استاناداعى ليفتتەرگە قىزمەت كورسەتەتىن 69 كومپانيانىڭ بارلىعى تەكسەرىلەدى. بۇل تۋرالى قالاداعى قۇرىلىس ساپاسى تۋرالى جيىن بارىسىندا ايتىلدى، دەپ حابارلايدى Qamshy.kz اقپارات اگەنتتىگى استانا اكىمدىگىنىڭ رەسمي سايتىنا سىلتەمە جاساپ. 

استانا قالاسىنىڭ اكىمى اسەت يسەكەشيەۆتىڭ ايتۋى بويىنشا بۇل سالادا تاجىريبەسى جوق كومپانيالاردىڭ "ەركەلىگىنە" جول بەرۋگە بولمايدى. 

«جىل باسىنان بەرى التى وقيعا تىركەلدى، جاقىندا ەكى بالا ليفتتە قىسىلىپ قالدى. بۇل پروبلەما نەگە ازايمايدى؟ سالانى تۇگەلدەي بيزنەسكە اينالدىرىپ جىبەرگەن. بىزدە بۇل سالا بويىنشا 60-تان اسا كومپانيا جۇمىس ىستەيدى. بىزگە بەرىلگەن مالىمەت بويىنشا ولاردىڭ تەك جارتىسىندا عانا قىزمەتكەرلەر مەن ارنايى جابدىقتار بار. ال قالعان كومپانيالار پاتەر يەلەرىنىڭ كووپەراتيۆتەرىمەن كەلىسىم شارتقا تۇرادى»، - دەدى استانا اكىمى.

 يسەكەشيەۆتىڭ ايتۋى بويىنشا، اكىمدىك ليفت كومپانيالارىنىڭ قىزمەتىن رەتتەيتىن زاڭعا تۇزەتۋلەر دايىندادى. زاڭ كۇشىنە ەنگەنشە، استانادا ليفت بويىنشا قىزمەت كورسەتەتىن بارلىق كومپانيالاردىڭ جۇمىسى تەكسەرىلەدى.

«بۇل كومپانيالاردىڭ جۇمىسىن جۇيەلەۋ كەرەك. بارلىعىندا بىلىكتى ماماندار جۇمىس ىستەۋى كەرەك. تۇرعىن ۇيلەردە شامامەن 4900 ليفت بار. ءقازىر ءبىز تەكسەرىپ جاتىرمىز. ءبىراق تەكسەرىستى قاتاڭ تۇردە جۇرگىزۋگە ءتيىسپىز. پروكوراتۋرامەن ليفتتەردىڭ جۇمىسىن ءجىتى تەكسەرۋ ءۇشىن ارنايى جوسپارى دايىنداپ جاتىرمىز. بۇل سالا تاجىريبەسى از كومپانيالاردىڭ «ەركەلەيتىن» ورنى ەمەس. ادامداردىڭ قاۋىپسىزدىگى ءبىرىنشى ورىنعا قويىلاتىن ماسەلەدە تەك قانا بىلىگى جوعارى، ساپالى قىزمەت كورسەتەتىن كومپانيالار جۇمىس ىستەۋى كەرەك. وسى سەبەپتى اكىم ورىنباسارلارىنا، باسقارمالارعا، وزگە دە ورگاندارعا قالاداعى ليفت بويىنشا كومپانيالاردىڭ جۇمىسىن باقىلاۋعا الۋدى تاپسىرامىن»، - دەپ تاپسىرما بەردى استانا اكىمى.

ليفتتەردە اقاۋلار پايدا بولىپ، ماسەلەلەر تۋىنداعان جاعدايدا پيك پەن كومپانيا باسشىلارى جاۋاپقا تارتىلاتىن بولادى. ال ءىس ماتەريالدارى قۇقىق قورعاۋ ورگاندارىنا جىبەرىلەدى.

اتالمىش جيىندا اسەت يسەكەشيەۆ بارلىق پيك-تى 2018 جىلدىڭ جەلتوقسانىنا دەيىن تەكسەرۋدى تاپسىردى.