بوستاندىق اۋدانىندا جوسپارلى سەيسموجاتتىعۋ بولىپ ءوتتى. وعان توتەنشە جاعدايلار دەپارتامەنتىنىڭ ازاماتتىق قورعاۋ قىزمەتتەرى، دەنساۋلىق ساقتاۋ جانە ءبىلىم بەرۋ مەكەمەلەرىنىڭ وكىلدەرى قاتىستى.

تاڭعى ساعات 9.30-دا پاترۋلدىك پولي­سيا اۆتوكولىگىنىڭ داۋىس ۇدەتكىشىمەن «نازار اۋدارىڭىزدار!» دەگەن حابار بەرىلدى. قالالىق توتەنشە جاعدايلار دەپارتامەنتى وكىلدەرىنىڭ ايتۋىنشا، وسى حابارلامانى ەستىگەن كەز-كەلگەن ادام سول ساتتە تۇرعان جەرىندەگى جارىقتى، كوگىلدىر وتىندى جانە سۋدى ءوشىرۋى ءتيىس. سودان كەيىن بۇرىننان دايىن تۇرعان، ىشىنە اۋاداي قاجەتتى زاتتار، قۇجاتتار جانە ازىق-تۇلىك سالىنعان سومكەنى الىپ سىرتقا شىعۋ كەرەك. سوسىن اينا­لاعا بەي-جاي قاراماي، جاسى ۇلكەن كىسىلەرگە، سىرقات جاندارعا كومەكتەسكەن ابزال. توتەنشە جاعدايدا شاراسىزدىق تانىتپاي، نەعۇرلىم سەرگەك بولىپ، اشىق الاڭقايدى قولايلاۋ كەرەك.

قالا اكىمى تۇرعىنداردىڭ وسىنداي توتەنشە جاعدايلارعا ۇنەمى دايىن بولۋى ءۇشىن ءاقپاراتتىق-تۇسىندىرۋ قاعازدارىن بارلىق تۇرعىن ۇيلەرگە، عيماراتتارعا تاراتۋ جۇمىستارىن كۇشەيتۋدى تاپسىرعان بولاتىن. شاھار باسشىسى اسىرەسە، بالالار مەن جاستار اراسىندا ءتۇسىندىرۋ ءىس-شارالارىن نىعايتۋدى مىندەتتەدى.

كەزەكتى سەيسموجاتتىعۋ كەزىندە قالالىق قۇتقارۋ قىزمەتىنىڭ كومەگىمەن №93 جالپى ءبىلىم بەرەتىن مەكتەپتىڭ الاڭىنا جىلجى­مالى مەديسينالىق قوسىن جانە ازىق-تۇلىك، كيىم-كەشەكتەرمەن جابدىقتالعان شاتىر قۇرىلدى.

مۇنداي جاتتىعۋلار شاھاردا ايىنا ءبىر رەت ءوتىپ تۇرادى.