اتىراۋداعى الماگۇل مولتەك اۋدانىنداعى 16 قاباتتى ۇيدە ىستەن شىققان ءليفتتىڭ شاحتاسىنا ەكى بىردەي ءجاسوسپىرىم قۇلاپ، قايتىس بولعان. قاپىدا كوز جۇمعاندار جايلى كۋاگەرلەر ايتىپ بەردى. 

قايتىس بولعان ەكى ءجاسوسپىرىم دە 2003 جىلى تۋعان. ونىڭ ءبىرى سول ۇيدە تۇراتىن تۋىستارىنا قوناققا بارعان ەكەن. 16 قاباتتى ۇيدەگى جۇك تاسيتىن جەدەلساتىنىڭ شاحتاسىنا ويناپ جۇرگەن بالالار ابايسىزدا ءتۇسىپ كەتكەن. الايدا ليفت جابىق تۇرعان دەسەدى. ال بالالار ونى ءوز بەتتەرىنشە اشىپ العان. 

اتىراۋ قالاسىنىڭ تۇرعىنى شىنار دۇيسەنعالييەۆانىڭ ايتۋىنشا، سول كۇنى ليفت ماڭىنا كورشىلەردىڭ ءبارى جينالدى.

"ءبارى شوشىنىپ قالعان. ورىس كەلىنشەك "پوموگيتە" دەپ ايقايلاپ ءجۇردى. بۇل كورىنىستى ءارى قاراي كورۋگە جۇرەگىم داۋالامادى. ەسىكتى جاۋىپ الدىم. قىرسىققاندا، جەدەل جاردەمگە دە ارەڭ حابارلاستىق. ونىڭ ءوزى جەدەل كەلە قويمادى"، - دەدى شىنار دۇيسەنعالييەۆا. 

بالالاردىڭ ءبىرى جەدەل جاردەم جەتكەنشە جان تاپسىرعان. ەكەۋى دە باستان قاتتى سوققى العان، ومىرتقالارى جانە مويىن ومىرتقالارى سىنىپتى. بۇل ۇيلەردەگى جەدەلساتىلارعا الماتىلىق "كاسپيي ليفت" مەكەمەسى جاۋاپتى. اكىمدىكەگىلەر ولاردى تاۋىپ، جاۋاپقا تارتاتىندارىن ايتتى.