وڭتۇستىك قازاقستان وبلىسىنداعى 1038 ءبىلىم ۇيىمىندا «ەل جۇرەگى – استانا» اتتى سالتاناتتى سوڭعى قوڭىراۋ شاراسى ءوتتى. اتالعان مەكتەپتەردەن بۇگىن 33766 وقۋشى تۇلەپ ۇشتى. بولاشاققا قادام باسقان ءبىتىرۋشى تۇلەكتەردى قۇتتىقتاۋ ءۇشىن وبلىس اكىمى جانسەيىت تۇيمەبايەۆ حيميا بيولوگيا باعىتىنداعى ن.نازاربايەۆ زياتكەرلىك مەكتەبىنىڭ سوڭعى قوڭىراۋ شاراسىنا قاتىستى.
سالتاناتتى جيىندا ءسوز العان ءوڭىر باسشىسى بارشا وڭتۇستىكقازاقستاندىق مەكتەپ ءبىتىرۋشى تۇلەكتەردى قۇتتىقتاپ، داڭعىل جولعا قادام باسقان بولاشاق ازاماتتارعا اق جول تىلەدى.
«سىزدەر ەلباسى ارمانداعان «ماڭگىلىك ەل» - يدەياسىنىڭ قۇرىلىسشىلارى ەكەندەرىڭىزدى ەشۋاقىتتا ەستەن شىعارماڭىزدار. ەلباسى ءوزىنىڭ حالىققا جولداۋىندا جاستاردى ءبىلىمدى، ەڭبەكقور، باستاماشىل، بەلسەندى بولۋعا جاس كەزىنەن باستاپ داعدىلانۋىن باستى نازارعا الدى. مەملەكەت جۇزەگە اسىرىپ جاتقان تۇبەگەيلى رەفورمالار مەن اتقارىپ جاتقان قىرۋار ىستەردىڭ ءبارى سىزدەر ءۇشىن جاسالىنۋدا»، - دەدى جانسەيىت تۇيمەبايەۆ.
سونىمەن قاتار، ايماق باسشىسى «نازاربايەۆ زياتكەرلىك مەكتەپتەرى» دەربەس ءبىلىم بەرۋ ۇيىمى زياتكەر ۇرپاقتى تاربيەلەۋدە تەك مەكتەپ قابىرعاسىمەن شەكتەلمەي، ءبىلىم بەرۋدەگى ۇزدىك تاجىريبەلەرى مەن جوبالارىن قالا، وبلىس، رەسپۋبليكا كولەمىنە تاراتۋدا كەڭىنەن اتسالىسىپ جاتقانىنا توقتالدى.
بۇدان وزگە، وبلىس باسشىسى مەكتەپ كىتاپحاناسىنىڭ قورىنا «جاھان تانىعان جەتى تۇلعا»، «تۇركىتانۋدىڭ تاريحي-لينگۆيستيكالىق نەگىزدەرى» اتتى تۋىندىلاردى تارتۋ ەتتى. سونداي-اق، ۇرپاق تاربيەسى ءۇشىن تەر توگىپ جۇرگەن ءبىرقاتار ۇستازداردى ماراپاتتادى.
ايتا كەتەرلىگى، بيىل 12 جىلدىق ءبىلىم جۇيەسىمەن وقىعان وقۋشىلاردىڭ العاشقى تۇلەكتەرى مەكتەپ ءبىتىردى. اعىمداعى جىلعى وقۋ جىلىندا حيميا –بيولوگيا باعىتىنداعى نازاربايەۆ زياتكەرلىك مەكتەبىن 97 تۇلەك اياقتادى. ولاردىڭ 30-دان استامى شەتەلدىك جوو-نا قۇجات تاپسىرىپ، قازىرگى تاڭدا 17 تۇلەك تەگىن وقۋ گرانتىنا يە بولعان. بۇل الەمدىك رەيتينگتىڭ ۇزدىك 100 ۋنيۆەرسيتەتىنە كىرەتىن امەريكا، گەرمانيا، كورەيا، جۇڭگو، رەسەي، كانادا ەلدەرىنىڭ جوعارى وقۋ ورىندارى.
جالپى بيىلعى وقۋ جىلىندا وڭىرىمىزدەگى 1038 مەكتەپتە 634 مىڭعا جۋىق وقۋشى ءبىلىم الدى. ونىڭ ىشىندە 33766 وقۋشى مەكتەپتى بيىل بىتىرەدى. رەسپۋبليكاداعى ءبىتىرۋشى 147 مىڭنان اسا وقۋشىنىڭ ءاربىر بەسىنشىسى وڭتۇستىك ءوڭىرىنىڭ تۇلەگى.
