اتىراۋدا بولعان تراگەديادان كەيىن ارنايى كوميسسيا قۇرىلىپ، بارلىق ليفت شارۋاشىلىقتارى تەكسەرىلەدى،  بۇل تۋرالى وڭىرلىك كوممۋنيكاسيالار قىزمەتىندە وتكەن بريفينگتە اتىراۋ قالالىق تج جانە جۇمىلدىرىلعان جۇمىس ءبولىمىنىڭ باسشىسى تالعار حايرۋللين مالىمدەدى، دەپ حابارلايدى Qamshy.kz اقپارات اگەنتتىگى. 

ونىڭ ايتۋىنشا،  ەكى ءجاسوسپىرىم قازا تاپقان جازاتايىم وقيعانىڭ سەبەبىن انىقتايتىن كوميسسيا قۇرىلعان.

-بارلىق ليفت شارۋاشىلىقتارىنا تەكسەرۋ جۇرگىزىلەدى. 94  كوپ قاتارلى تۇرعىن ۇيدە 266  ليفت ورناتىلعان.  ونىڭ 32ء-سى جۇمىس ىستەمەيدى،  جەتەۋى جۇك ءليفتى،-دەيدى تالعار حايرۋللين.

تراگەديا بولعان ۇيدەگى جۇك ءليفتى 2012  جىلى دەمونتاجدالعان،  ەسىكتەرى دانەكەرلەنگەن. 
-جاسوسپىرىمدەردىڭ ليفت شاحتاسىنا قالاي كىرگەندەرىن تەرگەۋ جۇمىستارى مەن قۇرىلعان كوميسسيا انىقتايدى، -  دەيدى ت.حايرۋللين.

جازاتايىم وقيعا بولعان تۇرعىن ءۇي 2007  جىلى سالىنعان، 2010  جىلى  16 قاتارلى ءۇي كۇردەلى جوندەۋدەن ءوتتى،  سول كەزدە ليفتىلەر دە جوندەلگەن. ليفتىلەردى ىسكە قوسۋمەن  «كاسپيي ليفت» ج ش س اينالىسادى، پيك، پاتەر يەلەرى مەن اتالعان مەكەمە اراسىندا ءۇشجاقتى كەلىسىم جاسالعان.

ايتا كەتەيىك، اتىراۋداعى الماگۇل مولتەك اۋدانىنداعى 16 قاباتتى ۇيدە ىستەن شىققان ءليفتتىڭ شاحتاسىنا ەكى بىردەي ءجاسوسپىرىم قۇلاپ، قايتىس بولدى.