پرەمەر-مينيستر باقىتجان ساعىنتايەۆ قازاقستانداعى مەنينگيتكە قارسى جۇمىستى كۇشەيتۋدى تالاپ ەتتى، دەپ حابارلايدى Qamshy.kz اقپارات اگەنتتىگى. 

استانادا كەزەكتى ۇكىمەت وتىرىسى ءوتىپ جاتىر. جيىندا ق ر دەنساۋلىق ساقتاۋ ءمينيسترى ەلجان ءبىرتانوۆ مەنينگوكوكك ينفەكسياسى جايىندا بايانداما جاسادى.

«ەلىمىزدە 2018 جىلدىڭ باسىنان بەرى ءولىم ءقاۋپى جوعارى باكتەريالىق مەنينگوكوكك ينفەكسياسىمەن 593 ادام قارالدى. ولاردىڭ ىشىندە 213 ادام ەمدەۋگە جاتقىزىلدى، ال ولاردىڭ ىشىندە 58 ادامدا مەنينگوكوكك ينفەكسياسى راستالدى. 14 جاسقا دەيىنگى بالالاردىڭ سانى – 21، قازىرگى تاڭدا 10 ناۋقاس اۋرۋحانادان ەمدەلىپ شىعارىلدى، 21ء-ى ءالى ەمدەلۋ ۇستىندە. ادام ءولىمى جاعدايى تىركەلدى، ونىڭ ىشىندە الماتى وبلىسىندا 4، قىزىلوردا وبلىسىندا 1، وقو-دا 2 جانە الماتى قالاسىندا 6 ادام كوز جۇمدى. وكىنىشكە وراي، قايتىس بولعان ناۋقاستاردىڭ اراسىندا بالالاردىڭ سانى – 6.

وسىعان دەيىن ەلىمىزدە مەنينگوكوكك ينفەكسياسىمەن ءولىم دەڭگەيى جىل سايىن وزگەرىپ وتىردى، ەڭ تومەن جاعداي – 2016 جىلى 7 ادام قايتىس بولعان، ال ەڭ جوعارعى كورسەتكىش – 2015 جىلى 25 ادامنىڭ ءولىمى تىركەلگەن.

قازاقستان رەسپۋبليكاسىندا مەنينگوكوكك ينفەكسياسىمەن سىرقاتتانۋدىڭ ورتاشا دەڭگەيى – 100 مىڭ تۇرعىنعا شاققاندا 2،1. ءقازىر قازاقستانداعى سىرقاتتانۋ دەڭگەيى ءار 100 مىڭ تۇرعىندارعا 0،3ء-تى قۇرايدى.

الماتى قالاسىندا مەنينگوكوكك ينفەكسياسىنىڭ ورتاشا دەڭگەيى 4،0 بولسا، ءقازىر الماتى قالاسىندا 100 مىڭ تۇرعىنعا شاققاندا 1،7ء-نى قۇرايدى»، - دەدى مينيستر ءوز بايانداماسىندا.

ونىڭ ايتۋىنشا، دۇنيەجۇزىلىك دەنساۋلىق ساقتاۋ ۇيىمىنىڭ ەپيدەميالاردى باسقارۋ جونىندەگى نۇسقاۋىنا  سايكەس، 2018 جىلى ەپيدەميالىق دەڭگەيدىڭ كورسەتكىشى اپتاسىنا 100 مىڭ تۇرعىنعا شاققاندا 3 جاعدايدى جانە 100 مىڭ تۇرعىنعا شاققاندا 10 جاعداي ەكەن.

مينيستر ءبىرتانوۆ اۋرۋ جاعدايىنىڭ دەڭگەيى وسى كورسەتكىشتەن اسقاندا ارنايى شارالار جاسالىپ، حالىققا ۆاكسينالار ەگىلەتىنىن ايتىپ ءوتتى.

