جامبىل اتىنداعى قازاق مەم­لەكەتتىك فيلارمونياسىندا رەسەيدىڭ ەڭبەك سىڭىرگەن ءارتىسى، تاتارستاننىڭ حالىق ءارتىسى احمەد اگادي مەن ق ر ەڭبەك سىڭىرگەن قايراتكەرى، اباي اتىنداعى قازاق مەملەكەتتىك اكادە­ميالىق وپەرا جانە بالەت تەاترىنىڭ ءسوليسى گۇلزات داۋىربايەۆانىڭ «ءوز ەلىم» اتتى كونسەرتتىك كەشى ءوتتى. سازدى كەشتە ساحنانىڭ ءسانىن كىرگىزگەن بەلگىلى انشىلەر ن.تىلەندييەۆ اتىنداعى مەملەكەتتىك اكادەميالىق فولكلور­لى-ەتنوگرافيالىق «وتىرار سازى» وركەسترىنىڭ سۇيەمەلدەۋىمەن ونەر كورسەتتى. وركەسترگە ق ر ەڭبەك سىڭىرگەن قايراتكەرى ءدىنزۋحرا تىلەندييەۆا مەن ديريجەر، ق ر ەڭبەك سىڭىرگەن قايرات­كەرى ءمۇسىلىم امزە جەتەكشىلىك ەتتى. كونسەرتتە انشىلەر قازاقتىڭ حالىق اندەرىمەن قاتار، قازاقستاندىق جانە شەتەلدىك كومپوزي­تورلاردىڭ جۇرتشى­لىقتىڭ جۇرەگىنە جول تاپقان مۋزى­كالىق شىعارمالارىن تىڭدارمانعا تارتۋ ەتتى.

– بۇل كونسەرت «رۋحاني جاڭعىرۋ» باعدارلاماسى اياسىندا ءوتتى. ن.تىلەن­دييەۆ اتىنداعى مەملەكەتتىك اكادە­ميالىق فولكلورلى-ەتنوگرافيالىق «وتىرار سازى» وركەسترى الەمگە ايگىلى انشىلەرمەن بىرگە ونەر كورسەتىپ، كونسەرت ۇيىم­داستىرۋدى جوسپارلاپ جۇرگەن بولاتىن. وسى ويىمىزدى جۇزەگە اسىرۋ ماقساتىندا دۇنيە جۇزىنە بەلگىلى ساحنالاردا اتاقتى ديريجەرلارمەن ونەر كورسەتىپ جۇرگەن وپەرا ءانشىسى احمەد اگاديمەن بىرگە كونسەرت وتكىزۋدى ءجون كوردىك. ونەردە بيىك شىڭداردى باعىندىرعان، تالانتىمەن تالايدى تامساندىرعان تانىمال ءانشى قاسيەتتى قازاق توپىراعىندا تۋىپ-وسكەن دارىن يەسى. الەمدىك ساحنالاردا ونەر كورسەتىپ جۇرگەن جۇلدىزدارمەن شىعارما­شىلىق بايلانىستا بولۋ وركەسترىمىز ءۇشىن ۇلكەن قۋانىش، – دەدى ق ر ەڭبەك ءسىڭىر­گەن قايراتكەرى ءمۇسىلىم امزە.

سازدى كەشتىڭ ءقادىرلى قوناعى بولعان وپەرا ءانشىسى احمەد اگادي – ماريين تەاترى­نىڭ جانە تاتار­ستاننىڭ مۇسا ءجاليل اتىنداعى مەم­لەكەتتىك وپەرا جانە بالەت تەاترىنىڭ ءسوليسى، تاتارستان مەملەكەتتىك سىيلىعىنىڭ لاۋرەاتى. 2008 جىلى «اقىن ماحابباتى» سپەكتاكلىندەگى عابدوللا توقاي بەينەسى ءۇشىن «زولو­تايا ماسكا» ۇلتتىق تەاتر سىيلىعى­نىڭ «وپەراداعى ۇزدىك كەيىپكەر» جۇلدەسىن جەڭىپ العان. الەمنىڭ ايگىلى ساحنا­لارىندا ءان شىرقاپ جۇرگەن وپەرا ءانشىسى قازاق ساحنا­سىندا ونەر كورسەتۋدى ارماندا­عانىن ايتتى.  – بۇل مەنىڭ قازاق ساحناسىندا العاش رەت ونەر كورسەتۋىم ەمەس. وسىدان بىرنەشە جىل بۇرىن استانا مەن الما­تىنىڭ وپەرا تەاترلارىندا ونەر كورسەتكەن ەدىم. مەن نەگىزى شىمكەنت وبلىسى، العاباس اۋدانى، جىلاندى اۋىلىندا دۇنيەگە كەلدىم. ەسىمدى بىلگەن ساتتەن باستاپ قازاق تىلىندە سويلەدىم. قازاق مەكتەبىندە ءبىلىم الدىم. 37 جىلدان بەرى دۇنيە­جۇزىلىك ساحنالاردا ونەر كورسەتىپ جۇرسەم دە قازاق ءتىلىن ۇمىتقان جوقپىن. اعايىن-تۋىس­قاندارىم، جاقىن دوستارىم شىم­كەنتتە تۇراتىن­دىقتان، جىل سايىن جازدا شىم قالاعا بارۋعا اسىعامىن. شارتاراپتى شارلاپ جۇرسەڭ دە، كىندىك قانىڭ تامعان تۋعان جەرىڭدى ءبارىبىر ساعىنادى ەكەنسىڭ. قازاق ساحناسىندا ونەر كورسەتۋدى ارمان­داعان ەدىم. قازاقستاندا تۋىلعان­دىقتان، قازاقتىڭ حالىق اندەرىن ايتقىم كەلدى. تۋعان جەرىمنىڭ كيەلى ساحناسىندا ونەر كورسەتۋ مەن ءۇشىن ۇلكەن باقىت! – دەدى تاتارستاننىڭ حالىق ءارتىسى احمەد اگادي.