قىتايداعى ەتنيكالىق قازاقتاردىڭ قاتتى قىسىمعا ۇشىراپ جاتقانى تۋرالى اقپارات كوپ جاريالانىپ جاتىر. جۋىردا Qamshy.kz اقپارات اگەنتتىگى قازاقستانداعى وتباسىنا جەتۋ ءۇشىن شەكارانى امالسىزدان زاڭسىز كەسىپ وتكەن سايراگۇل ساۋىتبايدىڭ ماسەلەسىنە قاتىستى ق ر ۇقك شەكارا قىزمەتىنە ساۋال جولداعان بولاتىن. 

مىنە، سەڭ قوزعالىپ، اتالعان ماسەلە مەملەكەتارالىق دەڭگەيدە تالقىلانا باستادى. بەيجىڭدە وتكەن كەزەكتى قازاقستان-قىتاي كونسۋلتاسياسىندا قىتايداعى ەتنيكالىق قازاقتاردىڭ جاعدايىنا قاتىستى ماسەلە قوزعالدى، دەپ حابارلايدى Qamshy.kz اقپارات اگەنتتىگى ق ر ءسىم باسپا ءسوز قىزمەتىنە سىلتەمە جاساپ. 

قازاقستان دەلەگاسياسىن سىرتقى ىستەر مينيسترلىگى كونسۋلدىق قىزمەت دەپارتامەنتىنىڭ ديرەكتورى ارداق مادييەۆ، ال جۇڭگو دەلەگاسياسىن سىرتقى ىستەر مينيسترلىگى كونسۋلدىق دەپارتامەنتىنىڭ ديرەكتورى گو شاوچۋن باسقاردى.

تاراپتار كونسۋلدىق سالاداعى مەملەكەتتەر اراسىنداعى ىنتىمىقتاستىق پەن ازاماتتاردىڭ قۇقىقتارىنا قاتىستى كەلىسسوزدەر جۇرگىزدى.

قازاقستاننىڭ جۇمىس توبى سوڭعى كەزدەرى ەلىمىزدە قىزۋ تالقىعا ءتۇسىپ جاتقان قىتايدان قازاقستانعا قونىس اۋدارعان جانە قازاقستان رەسپۋبليكاسىنىڭ ازاماتتىعىن العان ەتنيكالىق قازاقتاردىڭ جاعدايىنا قاتىستى ماسەلەنى قوزعادى.

"قىتايدا قوس ازاماتتىق ءۇشىن ۇستالعان ەتنيكالىق قازاقتاردىڭ ىستەرىن وبەكتيۆتى جانە ءادىل قاراۋ مەن ولاردى بوساتۋ تۋرالى تاباندى تىلەك ايتىلدى. قىتايدىڭ شىڭجاڭ-ۇيعىر اۆتونوميالىق ايماعىنداعى ەتنيكالىق قازاقتاردىڭ ماسەلەلەرىن شەشۋدىڭ ورتاق امالىن ويلاستىرۋعا ۋاعدالاستى"، - دەلىنگەن ق ر ءسىم باسپا ءسوز قىزمەتى ۇسىنعان حابارلامادا.