بيىلعى مەكتەپ ءبىتىرۋشى تۇلەكتەر اراسىندا 14–18 مامىر ارالىعىندا الماتى قالاسى اكىمدىگىنىڭ قول­داۋىمەن، ءبىلىم باسقارماسىنىڭ ۇيىمداستىرۋىمەن ءمۇعالىم ماماندىعىن تاڭداعان ۇمىتكەرلەرگە قاسىل قاتىقبايەۆا اتىنداعى گرانتتى ۇتىپ الۋعا ارنالعان بايقاۋ وتەدى.

ءدال ءقازىر ءبىزدىڭ قوعامدا ءمۇعالىم ماماندىعىنىڭ مارتەبەسىن كوتەرۋگە باعىتتالعان باستامالار جۇزەگە اسىپ جاتىر. ءمۇعالىم مارتەبەسى تۋرالى «نۇر وتان» پارتياسى دا باستاما كوتەرىپ، ءماجىلىس دەپۋتاتتارى قولداۋ ءبىلدىرىپ جاتقانى بەلگىلى. جالپى، ءمۇعالىمنىڭ مارتەبەسىن كوتەرىپ، مەرەيىن ارتتىرۋ ءۇشىن بارلىق يگىلىكتى ىستەر قولعا الىنىپ، جۇزەگە اسىپ جاتىر. وسى رەتتە ەلىمىزدىڭ وركەن­دەۋىنە زور ۇلەسىن قوسىپ جۇرگەن «Koktem group» كومپانياسىنىڭ باسشىسى، قالالىق ءماسليحات دەپۋتاتى مۇرات ءادىلحان ۇلى تاعى دا ءبىر تاۋەكەلگە بارىپ، ۇلكەن ساۋاپتى ءىستى قولعا الىپ وتىر.

حالقىنا ادال قىزمەت ەتىپ جۇرگەن ازامات ەلدىڭ ەرتەڭى، ونىڭ جارقىن بولاشاعى بۇگىنگى جاس ۇرپاقتىڭ قولىندا ەكەندىگىن تەرەڭ ءتۇسىنىپ، سول وسكەلەڭ ۇرپاقتىڭ تاعدىرى ۇستازداردىڭ قولىندا ەكەندىگىنە اسا ءمان بەرە وتىرىپ، ءمۇعالىم بولام دەگەن تۇلەكتەرگە قولداۋ كورسەتۋدى دە ءوز موينىنا الىپ وتىر. سونىمەن، الماتى قالاسىنداعى ءبىلىم وشاقتارىنىڭ 11-سىنىبىن ءبىتىرىپ، تەك ءمۇعالىم ماماندىعىن تاڭداعان تۇلەكتەر ءۇش كەزەڭ بويىنشا باعىن سىنايتىن بولادى. العاشقى كەزەڭدە ۇمىتكەرلەر وقۋ ساۋاتتىلىعى مەن ماتەماتيكادان تەست تاپسىرسا، ەكىنشى كەزەڭ بويىنشا «مەن تاڭداعان ماماندىق» دەپ اتالاتىن ەسسە جازادى.  «قازاقستاننىڭ دامۋىنا قوساتىن مەنىڭ ۇلەسىم» دەپ اتالاتىن ءۇشىنشى  كەزەڭدە ءوز ويلارىن ورتاعا سالاتىن بولادى.

جوبانى قورعاۋ ءۇشىن 5 مينۋت ۋاقىت بەرىلەدى. بايقاۋعا قاتىسۋشىلارعا وقۋ ساۋاتتىلىعىنان 20 سۇراق، ماتەماتيكادان 20 سۇراق قويىلادى. اقتىق كەزەڭگە 35 جانە ودان جوعارى بالل العاندار وتەدى. بايقاۋدىڭ باس جۇلدەسىن جەڭىپ العان تۇلەككە اباي اتىنداعى قازاق ۇلتتىق پەداگوگيكالىق ۋنيۆەرسيتەتىندە وقۋ ءۇشىن قاتىل قاسىقبايەۆا اتىنداعى گرانت تابىس ەتىلەدى. ءبىرىنشى ورىن 500 000 تەڭگە، ەكىنشى ورىن 300 000 تەڭگە جانە ءۇشىنشى ورىن 200 000 تەڭگە. بارلىق بايقاۋعا قاتىسۋشىلارعا سەرتيفيكاتتار تابىس ەتىلەتىن بولادى.