اۋدان ورتالىعىنان شالعايدا جاتقان شارۋا قوجالىقتارىنا ەلەكتر ەنەرگياسى تارتىلۋدا. «بيزنەستىڭ جول كارتاسى – 2020» باعدارلاماسى اياسىندا وتكەن جىلى 16 قىستاققا جارىق باعانالارى ورناتىلىپ، حالىق قۋانىپ قالعانىن ايتا كەتكەن ورىندى.

بيىل اۋدانداعى سەگىز كاسىپكەر ەلەكتر جەلىسىن تارتۋدى جوسپارلاپ وتىر. وعان 110 ميلليون 932 مىڭ تەڭگە قاراجات قاراستىرىلعان. رەسمي دەرەك كوزدەرىنە سۇيەنسەك، اباي اۋدانىندا 2012 جىلدان بەرى 19 شارۋا قوجالىقتىڭ 25 قىستاعىنا جارىق تارتىلىپتى. وعان مەملەكەت تاراپىنان 318 ميلليون 867 مىڭ تەڭگە قاراجات جۇمسالعان. اۋداندىق كاسىپكەرلىك جانە اۋىل شارۋاشىلىعى ءبولىمىنىڭ باسشىسى دۋمان ناريمان ۇلىنىڭ ايتۋىنشا، ابايدا «بيزنەستىڭ جول كارتاسى-2020» باعدارلاماسى اياسىندا اتقارىلىپ جاتقان شارۋا كوپ.

– كۇندەلىكتى كۇيبەڭ تىرشىلىكتى ەلەكتر ەنەرگياسىنسىز كوزگە ەلەستەتە المايتىن بولدىق. كەيدە جارىق بىرەر ساعاتقا ءسونىپ قالعاندا بىر-بىرىمىزگە سەڭدەي سوعىلىساتىنىمىز ايتپاسا دا تۇسىنىكتى عوي. ءتىپتى ءبارىمىز قولداناتىن تۇرمىستىق تەحنيكالاردى بىلاي قويعاندا، ءۇيدى جىلىتۋدى، قاقپا، ەسىكتەردى اشۋعا دەيىن وسى قۇدىرەتتى قۋاتقا جۇكتەپ قويدىق ەمەس پە. سوندىقتان اتا كاسىپتەن ءناپاقاسىن تاۋىپ وتىرعان شارۋا قوجالىقتارىنا جارىق اۋاداي قاجەت. سول سەبەپتەن ءبىز «بيزنەستىڭ جول كارتاسى – 2020» باعدارلاماسى اياسىندا شالعايدا جاتقان قىستاقتارعا ەلەكتر جەلىسىن ورناتۋدى قولعا الدىق. بۇل شارۋا قوجالىقتارىنىڭ جۇمىسىن از بولسا دا جەڭىلدەتۋگە مۇمكىندىك بەرەدى،- دەيدى دۋمان ناريمان ۇلى.

اباي اۋدانىندا «بيزنەستىڭ جول كارتاسى-2020» باعدارلاماسى اياسىندا ەلەكتر جەلىسىنە قول جەتكىزگەندەردىڭ ءبىرى – سامال مۇقاتاي. ول اۋدانداعى «ايتۋعان» شارۋا قوجالىعىنىڭ باسشىسى.

– جارىق تارتىلعالى بەرى ءتول الۋ ناۋقانى ويداعىداي ءوتتى. ايتپەسە بۇرىن مايشام جاعىپ، مالدى قاراپ وتىراتىنبىز. شىنى كەرەك ەلەكتر باعانالارى ورناتىلعاننان باستاپ جۇمىسىمىز جەڭىلدەدى. شىن قۋاندىق. راس. بۇل اۋىلى ارالاس، قويى قورالاس اۋدان حالقى ءۇشىن وتە ءتيىمدى باعدارلاما بولدى. ءبىزدىڭ كاسىبىمىزدى دامىتۋعا قولداۋ كورسەتكەن اۋدان باسشىلىعىنا العىستان باسقا ايتارىمىز جوق، — دەپ ريزاشىلىعىن ءبىلدىردى ول.

بۇگىندە اتا كاسىپتى دامىتۋعا دەن قويعان ابايلىق كاسىپكەرلەردىڭ العا قويعان ماقساتتارى كوپ. ولار مال باسىن كوبەيتىپ، اۋدانداعى اۋىل شارۋاشىلىعى سالاسىن وركەندەتۋگە ۇلەس قوسپاق.