اقپارات جانە كوممۋنيكاسيا ءمينيسترى داۋرەن ابايەۆ «رۋحاني جاڭعىرۋ» باعدارلاماسىنىڭ لوگوتيپى اياسىندا تۋعان داۋعا بايلانىستى پىكىر ءبىلدىردى.
ابايەۆتىڭ ايتۋىنشا، بۇل اقپارات ءوزى ءۇشىن كۇتپەگەن جاعداي بولعان.
«ءبىز ءبارىن تەكسەرىپ، انىقتايمىز، كەيىن سىزدەرگە ايتامىز. ءيا، لوگوتيپتە ايتارلىقتاي ۇقساستىق بار، ءبىراق اڭگىمە پلاگياتتا ەمەس دەپ ويلايمىن. مۇنىمەن جەكە اينالىسامىز»، - دەدى مينيستر.
ايتا كەتەيىك، جەلى قولدانۋشىلارى "رۋحاني جاڭعىرۋ" مەملەكەتتىك باعدارلاماسىنىڭ لوگوگتيپىنىڭ ءتۇپنۇسقا ەكەندىگىنە كۇمان كەلتىردى. Facebook بەلسەندىلەرى مەملەكەتتىك باعدارلامانىڭ لوگوتيپىن ءتۇرلى تۇستەردەن جاسالعان موزايكاداعى بۇركىت بەينەسىندەگى فرانسيالىق ۇيىمنىڭ سۋرەتىنە ۇقساس دەگەن پىكىر ايتىپ جاتىر.
