29 مامىردا بەيجىڭدە ۇستالعان 90 جاستاعى ەتنيكالىق قازاق ەلگە قايتارىلدى، دەپ حابارلايدى Qamshy.kz اقپارات اگەنتتىگى. 

جاعدايدىڭ ءمان-جايىن ق ر ءسىم-نىڭ باسپا ءسوز حاتشىسى ءانۋار جايناقوۆ ءوزىنىڭ facebook پاراقشاسىندا جاريالاعان. 

"2018 جىلى 2 ماۋسىمدا قازاقستاننىڭ قىتايداعى ەلشىلىگى مەن جۇڭگو قوعامدىق قاۋىپسىزدىك مينيسترلىگى اراسىنداعى ۋاعدالاستىقتاردىڭ ارقاسىندا جۇڭگو حالىق رەسپۋبليكاسىنىڭ شىڭجاڭ-ۇيعىر اۆتونوميالىق ايماعىندا دۇنيەگە كەلگەن 90 جاستاعى ەتنيكالىق قازاق قازاقستانعا قايتا ورالدى"، - دەلىنگەن جازبادا. 

ق ر ەلشىلىگى قىتايدىڭ قۇقىق قورعاۋ ورگاندارىمەن بايلانىسقا شىققان. ناتيجەسىندە 90 جاستاعى ەتنيكالىق قازاقتىڭ قوس ازاماتتىعى بار ەكەندىگى بەلگىلى بولعان.

"قىتايلىق تاراپ پەن قازاقستان ەلشىلىگىنىڭ كومەگى ارقاسىندا ۇستالعانداردىڭ جۇڭگو ازاماتتىعىنان ايىرىلۋ تۋرالى قۇجاتتى جانە ولاردى ايىپپۇلسىز ءارى ۋاقىتشا ۇستاۋ يزولياتورىنا قاماۋسىز قازاقستانعا دەپورتاسيالاۋ تەز ارادا راسىمدەلدى"، - دەپ مالىمدەدى ءسىم باسپا ءسوز حاتشىسى. 

90 جاستاعى رايحان اپا تاريحي وتانىنا ورالعان سوڭ ق ر سىرتقى ىستەر ءمينيسترى قايرات ءابدىراحمانوۆقا ريزاشىلىق ءبىلدىرىپ ۆيدەوۇندەۋ مەن العىس حات جولداعان. حاتتا ول 2005 جىلى قازاقستان ازاماتتىعىن العانىن، 13 جىلدان بەرى قوس ازاماتتىقپەن جۇرگەنىن ايتادى.

قولىندا ەكى ءتولقۇجاتى بولعان رايحان اپا زاڭدى دۇرىس بىلمەي، پەكيندە كەلەڭسىز جاعدايعا ۇشىراعان. قازاقستانعا ورالعان سوڭ ۇلى ەكەۋى قازاقستان ازاماتتىعىن ساقتاپ قالۋدى ۇيعارىپتى.