KADEX-تەگى قايعىلى وقيعا تۋرالى قورعانىس جانە اەروعارىش ونەركاسىبى ءمينيسترى بەيبىت اتامقۇلوۆ ءماجىلىس ۇزىلىسىندە ايتتى.

ءمينيستردىڭ سوزىنشە، كورمە اۋلاسىندا باسىنا ستەند قۇلاپ قايتىس بولعان ەر ادامعا بايلانىستى تەرگەۋ جۇمىستارى جالعاسىپ جاتىر.

«ول كۇن كەلۋشىلەرگە ارنالماعان ەدى. ارنايى ماماندار عانا ءجۇردى، ولار پاۆيلوننىڭ ىشىندە بولدى. ەر ادام قايعىلى وقيعا بولعان كۇنى ورتالىق قاقپا ارقىلى كىرمەگەن، ءوتۋ پۋنكتىنە تىركەلمەگەن. نە سەبەپتى جانە قاي ەسىك ارقىلى كىرگەنى بەلگىسىز. ءوزىمىز دە جاۋابىن بىلمەيمىز»، - دەدى بەيبىت اتامقۇلوۆ.

تەرگەۋ ورگاندارى ەر ادامنىڭ اۋلاعا قالاي وتكەنىن انىقتاپ جاتىر.

«بۇل – كۇردەلى سۇراق، مەن ازىرگە ايتا المايتىن ماسەلەلەر بار. سايكەس كەلمەيتىن قۇجاتتارمەن سوندا بولعانىنا ول ازاماتتىڭ ءوزى كىنالى. ادامنىڭ باسىنان ءتۇرلى جاعدايلار وتەدى»، - دەدى بەيبىت اتامقۇلوۆ.

ايتا كەتەيىك، 24 مامىردا KADEح-2018 حالىقارالىق كورمەسىندە اقپاراتتىق ستەند قۇلاعان كەزدە جاراقات العان ەر ادام اۋرۋحانادا كوز جۇمدى. مينيسترلىكتىڭ مالىمەتىنشە، زارداپ شەككەن ازاماتقا كورمەدە كەزەكشىلىكتە بولعان جەدەل جاردەم بريگاداسى دەر كەزىندە مەديسينالىق كومەك بەرگەن. 

كەيىن زارداپ شەگۋشى اۋرۋحاناعا جاتقىزىلدى. اۋرۋحاناعا اپارا جاتقاندا ەسىن بىلەتىن، جاعدايى ءبىر قالىپتى بولدى. الايدا مەديسينالىق مەكەمەدە ءحالى كۇرت ناشارلاپ، دارىگەرلەر ونىڭ ومىرىنە اراشا تۇسە المادى.