استانانىڭ مەرەيتويى "EXPO" الاڭىندا «ەل جۇرەگى-استانا» اتتى سالتاناتتى شارامەن اشىلادى، دەپ جازادى qamshy.kz. مەرەيتويدىڭ جالپى باعدارلاماسىن ارنايى سايتتان قاراۋعا بولادى.
مادەنيەت جانە سپورت ءمينيسترى ارىستانبەك مۇحامەدي ۇلىنىڭ، استانا اكىمى اسەت يسەكەشيەۆتىڭ سوزدەرىنە سۇيەنسەك، باس شاھاردىڭ تۋعان كۇنىنە ورايلاس شارالار باس-اياعى بىرنەشە كۇنمەن نەمەسە بىرەر اپتامەن شەكتەلىپ قالمايدى. قالا حالقى، شاھارعا الىس-جاقىن ايماقتاردان كەلگەن مەيماندار ءۇشىن ۇيىمداستىرىلاتىن شارالاردىڭ اۋقىمى الدەقايدا كەڭ، ءتىپتى بىرنەشە ايعا دەيىن ۇلاساتىن بولادى. جوسپارلانعان جيىندار دا استانامەن شەكتەلىپ قالمايدى، الماتىدا جانە باسقا دا ءىرى قالالاردا اتاپ وتىلەدى.
مادەنيەت جانە سپورت مينيسترلىگى، استانا قالالىق اكىمدىگى جانە باسقا دا مەملەكەتتىك ورگاندار مۇرىندىق بولاتىن 645 شارا وتكىزىلۋى ءتيىس. بۇلاردىڭ قاتارىندا رەسەيلىك ماريا تەاترىنىڭ گاسترولدىك ساپارى، حالىقارالىق كانن كينوفەستيۆالى - 2018 اياسىنداعى قازاق كينوسىنىڭ اپتالىعى، نيۋ-يوركتە وتەتىن ءا.قاستەيەۆ اتىنداعى مەملەكەتتىك مۋزەي قورىنداعى كارتينالاردىڭ كورمەسى سىندى شارالار بار. ا.مۇحامەدي ۇلى ايتىپ وتكەندەي، 15-16 ماۋسىمدا وتەتىن Voice of Astana ەسترادا اندەرىنىڭ حالىقارالىق فەستيۆالى دە كولەمدى قاراجاتتى قاجەت ەتەتىن جوبالاردىڭ ساناتىندا. بۇل مادەني جيىنعا الەمدىك سۋپەرجۇلدىزدار شاقىرىلماعانىمەن، جارىق پەن دىبىستىڭ ساپالى بولۋىنىڭ ءوزى ارزانعا تۇسپەيدى ەكەن. ءبىر اتاپ وتەرلىگى، مۋزىكالىق باعىتتاعى شارالاردىڭ بارلىعىندا وتاندىق مۋزىكا ونەرىن، ءتول كومپوزيتورلارىمىز بەن جۇلدىزدارىمىزدىڭ شىعارماشىلىعىن ناسيحاتتاۋعا باسا كوڭىل بولىنەدى. «ءبىز بيىل فەستيۆالدىڭ العاشقى كۇنىن «ا-ستۋديو» توبىنىڭ جەتەكشىسى بايعالي سەركەبايەۆتىڭ 60 جىلدىعىنا ارناعىمىز كەلىپ وتىر. ەكىنشى كۇنىن باتىرحان شۇكەنوۆتى ەسكە الۋعا ارنايمىز. ۆالەريي مەلادزەدەن باستاپ، لەونيد اگۋتين، كريستينا ورباكايتە سىندى تانىمال ونەر جۇلدىزدارىنىڭ بارلىعى باتىرحاننىڭ دوستارى رەتىندە وسى كونسەرتكە قاتىسۋدى پارىز سانايدى»، دەيدى مينيستر.
