وڭتۇستىك قازاقستان وبلىسى اكىمدىگىندە ءوڭىر باسشىسى جانسەيىت تۇيمەبايەۆ «قازاتومونەركاسىپ» ۇاك» اق باسقارما ءتوراعاسى عالىمجان پىرماتوۆپەن كەزدەستى.  باسقوسۋدا ايماقتى الەۋمەتتىك-ەكونوميكالىق دامىتۋ سالاسىنداعى ىنتىماقتاستىق ماسەلەلەرى تالقىلاندى، دەپ جازادى Qamshy.kz اقپارات اگەنتتىگى وقو اكىمدىگىنىڭ باسپا ءسوز قىزمەتىنە سىلتەمە جاساپ.

كەزدەسۋ بارىسىندا تاراپتار كومپانيانىڭ الەۋمەتتىك نىساندارىن وڭتۇستىك قازاقستان وبلىسىنىڭ كوممۋنالدىق مەنشىگىنە بەرۋ ماسەلەلەرىن تالقىلادى.

وبلىس باسشىسى جانسەيىت قانسەيىت ۇلى كاسىپورىندار سول ءوڭىردىڭ  الەۋمەتتىك-ەكونوميكالىق احۋالىنا ۇدايى قولداۋ كورسەتۋى كەرەكتىگىن ايتتى.

«قازاتومونەركاسىپ شاعىن جانە ورتا بيزنەستىڭ 80-نەن استام وكىلىن تاپسىرىسپەن قامتاماسىز ەتۋ ارقىلى وتاندىق تاۋار وندىرۋشىلەرگە بەلسەندى قولداۋ كورسەتىپ كەلەدى. 2017-2018 جىلدارى كومپانيا وبلىس كاسىپكەرلەرىمەن 101،6 ملرد. تەڭگەگە ءتۇرلى كەلىسىمشارت جاسادى. وسى ەكىجاقتى ىنتىماقتاستىق الداعى ۋاقىتتا دا جالعاسىن تابادى دەپ ويلايمىن. سونداي-اق، كاسىپورىندار وزدەرى ورنالاسقان سوزاق اۋدانىنداعى الەۋمەتتىك نىسانداردىڭ بوي كوتەرۋىنە اتسالىسىپ تۇرۋى قاجەت»، - دەدى وبلىس اكىمى.

«قازاتومونەركاسىپ» ۇاك» اق باسقارما ءتوراعاسى عالىمجان ءپىرماتوۆ ۇلتتىق اتوم كومپانياسى ايماقتى دامىتۋ، تۇرعىنداردىڭ ءومىر ساپاسى مەن ءال-اۋقاتىن ارتتىرۋ بويىنشا ءوز مىندەتتەمەلەرىن تولىق ورىنداپ وتىرعانىن جەتكىزدى.

ايتا كەتەرلىگى، كومپانيانىڭ 2017 جىلداعى سالىق تولەمدەرىنىڭ جالپى سوماسى 73 ملرد. تەڭگەدەن اسقان بولسا، سونىڭ 8،2 ملرد. تەڭگەسى وڭتۇستىك قازاقستان وبلىسىنىڭ بيۋدجەتىنە اۋدارىلعان. بۇدان بولەك، جەر قويناۋىن پايدالانۋ جونىندەگى كەلىسىمنىڭ شارتتارىنا سايكەس، بىلتىر ايماقتىڭ الەۋمەتتىك-ەكونوميكالىق دامۋى ءۇشىن وبلىس بيۋدجەتىنە 873 ملن. تەڭگەدەن استام قارجى ءبولىندى.