆا جانە مينيسترلىكتىڭ كوميتەت ءتوراعالارى مەن جامبىل، الماتى، قىزىلوردا، شىعىس جانە وڭتۇستىك قازاقستان وبلىستارىنىڭ اۋماقتىق ينسپەكسيا باسشىلارى، جەرگىلىكتى شارۋا قوجالىق يەلەرى قاتىستى. جيىندا العاشقى بولىپ ءسوز العان  ءومىرزاق ەستاي ۇلى قازاقستاننىڭ گەوگرافيالىق ورنالاسۋ ەرەكشەلىكتەرىنە قاراي مەليوراسيالاۋ ماسەلەسى ءبىرىنشى كەزەكتە وڭتۇستىك وڭىرلەردە وزەكتى ەكەندىگىن جەتكىزدى.

«2017-2021 جىلدارعا ارنالعان اگروونەركاسىپتىڭ كەشەندى دامىتۋ باعدارلاماسىندا اۋىل شارۋاشىلىعى مينيسترلىگى اۋىل شارۋاشىلىعى داقىلدارىنان جوعارى جانە تۇراقتى ءونىم الۋ ءۇشىن جەر جانە سۋ رەسۋرستارىن پايدالانۋدى ارتتىرۋ ماقساتىندا ءتۇرلى شارالار كەشەنىن ۇسىندى. اتاپ ايتقاندا، گيدرولوگيا، توپىراق جانە اگروكليماتتىق جاعدايلارىن جاقسارتۋ»، - دەدى  ءومىرزاق شوكەيەۆ.

سونىمەن قاتار، ماجىلىستە مەليوراسيا جۇيەسىنىڭ مەملەكەتتىك باعدارلاما اياسىندا ىسكە اسىرىلۋى جانە  ەلباسىنىڭ تاپسىرماسى اياسىندا يرريگاسيا جۇيەسىن قالپىنا كەلتىرۋ جانە 600 مىڭ گەكتار سۋارمالى جەردى اينالىمعا ەنگىزۋ بويىنشا وڭىردە الداعى ۋاقىتتا اتقارىلاتىن شارالار ءسوز بولدى.

وبلىس اكىمى جانسەيىت قانسەيىت ۇلى ايماقتاعى سۋارمالى جەرلەر كولەمى ۇلعايتىلىپ، جاڭا باعىتتاعى جوبالار بويىنشا دامىتىلىپ جاتقاندىعىن جەتكىزدى. ايتالىق، وڭىردە وتكەن جىلى 570،4 مىڭ گەكتار سۋارمالى جەردىڭ 498،2 مىڭ گەكتارى پايدالانىلعان.

سونداي-اق، بىلتىر وڭىردەگى اۋىل شارۋاشىلىعى سالاسىنداعى جالپى ءونىم كولەمى 522،4 ملرد. تەڭگەنى قۇراپ، وتكەن جىلدىڭ ءتيىستى كەزەڭىمەن سالىستىرعاندا 42 ملرد. تەڭگەگە ارتقان. سونداي-اق وزىق تەحنولوگيالاردى قولدانۋدا وڭتۇستىك قازاقستان وبلىسى رەسپۋبليكادا كوش باستاپ تۇر. ەلباسىمىزدىڭ تاپسىرماسىنا سايكەس، ايماقتا اۋىل شارۋاشىلىعى ونىمدەرىن ەكسپورتتاۋ جىلدان جىلعا قارقىندى وسۋدە.