29 جاستاعى ەر ادام ۇيلەنۋ ءۇشىن الىپ قاشقان قىزدى قىرعىزستانداعى پوليسيا بولىمشەسىندە پىشاقتاپ ولتىرگەن. بۇل تۋرالى شۋ وبلىسى ىشكى ىستەر باسقارماسىنىڭ باسپا ءسوز قىزمەتى حابارلادى.
پوليسياعا قىزدىڭ ۇرلانعانى تۋرالى اقپارات 27 مامىردا ساعات 22:00-دە كەلىپ تۇسكەن. ارادا ءبىراز ۋاقىت وتكەن سوڭ جول قاۋىپسىزدىگىن ساقتاۋ قىزمەتكەرلەرى Subaru Outback ماركالى اۆتوكولىگىن شۋ وبلىسىنداعى سوسنوۆكا اۋىلىندا توقتاتقان. اۆتوكولىك رولىندە 29 جاستاعى ب.د ازاماتى وتىرعان. كولىكتە تاعى ەكى جولاۋشى: 30 جاستاعى س.ا مەن 20 جاستاعى قىز وتىرعان. بارلىعىن ارنايى پوليسيا قىزمەتكەرلەرى شۋ وبلىسىنىڭ ءىىو-عا جەتكىزگەن.
بەلگىلى بولعانداي، 20 جاستاعى قالىڭدىق ازاماتتاردى قابىلداۋ بولىمشەسىندە وتىرعاندا ب.م كەلىپ ەسىكتى ىشتەن بىتەپ الىپ، جانجال شىعارعان. ناتيجەسىندە ول قىزدى پىشاقتاپ، ءوزى دە دەنە جاراقاتىن العان. ەكەۋى دە بىردەي اۋرۋحاناعا جەتكىزىلىپ، جاس قىز جانساقتاۋ بولىمىندە كوز جۇمعان. ال 29 جاستاعى كۇدىكتى ءالى اۋرۋحانادا ەكەن. ەكىنشى جولاۋشى 30 جاستاعى س.ا تەرگەۋگە الىندى. وقيعاعا قاتىستى قىلمىستىق ءىس قوزعالعان.