«رەسپۋبليكا حالقىنىڭ سانىنا سايكەس پروفيلاكتيكالىق ءىس-شارالاردى جۇرگىزەتىن شەكتى كورسەتكىش – اپتاسىنا 540 جاعداي جانە ەپيدەميالوگيالىق شەك – اپتاسىنا 1800 جاعداي، ول كەزدە مەنينگوكوكك ينفەكسياسىنا قارسى حالىقتىڭ ۆاكسينامەن جاپپاي ەگىلۋى جانە شەكتەۋ شارالارى ەنگىزىلۋى قاجەت. قازىرگى تاڭدا الماتى قالاسىندا قالا حالقىنىڭ سانىنا سايكەس، بۇل كورسەتكىش 54 جانە 180 جاعدايدى قۇرايدى، ال اعىمداعى جىلى جاعدايلاردىڭ ەڭ جوعارعى كولەمى 21-27 مامىر ارالىعىندا تىركەلگەن. رەسپۋبليكا بويىنشا اپتاسىنا 15، الماتى قالاسى بويىنشا 13 جاعداي تىركەلدى.

الماتىداعى سىرقاتتانۋ دەڭگەيى شەكتىك دەڭگەيدەن كورسەتكىشىنەن تومەن»، - دەدى مينيستر.

سونىمەن قاتار ەلجان ءبىرتانوۆ مەنينگوكوكك ينفەكسياسىمەن سىرقاتتانۋ بويىنشا جاعدايدى تۇراقتاندىرۋ ءۇشىن وڭىرلەردە رەسپۋبليكالىق ارنايى شتابتار قۇرىلعانىن جەتكىزدى.

"ولار كۇندەلىكتى جاعدايدى تۇراقتاندىرۋ بويىنشا قابىلداناتىن ءىس-شارالاردى جۇزەگە اسىرۋدا. ال بيىل 31 مامىردا مەنينگوكوكك ينفەكسياسىمەن سىرقاتتانۋدى تۇراقتاندىرۋ جونىندەگى كەشەندى ءىس-شارالار جوسپارى بەكىتىلدى. قارىم-قاتىناستا بولعان 433 ادام انىقتالىپ، ولارعا انتيبيوتيك پروفيلاكتيكاسى تاعايىندالدى. 100 پايىز ناۋقاس بۇگىندە پروفيلاكتيكا قابىلداپ جاتىر. 3438 ادام كۋرستى اياقتادى، بۇگىندە 698 ادام وسى پروفيلاكتيكالىق كۋرستى جالعاستىرۋدا. الماتى قالاسى مەن الماتى وبلىسىنداعى مەكتەپكە دەيىنگى بالالار مەكەمەلەرىندە كوپتەگەن ءىس-شارالارعا شەكتەۋ قويىلدى، 2018 جىلعى جازعى ساۋىقتىرۋ لاگەرلەرىنىڭ اشىلۋى 18 ماۋسىمعا دەيىن شەگەرىلدى. حالىق اراسىندا ب ا ق جانە الەۋمەتتىك جەلىلەر ارقىلى ءتۇسىندىرۋ جۇمىستارى جۇرگىزىلۋدە. سوندىقتان رەسپۋبليكادا مەنينگوكوكك ينفەكسياسى بويىنشا قالىپتاسقان جاعداي كارانتين ەنگىزۋگە جانە حالىققا جاپپاي ۆاكسيناسيالاۋ جۇرگىزۋ قاجەت بولاتىن شەكتى دەڭگەيلەردەن اسپايدى. قازىرگى كۇندە دەنساۋلىق ساقتاۋ مينيسترلىگى دەنساۋلىق ساقتاۋ باسقارمالارىمەن بىرلەسىپ قابىلداپ جاتقان شارالار حالىق اراسىندا مەنينگوكوكك ينفەكسياسىمەن سىرقاتتانۋ بويىنشا جاعدايدى تۇراقتاندىرۋ ءۇشىن جەتكىلىكتى دارىگەرلىك ۇيىمدار مەن قاجەتتى دارى-دارمەكتەر، ءبارى دايىن، بارلىق وڭىرلەردە دايىندىق جۇمىستارى جۇرگىزىلۋدە»، - دەدى مينيستر.

