اياگوز اۋدانىندا ءۇش بىردەي ەلدى مەكەندى تازا اۋىز سۋمەن جابدىقتاۋ جۇمىستارى ءجۇرىپ جاتىر.

اۋداننىڭ دونەنباي، كەڭقولات جانە ەسكى مايلين اۋىلدارىندا سۋمەن قامتۋ ەڭ وزەكتى ماسەلەلەردىڭ ءبىرى بولىپ كەلگەن ەدى. كەڭەستىك زاماندا سالىنعان سۋ جەتكىزۋ جەلىسى ەشقاشان جوندەۋ كورمەگەن بولاتىن. ال ەسكى مايلين اۋىلىنىڭ تۇرعىندارى مۇندا ەشقاشان دا اۋىزسۋ بولماعانىن ايتادى. ءار تۇرعىن ءوزى ءۇيىنىڭ قاسىنان قۇدىق قازىپ العان. ەندى جوندەۋ جۇمىستارى باستالعانىن كورگەن اۋىل تۇرعىندارىنىڭ قۋانىشتارىندا شەك جوق.

دونەنباي اۋىلىندا سىرتقى سۋ قۇبىرى مەن سۋىركۋىش قۇرىلىس الاڭىن قايتا قۇرىلىمداۋ جۇرگىزىلۋدە. جوندەۋ جۇمىستارى جەتى جارىم ايعا سوزىلماق. سۋ وتكىزۋ جەلىسىنىڭ ۇزىندىعى 15 مىڭ مەتردى قۇرايدى، ونىڭ ىشىندە سۋ تاراتقىش ەكى جەلى دە بولادى.

ال كەڭقولات اۋىلىنداعى سۋمەن جابدىقتاۋ جۇمىستارى ءتىپتى، ءساۋىر ايىندا باستالىپ كەتكەن. سەگىز ادامنان قۇرالعان بريگادا 1800 مەتر جەرگە تۇربا وتكىزىپ جاتىر.

– ەندى بىزدە اۋىز سۋ بولاتىندىعىنا وتە قۋانىشتىمىن. بۇرىن سۋدى بۇلاقتاردان الاتىن ەدىك، بوشكەلەرمەن تاسيتىن ەدىك. ەندى ءۇيدىڭ جانىندا بولادى، — دەيدى كەڭقولات اۋىلىنىڭ تۇرعىنى مارات دۇيسەحانوۆ.

جۇمىس ەسكى مايلين اۋىلىندا دا قىزىپ جاتىر. قازىرگى ۋاقىتتا مەردىگەر كومپانيا 200 مەتر ترانشەيا قازىپ، سۋ قويماسىنىڭ، سورعى جانە ۇڭعىمانىڭ ءوزىنىڭ 15،7 تەكشە مەتر ارميرلەنگەن بەتون نەگىزى قۇيىلعان. قالىپتاۋ قالقانى ورناتىلۋدا. ماۋسىمنىڭ وتىزىنا دەيىن مۇنداعى سۋ وتكىزۋ جەلىلەرىندە تازا سۋ اعاتىن بولادى.

كەڭقولات جانە ەسكى مايلين اۋىلدارىن سۋمەن جابدىقتاۋ جۇمىستارىنا جەرگىلىكتى بيۋدجەتتەن، ال دونەنباي اۋىلىنا رەسپۋبليكالىق بيۋدجەتتەن قارجى ءبولىنىپ وتىر. جوبالاردىڭ ورتاق قۇنى 300 ملن. تەڭگەگە جۋىق.