بۇگىن وڭتۇستىك قازاقستان وبلىسىنىڭ اكىمى جانسەيىت تۇيمەبايەۆ ق ر ءبىلىم جانە عىلىم ۆيسە-مينيسترى تالعات ەشەنقۇلوۆ پەن م.اۋەزوۆ اتىنداعى وڭتۇستىك قازاقستان مەملەكەتتىك ۋنيۆەرسيتەتىنىڭ رەكتورى قىزمەتىنە جاڭادان تاعايىندالعان داريا قوجامجاروۆامەن كەزدەستى. بۇل جايىندا Qamshy.kz اقپارات اگەنتتىگى وقو اكىمدىگىنىڭ باسپا ءسوز قىزمەتىنە سىلتەمە جاساپ حابارلايدى.

كەزدەسۋ بارىسىندا تاراپتار ەلباسى مىندەتتەگەن جوعارى ءبىلىم بەرۋدىڭ ساپاسى مەن قولجەتىمدىلىگىن ارتتىرۋ جايىن جانە ستۋدەنتتەردى جاتاقحانامەن قامتۋ ماسەلەسىن قوزعادى.

وسى رەتتە، ايماق باسشىسى ەلباسى جولداۋىنداعى جەتىنشى مىندەتىندە ءبىلىم بەرۋدىڭ جاڭا ساپاسىنا توقتالعانىن ايتىپ، وسى باعىتتا وڭىردە اتقارىلىپ جاتقان جۇمىستاردى اتاپ ءوتتى. سونىمەن بىرگە اكىم ۋنيۆەرسيتەت رەكتورىنا جاۋاپتى قىزمەتىندەگى جۇمىسىنا ساتتىلىك تىلەپ، بۇگىندە م.اۋەزوۆ اتىنداعى وقمۋ قازاقستانداعى ەڭ ۇزدىك دەگەن 20 جوعارعى وقۋ ورىندارىنىڭ ىشىندە ۇشتىكتە ەكەنىن اتاپ ءوتتى.

ايتا كەتەيىك، داريا پەرنەش قىزى جوو رەكتورلارىن تاعايىنداۋ جونىندەگى رەسپۋبليكالىق كونكۋرستىق كوميسسيانىڭ شەشىمىمەن تاعايىندالدى.

قوجامجاروۆا داريا - تاريح عىلىمدارىنىڭ دوكتورى، پروفەسسور، قازاقستان رەسپۋبليكاسىنىڭ ۇلتتىق عىلىم اكادەمياسىنىڭ اكادەميگى. ول 1962 جىلى 22 شىلدەدە جامبىل قالاسىندا كوپبالالى، قىزمەتكەر وتباسىندا دۇنيەگە كەلگەن.

1984 جىلى س.م.كيروۆ اتىنداعى قازاق مەملەكەتتىك ۋنيۆەرسيتەتىن «تاريح» ماماندىعى بويىنشا ۇزدىك ءتامامداپ، ەڭبەك جولىن 1984-1989 ج.ج. جامبىل پەداگوگيكالىق ينستيتۋتىندا وقىتۋشى  قىزمەتىنەن  باستادى.  ال 1990-1995 جىلدارى اباي اتىنداعى الماتى مەملەكەتتىك ۋنيۆەرسيتەتىنىڭ اسپيرانتى، 1995-2001 جىلدارى م.ح.دۋلاتي اتىنداعى تاراز مەملەكەتتىك ۋنيۆەرسيتەتى «تاريح» كافەدراسىنىڭ دوسەنتى، 2001-2003ج.ج. كافەدرا مەڭگەرۋشىسى، 2003 جىلى م.ح.دۋلاتي اتىنداعى تاراز مەملەكەتتىك ۋنيۆەرسيتەتى پەداگوگيكا فاكۋلتەتىنىڭ دەكانى قىزمەتتەرىن اتقارعان. ال 2013 جىلدان باستاپ تاراز مەملەكەتتىك پەداگوگيكالىق ۋنيۆەرسيتەتىنىڭ رەكتورى بولعان.