مەرەيتوي باعدارلاماسىنا كوز جۇگىرتسەك، 1 شىلدەدەگى «قازاقستان بارىسى» رەسپۋبليكالىق قازاقشا كۇرەس ءتۋرنيرى، 1-5 شىلدە ارالىعىندا وتەتىن XIV حالىقارالىق «ەۋرازيا» فەستيۆالى، 7-13 شىلدەدەگى ءى حالىقارالىق Wide World تەاترلار فەستيۆالى، 25-29 ماۋسىم كۇندەرى وتەتىن The Spirit of the Dance ەتنوستىق مۋزىكا مەن حالىق ءبيى فەستيۆالى، حالىقارالىق اقىندار ايتىسى سىندى اۋقىمدى مادەني شارالار لەگى تولاستامايدى ەكەن. Wide World تەاترلار فەستيۆالى اياسىندا حالىقارالىق سيمفونيالىق وركەستر سۇيەمەلدەيتىن كارل دجەنكينستىڭ Chune Astana وداسىنىڭ سالتاناتتى پرەمەراسى، «وپەراليا» فەستيۆالىنىڭ باعدارلاماسىندا مۇقان تولەبايەۆتىڭ «ءبىرجان-سارا» وپەراسى قويىلاتىنىن اتاپ وتكەن ءلازىم. جىل سايىن ماۋسىم ايىنىڭ ورتا شەنىنەن باستاپ قالا كۇنىن تويلاۋ قىزا تۇسەتىنى بەلگىلى. بيىل مەرەكەلىك شارالاردىڭ لەگى، شاھارداعى مەرەكەلىك كوڭىل-كۇي بىرەر اپتانىڭ اياسىندا سايابىرلاپ قالماي، جاز بويى تولاستاماۋى ءتيىس. بۇل ەلوردالىقتار ءۇشىن دە، استاناعا جازدا قىدىرىپ كەلەتىن مەيماندار ءۇشىن دە ىڭعايلى بولارى ءسوزسىز.
بيىل قازاقستاننىڭ ۇلىبريتانياداعى، جاپونياداعى، قىتايداعى كۇندەرى جانە وزبەكستاننىڭ، ازەربايجاننىڭ، رەسەيدىڭ قازاقستانداعى كۇندەرى وتەدى. استانا ورتالىعىنداعى ۇلتتىق اكادەميالىق كىتاپحانانىڭ ديرەكتورى ءۇمىتحان مۇڭالبايەۆا كىتاپ ورداسى ەلوردا مەرەيتويىنا ارناپ الەمنىڭ تانىمال 20 كىتاپحاناسىنىڭ كورمەسىن وتكىزەتىنىن جەتكىزدى. ون توعىز مەملەكەتتىڭ كىتاپحانالارىندا قازاقستاننىڭ ادەبي جانە مادەني ورتالىقتارىن اشقاندارىن مالىمدەگەن ول وسىنداي جيىرماسىنشى ورتالىق بيىل گەرمانيادا اشىلاتىنىن، وسىلاردىڭ ءبارى كورمەگە كەلەتىنىن ايتتى. «بىلتىر فرانسيانىڭ BULAس اتتى ۇلكەن كىتاپحاناسىندا مۇستافا شوقايدىڭ قولجازبالارىن تاپتىق. كىتاپحانا بىزگە بۇل قولجازبالاردى تاپسىرۋعا دايىن»، دەدى ءۇمىتحان مۇڭالبايەۆا.
«استانا بالەت» تەاترىنىڭ ديرەكتورى ۆالەريي كۇزەمبايەۆتىڭ ايتۋىنشا، بيىل اتالمىش ونەر وشاعى استانا مەرەيتويىنا «جيزەل» بالەتىمەن قوسا، قازاق ەرتەگىسى جەلىسىمەن قويىلاتىن بالەتتى تارتۋ ەتەدى. بۇل تۋىندىنىڭ ليبرەتتوسىن باقىت قايىربەكوۆ جازىپ جاتىر. «استانا وپەرا» تەاترى ديرەكتورىنىڭ ورىنباسارى الەكساندر سوۆوستيانوۆتىڭ سوزىنشە، بيىل بۇل ۇجىمنىڭ «ءبىرجان-سارا» وپەراسىنىڭ پرەمەراسى اشىق اسپان استىندا وتەدى. كاستينگ جاريالانىپ، قازىرگى تاڭدا باس كەيىپكەرلەردى سومدايتىن ارتىستەر تاڭدالىپ جاتقان كورىنەدى. بۇعان قوسا، «قوزى كورپەش-بايان سۇلۋ»، «سيەۆيليا شاشتارازى»، «ەۆگەنيي ونەگين» وپەرالارى «كورسار» بالەتى قويىلادى. پەكيننىڭ ۇلتتىق وپەرا تەاترىمەن بىرگە قويىلاتىن «تۋراندوت» وپەراسىن ساحنالاۋعا الەم مويىنداعان رەجيسسەر تيمۋر بەكمامبەتوۆ شاقىرىلىپ وتىر. قازىرگى تاڭدا ونىمەن كەلىسسوزدەر جۇرگىزىلۋدە. ۇيىمداستىرۋشىلار استانا مەرەيتويىنا ارنالاتىن ايتۋلى شارالارعا بيلەتتەر تەحنيكالىق سەبەپتەرگە بايلانىستى ەلەكتروندى ساتىلىمعا ءالى تۇسپەگەنىن ايتتى.
