العاش رەت ورتالىق ازيادا قىزىل كرەست پەن قىزىل جارتى اي قوعامدارىنىڭ ح ەۆروپالىق كونفەرەنسياسى وتۋدە. الماتىداعى 54 ەلدىڭ دەلەگاتتارى قاتىسقان مەرەيءلى فورۋمدى وتكىزۋگە يسپاندىق مادريد قالاسى دا ۇمىتكەر بولاتىن. ءبىراق قىزمەتى ادامگەرشىلىك پەن قايىرىمدىلىقتان قۇرالعان بۇل قوعامنىڭ القالى جيىنىن وتكىزۋ الماتىعا بۇيىردى.
حالىقارالىق كونفەرەنسيانى الماتى قالاسىنىڭ اكىمى باۋىرجان بايبەك اشىپ، مەملەكەت باسشىسىنىڭ قۇتتىقتاۋ ءسوزىن وقىپ بەردى. وندا ەلباسى ۇيىمنىڭ دۇنيە ءجۇزى بويىنشا ورىن الىپ وتىرعان وتكىر ماسەلەلەردى شەشۋدەگى، اسكەري شيەلەنىستەر مەن تابيعي اپاتتار كەزىندە زارداپ شەككەندەرگە دەر كەزىندە كومەك كورسەتۋدەگى جەدەل قىزمەتتەرىن ايىرىقشا اتاپ وتكەن.
«قازاقستان قىزىل كرەست پەن قىزىل جارتى اي قوزعالىسىنا ونىڭ تولىق قۇقىلى قاتىسۋشىسى رەتىندە وراسان كومەك كورسەتۋدە. بۇگىنگى كۇنى بۇۇ قاۋىپسىزدىك كەڭەسىنىڭ تۇراقتى ەمەس مۇشەسى، سونىمەن قاتار استانا پروسەسىنىڭ باستاۋشىسى رەتىندە ەلىمىز بارىنشا جەتىلگەن، ءقاۋىپسىز جانە تۇراقتى بەيبىتشىلىكتى ورنىقتىرۋعا ىقپال ەتۋدە. تەك ءوزارا سەنىمگە، قۇرمەتكە جانە تۇسىنىستىككە نەگىزدەلگەن ءىس-قيمىل عانا بارشا ادامزاتتى باستى ماقساتقا جەتەلەيدى. كونفەرەنسيا قورىتىندىسى بويىنشا قابىلداناتىن الماتى دەكلاراسياسىنىڭ گۋمانيتارلىق داعدارىستاردى جەڭۋءدىڭ جانە كومەك پەن قولداۋعا ءزارۋ جانداردىڭ ءومىرىن جاقسارتۋدىڭ ءتيىمدى جولدارىن ىزدەستىرۋگە ماڭىزدى ۇلەس قوساتىنىنا سەنىمدىمىن»، – دەلىنگەن مەملەكەت باسشىسىنىڭ قۇتتىقتاۋ سوزىندە.
كونفەرەنسيا بارىسىندا باۋىرجان بايبەك وقيعالى ءتۋريزمدى دامىتا وتىرىپ، الماتىنىڭ ىسكەرلىك كەلىسسوزدەر مەن حالىقارالىق بيزنەس-كەزدەسۋلەردىڭ باس قوسۋ الاڭىنا اينالىپ وتىرعانىن اتاپ ءوتتى. تەك بيىلدىڭ وزىندە مەگاپوليستە ەىدۇ-نىڭ «ەۋرازيا اپتالىعى»، تمد ەلدەرى ۇكىمەت باسشىلارىنىڭ قاتىسۋىمەن سيفرلاندىرۋ فورۋمى ءوتتى. ال كۇزدە ءبىرقاتار ايتۋلى حالىقارالىق شارالار، سونىڭ ىشىندە دۇنيەجۇزىلىك دەنساۋلىق ساقتاۋ ۇيىمىنىڭ الماتى دەكلاراسياسىنىڭ 40 جىلدىعىنا جانە ەۋروپاداعى «سالاۋاتتى قالالار» جەلىسىنىڭ 30 جىلدىعىنا ارنالعان كونفەرەنسيالار وتپەك.
«ەلىمىز تاۋەلسىزدىك العاننان باستاپ ەلباسى نۇرسۇلتان نازاربايەۆتىڭ باسشىلىعىمەن كوپەتنوستى قازاقستان حالقى بەيبىتشىلىك پەن تۇراقتىلىقتى جانە قارقىندى ەكونوميكالىق دامۋدى تاڭدادى. بۇگىنگى تاڭدا قازاقستان – تاۋلى قاراباح پەن تاجىكستاننان باستاپ يران مەن سيرياعا دەيىنگى تۇيتكىلدى ماسەلەلەر مەن داۋلى كيكىلجىڭدەردى شەشۋ ماسەلەسىندە مەدياتور رەتىندە تانىلعان ەۋرازيالىق بىردەن-بىر مەملەكەت. سوڭعى جىلداردىڭ وزىندە يسلام كونفەرەنسياسى مەن ەۋروپاداعى قاۋىپسىزدىك جانە ىنتىماقتاستىق ۇيىمدارىنا تابىستى ءتوراعالىق ەتتى. ءبىز وسى كۇزدە بىرىككەن ۇلتتار ۇيىمىمەن بىرلەسە وتىرىپ، وڭىرلىك حاب اشاتىن بولامىز. العاشقى كەزەڭدە مۇندا 20-عا جۋىق حالىقارالىق ۇيىمدار مەن اگەنتتىكتەر جۇمىس ىستەيدى دەپ كۇتىلۋدە»، – دەدى باۋىرجان بايبەك ءوز سوزىندە.
ءوز كەزەگىندە قىزىل كرەست پەن قىزىل جارتى اي حالىقرالىق فەدەراسياسىنىڭ پرەزيدەنتى فرانچەسكو روككا الماتى دەكلاراسياسىنىڭ الداعى ءتورت جىلدا ۇيىم ءۇشىن باسشىلىققا الاتىن باستى قۇجاتتاردىڭ بىرىنە اينالاتىنىن ايتتى. سوڭعى رەت مۇنداي دەكلاراسيا 2014 جىلى يتالياندىق فلورەنسيادا قابىلدانعان ەدى.
«17 ميلليوننان استام ەرىكتىلەردىڭ جۇمىسى ارقاسىندا ءبىز الەمدەگى ءىرى گۋمانيتارلىق جۇيە بولىپ تابىلامىز. دەگەنمەن، ءبىزدىڭ باستامالارىمىزدىڭ جەمىستى بولۋى جەرگىلىكتى جەرلەردەگى جۇمىس پەن ونىڭ ساپاسىنا تىكەلەي قاتىستى. ءبىزدىڭ ۇيىمنىڭ جۇمىسىن جوعارى باعالاعان قازاقستانعا ەرەكشە العىس بىلدىرەمىز»، – دەپ قورىتىندىلادى ءسوزىن فرانچەسكو روككا. كونفەرەنسيا ءوز جۇمىسىن جالعاستىرۋدا. ونىڭ جۇمىس قورىتىندىسى بويىنشا «الماتى ۇندەۋى» دەكلاراسياسى قابىلدانباق.
پىكىر قالدىرۋ