وڭتۇستىك قازاقستان وبلىسىنىڭ ونەرپازدارى حالىقارالىق بايقاۋلاردا ەل ابىرويىن اسقاقتاتتى. وقۋ جىلى باستالعالى وڭىرىمىزدەگى ساز كوللەدجىنىڭ 109 شاكىرتى ءتۇرلى دەڭگەيدەگى جارىستاردا جۇلدەلى ورىنداردان كورىنىپ، قوشەمەتكە بولەندى. بۇل تۋرالى بۇگىن وڭىرلىك كوممۋنيكاسيالار قىزمەتىندە وتكەن بريفينگتە وڭتۇستىك قازاقستان ساز كوللەدجىنىڭ ديرەكتورى ۋ.ماجيتوۆ مالىمدەدى. بۇل جايىندا Qamshy.kz اقپارات اگەنتتىگى وقو اكىمدىگىنىڭ باسپا ءسوز قىزمەتىنە سىلتەمە جاساپ حابارلايدى.

كوللەدج ديرەكتورى جىل سايىن شاكىرتتەرىنىڭ بارلىق دەڭگەيدەگى ونەر سايىستارىنا قاتىسىپ، جۇلدەلى ورىنداردان كورىنىپ كەلە جاتقانىن ايتا كەلە بيىلعى جەتىستىكتىڭ ەرەكشەلىكتەرىنە توقتالدى.

«وبلىسىمىزداعى ساز كوللەدجى – ەلىمىزدىڭ مادەنيەتىنىڭ دامۋىنا سۇبەلى ۇلەس قوسىپ جۇرگەن كوپتەگەن ونەر مايتالماندارىن تۇلەتكەن كيەلى شاڭىراق. وسىنداي مارتەبەلى مادەني وشاقتىڭ شاكىرتتەرى جەتىستىكتەرىمەن ءاردايىم قۋانتىپ تۇرۋدى ۇردىسكە اينالدىرعان دەسەم، ارتىق ايتقاندىق ەمەس. ماسەلەن، 2017 جىلى 118 وقۋشىمىز كونكۋرس جەڭىمپازى اتانسا، بيىلعى وقۋ جىلىندا جۇلدەگەرلەر سانى 109-عا جەتتى. ونىڭ 64ء-ى 2018 جىلدىڭ جەتىستىكتەرى. ءالى وقۋ جىلىنىڭ اياقتالماعانىن ەسكەرسەك، بيىل رەكوردتىق كورسەتكىشكە قول جەتكىزەمىز دەگەن ويدامىز»، – دەدى ۋلۋگبەك حالمات ۇلى.

بيىل يتاليانىڭ ريم قالاسىندا وتكەن «Primavera Romana» حالىقارالىق بايقاۋىنا قازاقستاننان قاتىسقان 7 وقۋشىنىڭ ەكەۋى وڭتۇستىكقازاقستاندىقتار. سونداي-اق، يتاليانىڭ پەزارو قالاسىندا وتكەن XV «Cittadi Pesaro» حالىقارالىق جارىسقا ەلىمىزدىڭ نامىسىن قورعاعان 8 ءونارپازدىڭ 2-ەۋى جانە گرۋزيادا وتكەن «ريتمى ۆەسنى - 2018» حالىقارالىق بايقاۋ ەلىمىزدىڭ اتىنان شىققان 3 ونەرپازدىڭ بارلىعى وڭتۇستىكتەن. بۇدان بولەك، ساز كوللەدجىنىڭ شاكىرتتەرى ەلىمىزدىڭ استانا، الماتى، شىمكەنت قالالارىندا وتكەن ءتۇرلى دەڭگەيدەگى دودالاردا توپ جارعان.