دەنساۋلىق ساقتاۋ ءمينيسترى الماتى قالاسىنداعى مەنينگوكوكك ينفەكسياسىنا قاتىستى بۇگىن الماتى مەن الماتى وبلىسىنا ساپارعا شىعۋدى جوسپارلاپ وتىرعانىن دا مالىمدەدى.

پرەمەر-مينيستر باقىتجان ساعىنتايەۆ ءوز كەزەگىندە بۇل ماسەلە حالىق اراسىندا ۇلكەن الاڭداۋشىلىق تۋدىرىپ وتىرعانىن ايتىپ، دەنساۋلىق ساقتاۋ ءمينيسترى ەلجان ءبىرتانوۆقا ءبىرشاما ەسكەرتۋ جاسادى.

«جاي عانا ايتىپ ءوتۋ از، اقپارات-تۇسىندىرمە جۇمىستارىن جانداندىرۋ قاجەت. الەۋمەتتىك جەلىلەردە كوپ تالقىعا ءتۇسىپ جاتىر. سىزدەردىڭ تاراپتارىڭىزدان ايتىلىپ جاتقان ماسەلەلەر بىرىنە جەتسە، ەكىنشىسىنە جەتىپ وتىرعان جوق. سوندىقتان جاڭا ءوزىڭىز ايتىپ وتىرعان شتابتاردى قۇرساڭىز، ولاردىڭ جۇمىسىن جاريا تۇردە جۇرگىزۋ قاجەت. ءاربىر وبلىستاردا اتقارىلىپ جاتقان جۇمىستاردى جاريا تۇردە اشىپ ايتىپ، حالىققا جەتكىزىپ وتىرۋ قاجەت. دياگراممادا ءوزىڭىز قاي جىلى كوپ بولعانىن، قاي جىلى از بولعانىن كورسەتىپ وتىرسىز. بيىل دا كوپ تالقىلاۋعا ءتۇسىپ جاتىر، سول سەبەپتى اقپاراتتاندىرۋ جۇمىستارىن جانداندىرۋ كەرەك.

ەكىنشى ماسەلە – ۆاكسيناعا كوپ كوڭىل ءبولىنىپ جاتىر. "ونى ەگۋ كەرەك پە، الدە ەكپەۋ كەرەك پە؟"، - دەگەن سۇراقتار بار. مىسالى، كەشە ماعان قابىلداۋعا ۇلكەن كاسىپورىننىڭ باسشىسى كەلىپ: "جۇمىسشىلاردىڭ بارلىعىنا ەگۋ جۇمىسىن جۇرگىزەيىن بە، الدە قاجەت ەمەس پە؟"، - دەپ سۇراپ جاتىر. ولارعا بۇل جايىندا ايتىپ جەتكىزى،پ ءتۇسىندىرىپ جاتقان ەشكىم جوق. ۆاكسينانى ءوز ەركىمەنەن الۋ ماسەلەسى حالىقتىڭ اراسىندا كۇننەن-كۇنگە كوتەرىلىپ كەلە جاتىر. ال باعاسى وتە قىمبات. ءبىر وبلىستا 40 مىڭ، ءبىر وبلىستا  20 مىڭ تۇرادى. وسىنداي جاعداي بولىپ جاتقان كەزدە مينيسترلىكتەگىلەر، اكىم مىرزالار، سىزدەر دە جاعدايدى باقىلاۋعا الىپ، كەرەگىنشە كومەك كورسەتىپ، ۆاكسينالاردىڭ باعاسىن ءتۇسىرۋ قاجەت. پانيكا جاساماۋ كەرەك»، - دەدى ۇكىمەت باسشىسى.