بالالاردى قورعاۋ كۇنىنىڭ قارساڭىندا «جاس وتان» جاستار قاناتىنىڭ بەلسەندىلەرى «قاسيەتتى جول» وڭالتۋ ورتالىعىنىڭ بالالارىنا مەرەكەلىك كوڭىل كۇي سىيلاپ قايتتى.

ءقازىر ورتالىقتا سال اۋرۋىنا (بسپ) شالدىققان 3-15 جاس ارالىعىنداعى 50 بالا ەم الۋدا. جاستار بالالار جاقسى كورەتىن كەيىپكەرلەردىڭ بەينەسىندە كەلىپ، ولارمەن بي بيلەپ، سىيلىقتار تابىستادى. ورتالىق ەمدەلۋشىلەرى عانا ەمەس، ولاردىڭ اتا-انالارى دا مەرەكەلىك كوڭىل كۇيگە ەنىپ، بالالارىمەن بىرگە بي بيلەپ، ولاردىڭ كوڭىلدى ۋاقىت وتكىزۋلەرىنە جاعداي جاسادى.

ال بۇگىن 12 جاسقا تولىپ جاتقان بەكبولات ءۇشىن بۇل ەسىندە قالاتىن تۋعان كۇنى بولدى. بالالار مەن اتا-انالارى، ورتالىق قىزمەتكەرلەرى مەن قوناقتار دا بەكبولاتتى ەرەكشە ىقىلاسپەن ورتاعا شاقىرىپ، تۋعان كۇنىمەن قۇتتىقتاپ، تەزىرەك ساۋىعىپ كەتۋىن تىلەدى.

ورتالىققا ەمدەلۋگە كەلگەن اتا-انالاردىڭ ءبىرى مەرەكەنى «بۇگىن بالالارعا سىيلاعان كەرەمەت كوڭىل كۇي ءۇشىن العىس ايتامىن. جاستارعا جۇمىستارىندا ساتتىلىك، تابىس تىلەيمىن. قاسيەتتى رامازان ايىندا تىلەكتەرىمىز قابىل بولسىن. بالالارىمىز اۋىرماسىن. ورتالىقتىڭ قىزمەتكەرلەرىنە ەرەكشە راحمەت ايتقىم كەلەدى» دەگەن سوزدەرىمەن اياقتادى.

وڭالتۋ ورتالىعىنا بالالار ەمدەلۋگە استانا قالاسىنان عانا ەمەس، قاراعاندى، تالدىقورعان، تارباعاتاي، ەكىباستۇز قالالارىنان دا كەلگەن. ماماندار ەلىمىزدە سەرەبرالدى سال اۋرۋىن ەڭ كەڭ تارالعان اۋرۋلاردىڭ بىرىنە جاتقىزدى. وسى دياگنوز قويىلعان بالالار جىلىنا كەمىندە 3-4 رەت ەم قابىلداۋلارى كەرەك ەكەن. ورتالىقتىڭ اشىلۋىنا «سامۇرىق-قازىنا» ۇلتتىق ءال-اۋقات» قورى»-مەن قاتار، «نۇر وتان» پارتياسى دا قولداۋ بىلدىرگەن.