قوعامدىق دەنساۋلىقتى قورعاۋ كوميتەتىنىڭ ءتوراعاسى – قازاقستاننىڭ باس سانيتارلىق دارىگەرى جانداربەك بەكشين قاراعاندىدا اۋىزاشاردا ۋلانعانداردىڭ جاعدايى تۋرالى ايتتى.

بەكشيننىڭ ايتۋىنشا، 30-عا تارتا ادامدى اۋىزاشارعا شاقىرعان ءۇي يەلەرى ازىق-تۇلىكتى ساقتاماعان. قوناق كۇتۋگە بىرنەشە كۇن بۇرىن دايىندالعاندىقتان تاتتىلەردى سالقىن جەرگە قويماعان. ال تاڭەرتەڭ پىسكەن ەت كەشكى توعىزعا دەيىن تۇرعان. دارىگەر وسىنداي سەبەپتەردىڭ سالدارىنان قوناقتار ۋلانعان بولۋى مۇمكىن دەيدى.

ءارى تەكسەرىس كەزىندە پىسىرىلگەن ەتتىڭ ءتۇسى جاسىل، ءيىسى جاعىمسىز بولعان كورىنەدى. 

اۋرۋحاناعا 20 ادام تۇسكەن ەكەن، ونىڭ تورتەۋى - بالالار. دارىگەردىڭ ايتۋنىشا، ناۋقاستارعا قاتىستى ءتيىستى شارالار قولدانىلىپ جاتىر. 

ايتا كەتەيىك، قاراعاندىدا وسىدان ءۇش كۇن بۇرىن اۋىزاشارعا بارعاندار بۇگىندە اۋرۋحانا توسەگىندە جاتىر. بارلىعى دا سول وتىرىستان كەيىن وزدەرىن جايسىز سەزىنىپتى. ەرەسەكتەردىڭ اعزاسى العاشىندا سىر بەرمەسە، كىشكەنتاي بالالاردىڭ بىردەن ءىشى ءوتىپ، ىستىعى كوتەرىلگەن. جانساقتاۋ بولىمىندە جاتقان كىشكەنە بالالاردىڭ جاعدايى تۇراقتى تۇردە اۋىر دەپ باعالانىپ وتىر. بارىنە تيىسىنشە ەم-دوم جاسالىپ جاتىر ەكەن.