الماتى قالاسىندا، مامىر ايىنىڭ 22-24 جۇلدىزدارىندا "The Ritz Carlton" قوناق ۇيىندە XV ەۋرازيالىق مەديا فورۋمى ءوتتى. فورۋمنىڭ تاقىرىبى: "ەۆوليۋسيانىڭ 15 جىلى: قۇبىلمالى دۇنيە جانە بىزگە وزگەرىس اكەلگەن الەم". 
فورۋمنىڭ اشىلۋ ءراسىمىن "RizKhan Productions" كومپانياسىنىڭ باسشىسى، ءباا، پروديۋسەر ريز حان مىرزا جۇرگىزدى. ەۋرازيالىق مەديا فورۋم جۇمىسىنا قاتىسقان الماتى اكىمى باۋىرجان بايبەك ءسوز سويلەدى، دەپ حابارلايدى Qamshy.kz ءتىلشىسى.

الماتى قالاسىنىڭ اكىمى باۋىرجان بايبەك الىپ ءوز قۇتتىقتاۋىندا الەمدەگى كەيبىر ماسەلەلەردىڭ تۋىنداۋىنا فەيك جاڭالىقتاردىڭ اسەرى مول ەكەنىن ايتا كەلىپ، وسى ءبىر تۇيىتكىلدى قۇبىلىستىڭ الدىن-الۋ قاجەت ەكەنىن ەسكەرتتى. قالا باسشىسى فورۋمنىڭ شىعىس پەن باتىستى ورتاق سۇحباتقا شاقىراتىن، اسا ماڭىزدى زاماناۋي اقپارات كەڭىستىگى تۋرالى ماسەلەلەر تالقىلاناتىن الاڭعا اينالعانىن تىلگە تيەك ەتتى.

«مەرەيتويلىق فورۋمنىڭ الماتىدا ءوتىپ جاتقانى ءبىز ءۇشىن ۇلكەن مارتەبە. فورۋم كۇنتىزبەسىندە عالامدىق دامۋدىڭ وزەكتى ماسەلەلەرىن بەلگىلى جۋرناليستەر، ساراپشىلار، ساياساتكەرلەر تالقىلاپ جاتىر»، - دەدى باۋىرجان بايبەك.

قالا اكىمى الماتى قالاسىنىڭ تاۋەلسىزدىكتىڭ التىن بەسىگى ەكەندىگىن ءارى قالانىڭ ەكونوميككالىق الەۋمەتتىك دامۋ كورسەتكىشتەرىن ايتىپ ءوتتى.

ونىڭ ايتۋىنشا، بيىلعى فورۋم  زاماناۋي وركەنيەتتىڭ وزگەرۋى اياسىندا ءوتىپ جاتىر.

«ءبىزدىڭ كوز الدىمىزدا گەوساياسي، ەكونوميكالىق وزگەرىستەر بولىپ جاتىر. وسى ورايدا، سىن قاۋىپ-قاتەرلەردى الدىن الۋ الەمدىك باق-تىڭ بۇگىنگى كەلبەتىنە بايلانىستى. جالعان اقپاراتتار شىنايىلىق پەن جاۋاپكەرشىلىك قاعيدالارىن بۇزۋدا. ب ا ق تەك قانا قوعامدىق پىكىر عانا تۋعىزباۋى كەرەك، ول سونىمەن قاتار ادامداردىڭ بىرەگەيلىگىنە، قوعامدىق قۇندىلىقتارىنا ىقپال ەتۋى قاجەت»، - دەدى باۋىرجان بايبەك.

ايتا كەتۋ كەرەك، الماتىدا XV ەۋرازيالىق مەديا فورۋم ءوز ەسىگىن اشتى.  ورتالىق ازياداعى تاۋەلسىز ديالوگ الاڭى اتالعان ەۋرازيا مەديا فورۋمىنا  60-تان استام ەلدەن 500 دەلەگەت قاتىسۋدا. القالى جيىندا ساراپشىلار مەن ساياساتكەرلەر، ەكونوميستەر مەن قوعامدىق پىكىر يەلەرىنىڭ قاتىسۋىمەن قازاقستاننىڭ، ەۋرازيانىڭ، جالپى الەمدىك قاۋىمداستىقتىڭ ەكونوميكالىق، گەوساياسي، الەۋمەتتىك مادەني ماسەلەلەرىن تالقىلاۋ. فورۋمنىڭ العاشقى كۇنى شەبەرلىك دارىستەرى باستالدى.

اركىم ۇيالى تەلەفونى ارقىلى بۇكىل الەمگە حابار تاراتىپ، مەديا سالاسىنىڭ بەلگىلى وكىلىنە اينالىپ كەتۋى عاجاپ ەمەس. فورۋمنىڭ ءۇش كۇندىك تالقىلاۋىن قورىتىندىلاي كەلە، اقپارات اعىمى دامىعان زاماندا قاراپايىم جۇرتشىلىقتىڭ اقيقات پەن جالعاندى ايىرىپ، وزىنە قاجەتتى تازا اقپاراتتى تابۋى ءۇشىن، مادەنيەتىن كوتەرۋىمىز قاجەت دەگەن بايلامعا كەلدى. 
فورۋمنىڭ سوڭىندا قاتىسقان، وتۋىنە ات سالىسقان بارشا جاندارعا ەستەلىك سىي تاراتىلىپ، قىزىقتى سۋرەتتەرگە ءتۇستى. فورۋمداعى اقپاراتتار كوپتىڭ كوكەيىنە سۇراقتار ۇيالاتىپ، كوپشىلىگىنە مەديا سالاسىندا ساپالى دۇنيە جاساۋعا ءۇمىت سىيلادى. 
الەمدەگى ءار ءتۇرلى ماسەلەلەردى شەشۋگە كەلگەندە اركىمنىڭ پىكىرىنە ىلەسپەي، ءوزىڭنىڭ ىشكى سىبىرىڭا ءۇڭىلۋىڭ قاجەت. ول ىشكى تازالىققا بايلانىستى كورىنىس بەرەدى. ءاربىر اقپاراتتىڭ باستاۋ قاينارىندا تازالىق تۇراتىن بولسا، الەم دە ءوز نۇرىنا، باستاۋ نۇكتەسىنە قايتا ورالاتىنى انىق. ءار ۇلتتان، الەمنىڭ تۇكپىر-تۇكپىرىنەن كەلگەن مەديا سالاسىنىڭ ۇزدىكتەرى ءبىر ءۇيدىڭ بالاسىنداي بولىپ فورۋمدى وتكىزدىك. فورۋم سوڭىندا ءار اداممەن جەكە-جەكە ەستەلىك فوتوسۋرەتتەر جاساپ، پىكىرتالاسىپ، سىرلاسىپ، ويلارىن ورتاعا سالىپ، بولاشاقتا جاقىن دوستار رەتىندە ارالاسۋعا ۋادە بەرىپ تارادى.