استانا قالاسىندا، اقمولا، قوستاناي جانە سولتۇستىك قازاقستان وبلىستارىندا اۋا رايىنا بايلانىستى ەسكەرتۋ جاريالاندى، دەپ حابارلايدى Qamshy.kz اقپارات اگەنتتىگى قازگيدرومەتكە سىلتەمە جاساپ.

«1 ماۋسىم كۇنى تۇندە اقمولا وبلىسىندا وڭتۇستىك-باتىستان سوققان جەلدىڭ جىلدامدىعى كەي جەرلەردە 15-20 م/س-قا جەتەدى، ال كۇندىز وبلىستىڭ باسىم بولىگىندە 15-20 م/س جىلدامدىقپەن سوعادى، ەكپىنى 23-28 م/س-قا دەيىن جەتەدى. 2 ماۋسىم كۇنى دە وڭتۇستىك-باتىستان تۇرعان جەلدىڭ جىلدامدىعى سەكۋندىنا 15-20 مەترگە، ال ەكپىنى كۇندىز 23-28 م/س-قا جەتەدى. 2 ماۋسىمدا داۋىل تۇرىپ، بۇرشاق جاۋۋى مۇمكىن»، - دەلىنگەن حابارلامادا.

استانادا 1 ماۋسىمدا كۇندىز، سونداي-اق 2 ماۋسىم كۇنى وڭتۇستىك-باتىستان سوققان جەلدىڭ جىلدامدىعى كەي جەرلەردە 15-20 م/س-قا، ەكپىنى 2 ماۋسىمدا 23-28 م/س-قا دەيىن جەتەدى. سونداي-اق، 2 ماۋسىم كۇنى كۇن كۇركىرەپ، كۇندىز داۋىل تۇرۋى مۇمكىن، بۇرشاق جاۋۋى ىقتيمال.

1 ماۋسىم كۇنى قوستاناي وبلىسىنىڭ كەي جەرلەرىندە نايزاعاي وينايدى، داۋىل سوعىپ، بۇرشاق جاۋۋى مۇمكىن. جەل الدىمەن وڭتۇستىك-باتىستان، كەيىن سولتۇستىك باتىستان سەكۋندىنا 15-20 مەتر جىلدامدىقپەن سوعادى.

1 ماۋسىمدا سولتۇستىك قازاقستان وبلىسىندا وڭتۇستىك-باتىستان، باتىستان سوققان جەلدىڭ جىلدامدىعى تۇندە ءوڭىردىڭ باسىم بولىگىندە سەكۋندىنا 15-20 مەترگە، ەكپىنى 23-28 م/س-قا دەيىن، ال كۇندىز كەي جەرلەردە 15-20 م/س-قا دەيىن جەتۋى مۇمكىن. جاڭبىر جاۋادى. كەي جەرلەردە كۇن كۇركىرەيدى، داۋىل تۇرىپ، بۇرشاق جاۋۋى ىقتيمال.