شاھار كوشەلەرىندە  زاڭسىز ورناتىلعان 1632 دۇڭگىرشەك بارى انىقتالعان. ولاردىڭ 1510ء-ى تولىعىمەن بۇزىلسا، 17 دۇڭگىرشەكتى الىپ تاستاۋ جۇمىسى 1 شىلدەگە دەيىن اياقتالماق. ال ساۋدا ورتالىقتارى مەن بازارلاردىڭ اۋماقتارىندا ورنالاسقان قالعان 105 نىساننىڭ يەلەرىمەن دۇڭگىر­شەكتەردى جاڭارتۋ نەمەسە الىپ تاستاۋ بويىنشا كەلىسسوزدەر جۇرگىزىلۋدە.

بۇل تۋرالى وڭىرلىك كوممۋنيكاسيالار قىزمەتى الاڭىندا قالالىق كاسىپكەرلىك جانە يندۋستريالدى-يننوۆاسيالىق دامۋ باسقارماسىنىڭ باسشىسى ماقسات قيقى­موۆ­پەن وتكەن بريفينگتە بەلگىلى بولدى.

دۇڭگىرشەكتەردى بۇزباس بۇرىن قالاداعى اۋداندىق اكىمدىكتەر دۇڭگىرشەك يەلەرىمەن ولاردىڭ ارەكەتىنىڭ زاڭسىزدىعى تۋرالى ءتۇسىندىرۋ جۇمىستارىن جۇرگىزگەن. سەبەبى، اتالعان ستاسيونارلىق ەمەس ساۋدا نىسان­دا­رىنىڭ قۇقىعىن بەلگىلەيتىن قۇجاتتارى بولماعان ءارى قالانى كورىكتەندىرۋ قاعيدا­لارىنا، ءورت ءسوندىرۋ، سانيتارلىق-ەپيدە­ميولوگيالىق جانە قاۋىپسىزدىك تالاپتا­رىنا ساي كەلمەگەن.

دەگەنمەن، زاڭدى تۇردە ورناتىلعان دۇڭگىرشەكتەر دە جوق ەمەس. الايدا، ولاردىڭ جالعا الۋ مەرزىمىنىڭ وتۋىنە بايلانىستى سۇرىلگەن. جالپى العاندا، قالا كوشەلە­رىندەگى 386 ءدۇڭ­گىرشەك زاڭدى تۇردە جۇمىس ىستەگەن. وتكەن جىلى ولاردىڭ 264ء-ى الىنىپ تاستالسا، قال­عان 122 نىساننىڭ 44 دۇڭگىر­شەگىنىڭ جالعا الۋ مەرزىمى جىل سوڭىنا دەيىن بەلگى­لەنگەن. ال 71 دۇڭگىر­شەكتىڭ مەرزىمى 2019–2025 جىلدارى اياقتالسا، 7 دۇڭگىرشەك جەكە اۋماقتاردا ورنالاسقان.

ستاسيونارلى ەمەس ساۋدا نىساندارىن «كولەڭكەدەن» شىعارۋدىڭ ماڭىزى مەن اتال­عان باسقارمانىڭ وتكەن جىلعى جۇمى­سىن قورى­تىن­دىلاعان باسقارما باسشىسى كاسىپكەر­لىكتەن تۇسكەن پايدا مەن جاڭادان اشىلعان جۇ­مىس ورىندارى جايلى دا ەسەپ بەردى.

بۇگىندە الماتىدا 240 مىڭنان استام شاعىن جانە ورتا بيزنەس سۋبەكتىلەرى تىركەلگەن. وتكەن جىلى ولاردىڭ سانى 5،7%-عا كوبەيىپ، 170 مىڭ ادامدى قۇراعان.