وڭتۇستىك قازاقستان وبلىسىندا 1 مامىر – قازاقستان حالىقتارىنىڭ بىرلىگى كۇنى مەرەكەسىنە وراي وتاندىق تاۋار وندىرۋشىلەردىڭ جارمەڭكەسى ءوتتى. «ەڭبەك» جاپپاي كاسىپكەرلىك باعدارلاماسى قاتىسۋشىلارىنىڭ جارمەڭكەسىندە ەت جانە ءسۇت ونىمدەرى، جەمىس-جيدەك، كوكونىستەر مەن قولونەر شەبەرلەرىنىڭ بۇيىمدارى ساتىلدى. مەملەكەتتىك باعدارلاما اياسىندا ءوز كاسىبىن دوڭگەلەتكەن 60 كاسىپكەر كەلۋشىلەرگە وزدەرىنىڭ تاۋارلارىن تومەنگى باعادا ۇسىندى، دەپ جازادى Qamshy.kz اقپارات اگەنتتىگى وقو اكىمدىگىنىڭ باسپا ءسوز قىزمەتىنە سىلتەمە جاساپ.

العاش رەت جۇمىسپەن قامتۋ باعدارلاماسىنىڭ قاتىسۋشىلارىمەن ءوتىپ جاتقان جارمەڭكەنىڭ ۇيىمداستىرۋشىلارى وبلىس اكىمدىگى مەن «دامۋ» قورى، «وڭتۇستىك» ايو جانە «ىرىس» ميكروقارجى ۇيىمى بولىپ تابىلادى.

مەرەكەلىك جارمەڭكە بولعاندىقتان مۇندا ويىن-ساۋىق جانە كونسەرتتىك شوۋ-باعدارلامالار قويىلىپ، سىيلىقتار ۇتىسى ۇيىمداستىرىلدى. سونداي-اق، ساتىپ الۋشىلارعا لوتەرەيا بيلەتتەرى تاراتىلىپ، جەڭىمپازدارعا جارمەڭكە الاڭىندا عانا جارامدى اقشالاي كۋپوندار تابىستالدى.

ايتا كەتەيىك، «ەڭبەك» جاپپاي كاسىپكەرلىك باعدارلاماسىنىڭ ارقاسىندا «دامۋ» قورى ارقىلى وڭتۇستىك قازاقستان وبلىسى بويىنشا 150 باستاۋىش جانە اعىمداعى كاسىپكەرلەر ءوز ءىسىن اشىپ، كەڭەيتۋ مۇمكىندىگىنە يە بولدى. جالپى قارجىلاندىرۋ كولەمى 1،4 ملرد. تەڭگەنى قۇرادى.

ال، «ىرىس» ميكروقارجى ۇيىمى 2017 جىلى اتالعان باعدارلاما اياسىندا «دامۋ» كاسىپكەرلىكتى قولداۋ قورى مەن «اگرارلىق نەسيە كورپوراسياسى» اق ارقىلى جالپى 900 ملن. تەڭگە قاراجات تارتىپ، ناتيجەسىندە 180 جاڭا جۇمىس ورنى قۇرىلعان 191 جوبانى قارجىلاندىردى.

ايتا كەتۋ كەرەك، اگرارلىق نەسيە كورپوراسياسىنان تارتىلعان قاراجات اۋىل تۇرعىندارىنا تاراتىلسا، «دامۋ» قورىنان بولىنگەن قاراجات ارقىلى كەنتاۋ، تۇركىستان جانە شىمكەنت قالالارىنىڭ تۇرعىندارى نەسيەلەندىرىلدى.