الماتىدا دوستىق ۇيىندە اقىن، قازاقستان حالقى اسسامبلەياسىنىڭ مۇشەسى، ەكىنشى دۇنيەجۇزىلىك سوعىسىنىڭ ارداگەرى لەونيد گيرشتىڭ «سوعىس پەن بەيبىتشىلىك تۋرالى ولەڭدەر» اتتى كىتابىنىڭ تۇساۋكەسەرى ءوتتى.
شاراعا قاتىسقان الماتى قالاسى اكىمى ورىنباسارى ارمان قىرىقبايەۆ جيىندا ءسوز الىپ اقىندى كەزەكتى جيناعىنىڭ جارىققا شىعۋىمەن قۇتتىقتادى.
« بۇگىنگى جينالىسىمىزدا ءبىر سيمۆوليكالىق ءمان بار سياقتى. نەگە دەسەڭىز، ءبىز وسى ارقىلى الدىڭعى بۋىن اعالاردى قاستەرلەپ، ولاردىڭ اتقارعان جۇمىسىن اسپەتتەپ كەيىنگى جاستارعا ۇلگى كورسەتەمىز دەپ ويلايمىن. سوناۋ قاندى كۇندەردەرگە ورالىپ، ازاپتى ساتتەردى ەسكە الىپ، ونى قاعازعا ءتۇسىرىپسىز»،-دەدى ول.
جازۋشى، قوعام قايراتكەرى ولجاس سۇلەيمەنوۆ تە شاراعا قوناق بولىپ، اقىن قۋانىشىنا ورتاقتاستى.
«ءسىزدىڭ كىتابىڭىزدى قولىما العانىما وتە قۋانىشتىمىن. وسى جاسىڭىزدا كەزەكتى كىتابىڭىزدى شىعارىپ جاتقانىڭىزعا ريزامىن. ارداگەر، پولكوۆنيك، مايداندا وت كەشكەن ادامنىڭ بۇگىندە جانى شىعارماشىلىق ەنەرگياعا تولى. جولداس پولكوۆنيك، كەزەكتى جەڭىسىڭىز قۇتتى بولسىن!»،-دەدى ولجاس سۇلەيمەنوۆ.
الماتى قالاسىنىڭ قۇرمەتتى ازاماتى، ارداگەر لەونيد گيرش 94 جاستا. ءومىرىنىڭ جارتىسىن اسكەري قىزمەتكە ارناعان ول مايداننان ورالعان سوڭ شىعارماشىلىققا دەن قويادى. زۇلمات زاماننىڭ كورىنىستەرى باياندالعان بىرنەشە جيناعىن جارىققا شىعارادى. «بليزكو ك سەردسۋ»، «ناەدينە س پامياتيۋ»، «پروحلادنىە تراۆى»، «سكۆوز پلاميا ۆوينى» كىتاپتارىنىڭ اۆتورى سوعىس تاقىرىبىندا عانا قالام تەربەيتىنىن باسا ايتتى.
«مەنىڭ بىرنەشە جيناعىم جارىق كوردى. باسقا تاقىرىپتى قوزعامايمىن. تەك سوعىس تۋرالى جازامىن. سەبەبى بۇل مەنىڭ كوز الدىمنان وتكەرىپ، باستان كەشكەنىم. «سوعىس پەن بەيبىتشىلىك تۋرالى ولەڭدەر» اتتى كىتابىم تاڭداۋلى دەگەن جىرلارىمنان تۇرادى. جاستارعا ولەڭدەرىم ارقىلى سوعىستىڭ بەينەسىن بەرە الدىم دەپ ويلايمىن، ەندىگى جاۋاپ وقىرماننان»،-دەدى ارداگەر اقىن لەونيد گيرش.
