الماتى قالاسىندا ون ءتۇرلى ۇلت وكىلدەرى قاتىسقان «قازاقستان ۇلتتارى بىرلىگى» فەستيۆالى ءوتتى.
قازاقستاندىقتار مامىردىڭ ءبىرى كۇنى «قازاقستان ۇلتتارىنىڭ بىرلىگى» كۇنىن تويلايدى. بۇل - ءارتۇرلى ۇلتتار اراسىنداعى دوستاستىق، كەلىسىم مەن ۇيلەسىمدىلىك مەيرامى.
قازاقستاندا ءومىر سۇرەتىن ۇلتتاردىڭ دوستاستىعىن نىعايتۋ ماقساتىندا ۇيىمداستىرىلىپ وتىرعان بۇگىنگى فەستيۆالگە دياسپورا سانىنا وراي ەڭ ءىرى ون ۇلت وكىلى سايىسقا ءتۇستى. الماتى قالاسىنداعى MEGA Park ساۋدا ويىن-ساۋىق ورتالىعىندا ۇيىمداستىرىلعان فەستيۆال بايقاۋىنىڭ ءبىرىنشى بولىمىندە قاتىسۋشىلار ءوز ۇلتىنىڭ ءداستۇرى مەن مادەنيەتىن تانىستىردى. سونداي-اق، ءداستۇرلى ءان مەن بي كورەرمەندەرگە ۇسىنىلدى. ال بايقاۋدىڭ ەكىنشى بولىمىندە تورەشىلەرمەن قاتار كورەرمەندەر دە ءار ۇلتتىڭ ءداستۇرلى تاعامدارىنان ءدام تاتىپ، قولونەر زاتتارىنىڭ كورمەسىن تاماشالادى.
«الماتى قالاسى جاستار ساياساتىن دامىتۋ مەملەكەتتىك قورىنىڭ قولداۋىمەن قازىرگى تاڭدا الىپ قالامىزدا بالالار مەن جاسوسپىرىمدەرگە ارنالعان 42 ويىن-ساۋىق ۇيىمدارى جۇمىس ىستەيدى. وسى ۇيىمدار بىرىگىپ، بۇگىنگى فەتيۆالدى جوعارى دەڭگەيدە وتۋىنە اتسالىستى»، - دەيدى قور ديرەكتورى ءارى فەستيۆال ۇيىمداستىرۋشىسى الما اۋعانبايەۆا.
ونىڭ ايتۋىنشا، قازاقستان ۇلتتارىنىڭ بىرلىگى كۇنىنە وراي وسىنداي فەستيۆالدەردىڭ كوپتەپ ۇيىمداستىرىلۋى دوستاستىقتىڭ ودان ءارى نىعايۋىنا سەپتىگىن تيگىزەدى.
فەستيۆال سوڭىندا تورەشىلەر كورەرمەندەردىڭ باعالاۋىن ەسكەرە وتىرىپ، جەڭىمپازداردى انىقتادى. ءداستۇرلى بي مەن قولونەر ونىمدەرىنىڭ كورمەسى ارقىلى ەرەكشە كوزگە تۇسكەن ۋكراين ۇلتىنىڭ وكىلدەرى جەڭىمپاز اتاندى. ال ەكىنشى ورىندى كارىس ۇلتىنىڭ وكىلدەرى جەڭىپ السا، ءۇشىنشى ورىن وزبەك اعايىنداردىڭ قانجىعاسىنا بايلاندى.
فەستيۆالگە قاتىسقان تۇرىك، ازەربايجان، ورىس، گرەك، تاتار، نەمىس، گرۋزين دياسپورالارىنىڭ وكىلدەرى ماقتاۋ قاعازدارى مەن ارنايى دايىندالعان سىيلىقتارعا يە بولدى.
