28 مامىر كۇنى رەسپۋبليكا كولەمىندە نازاربايەۆ زياتكەرلىك مەكتەپتەرىنىڭ ۇيىمداستىرۋىمەن «قولدايىق اۋىل مەكتەبىن» اتتى اكسياسى ءوتتى. شالعايداعى اۋىل مەكتەپتەرىنە ماتەريالدىق –مورالدىق كومەك بەرۋدى كوزدەگەن ايتۋلى شارا زياتكەرلىك ءبىلىم وشاعىنىڭ 10 جىلدىعىنا وراي قولعا الىندى.

وسىعان سايكەس، سەمەي قالاسىنداعى فيزيكا-ماتەماتيكا باعىتىنداعى نازاربايەۆ زياتكەرلىك مەكتەبى پريرەچنوە اۋىلىنداعى «پريرەچنوە جالپى ورتا ءبىلىم بەرەتىن مەكتەبىنە» اتباسىن بۇردى. مەكتەپ ديرەكتورى ۆەرا تيحومولوۆانىڭ ايتۋىنشا، بۇگىندە اۋىلداعى ءبىلىم مەكەمەسىندە 200 –دەن استام بالا ءدارىس الادى. سونىمەن قاتار مەكتەپ جانىنان بۇلدىرشىندەر ءۇشىن اشىلعان شاعىن ورتالىق جۇمىس ىستەپ تۇرعان كورىنەدى.

زياتكەرلىك مەكتەپ ۇجىمىن مەكتەپ ديرەكتورى باعدان قايىرجانوۆ ءوزى باستاپ بارىپ، اۋىلداعى ۇستاز ارىپتەستەرى مەن وقۋشىلارعا رەسپۋبليكا كولەمىندە وتكزىلىپ جاتقان اكسيانىڭ ءمان-ماڭىزى جايلى ايتا كەلىپ، زياتكەرلىك مەكتەپتەردىڭ بۇگىنگى تىنىس-تىرشىلىگى مەن سوڭعى جاڭالىقتارىمەن ءبولىستى.

— ءبىزدىڭ سىزدەرگە كەلۋىمىزدىڭ باستى ماقساتى – وزىمىزدەگى باردى سىزدەرمەن ءبولىسۋ. وسى ارقىلى ساپالى ءبىلىم مەن جوعارى ناتيجەلەرگە، جاقسى كورسەتكىشتەرگە قول جەتكىزۋ. بيىل ەلىمىزدەگى زياتكەرلىك مەكتەپتەردىڭ قۇرىلعانىنا 10 جىل تولادى. وسى وتپەلى كەزەڭ ىشىندە جەتكەن جەتىستىكتەرىمىز از ەمەس. قازاقستاننىڭ بولاشاعى ءبىلىمدى جاستار سىزدەردە ەكەنىنەلباسىمىز ن.ءا.نازاربايەۆ ءجيى ايتادى. ەندەشە، سىزدەردىڭ الاڭسىز ءبىلىم الۋلارىڭىز ءۇشىن بارلىق جاعدايلار جاسالۋى كەرەك. بۇگىن سىزدەرگە 100 كوشەت بولمە گۇلدەرىن، 300-گە جۋىق ءتۇرلى كوركەم ادەبي كىتاپتار، سپورتپەن شۇعىلدانۋلارىڭ ءۇشىن 15 دوپ، وزدەرىڭدەي وقۋشىلار قولىنان شىققان 3D پرينتەرتەر الىپ كەلىپ وتىرمىز، -دەگەن باعدان توقتامىس ۇلى وزدەرى الىپ كەلگەن سىيلىقتاردى تابىس ەتتى.

جالپى اكسيا شەڭبەرىندە نازاربايەۆ زياتكەرلىك مەكتەپتەرى 20 اۋىل مەكتەبىنە زياتكەرلىك مەكتەپتەرىنىڭ وقۋشىلارى مەن مۇعالىمدەرى جيناعان 6 875 دانا كوركەم جانە عىلىمي-تانىمدىق ادەبيەت، وقۋشىلار وسىرگەن 2 000 كوشەت بولمە گۇلدەرىن، دببۇ ورتالىقتىرى (وبو، پشو، ءپوو) جاساعان 860 دانا مۇعالىمدەرگە ارنالعان ادىستەمەلىك نۇسقاۋلار، الماتى قالاسىنداعى نازاربايەۆ زياتكەرلىك مەكتەپتەرى وقۋشىلارى جاساعان 20 3D پرينتەر، 20 ستەند، 300 سپورتتىق دوپ سىيعا تارتىلدى.
اۋىل مەكتەبىنە جاسالعان ساپاردا زياتكەرلىك مەكتەپ ۇستازدارى ارىپتەستەرىنە ارناپ ءتۇرلى تاقىرىپتاردا شەبەرلىك سىنىپتارىن وتكىزسە، «كوشباسشىلار كەڭەسى» مۇشەلەرى قۇرداستارىمەن بىرلەسە وتىرىپ اكتيۆيتيلەر ۇيىمداستىردى.

ءدال وسى كۇنى رەسپۋبليكا كولەمىندەگى اۋىل مەكتەپتەرىنىڭ ۇستازدارىنا جاڭارتىلعان ءبىلىم مازمۇنى مەن كريتەريالدى باعالاۋدان، وقىتۋدىڭ ادىستەرىمەن تەحنولوگيالارىنان ادىستەمەلىك كونسۋلتاسيالار ۇيىمداستىرىلادى. كونسۋلتاسيالار شەڭبەرىندە بارلىق وقۋ پاندەرىنەن 500 استام شەبەرلىك سىنىپتارى وتكىزىلدى.

جيىن سوڭىندا پريرەچنوە جالپى ورتا ءبىلىم بەرەتىن مەكتەبىنىڭ ديرەكتورى ۆەرا تيحومولوۆا ەكى مەكتەپ اراسىنداعى تىعىز قارىم-قاتىناس وتكەن وقۋ جىلى باسىندا ورناتىلعانىن تىلگە تيەك ەتە كەلىپ، اكسيانى ۇيىمداستارعان زياتكەرلىك مەكتەپتەر باسشىلىعىنا، ۇستازدارعا، وقۋشىلارعا جۇرەكجاردى العىسىن ءبىلدىردى. الداعى ۋاقىتتا دا ەكىجاقتى بايلانىس دامي بەرەتىندىگىنە سەنىم ءبىلدىردى.