«نۇر وتان» پارتياسى وبلىستىق فيليالىنىڭ ساياسي كەڭەسى بيۋروسىنىڭ كەزەكتى وتىرىسىندا «رۋحاني جاڭعىرۋ» باعدارلاماسىنىڭ كۋرچاتوۆ، زايسان جانە ۇلان اۋداندارىندا ىسكە اسىرىلۋ بارىسى قارالدى.

جيىن ايماق باسشىسى، پارتيا فيليالىنىڭ ءتواراعاسى دانيال احمەتوۆتىڭ توراعالىعىمەن ءوتتى.

تاقىرىپ بويىنشا بايانداما جاساعان كۋرچاتوۆ قالاسىنىڭ اكىمى الماس وڭداقانوۆ شاھاردا باعدارلاما اياسىندا كيەلى ورىنداردىڭ،سونىمەن قاتار كوپشىلىككە كورسەتۋگە تۇرارلىق جەرلەردىڭ جوق ەكەنىن ايتىپ، قاتال سىنعا قالدى. ول، سونداي-اق، قالاعا تۋريستىك ماقساتتا كەلگەن ادامداردىڭ سانىن دا بىلمەيتىن بولىپ شىقتى.

– الەمدە 32 «توكوماك» رەاكتورى بار، سونىڭ ەكەۋى عانا ماتەريالتانۋ باعىتىندا جۇمىس ىستەيدى. سول ەكى رەاكتوردىڭ بىرەۋى – ناق وسى كۋرچاتوۆ قالاسىندا ورنالاسقان. مەنىڭ ويىمشا، وبلىستاعى بالالاردىڭ ءبارى «توكوماك-تىڭ» نە ەكەنىن ءبىلۋى كەرەك، ونى ءوز كوزدەرىمەن كورۋى ءتيىس. وسى وڭىردە الەمدەگى ەڭ ۇلكەن يادرولىق قارۋلاردى سىناقتان وتكىزەتىن پوليگون بولدى. ول ەلباسى نۇرسۇلتان نازاربايەۆتىڭ باستاماسىمەن جابىلدى. ەلىمىز اتوم قارۋىنان ءوز ەركىمەن باس تارتتى. بۇل– الەمدە تەڭدەسى جوق تاريحي شەشىم، باتىل قادام بولدى. وسىنىڭ ءبارى – ەل تاريحى. كۋرچاتوۆتا پوليگونعا ارنالعان ەرەكشە مۇرجاي دا بار. ال ءسىز بولساڭىز كۋرچاتوۆتا ەشتەڭە جوق دەپ، قۇتىلعىڭىز كەلەدى، – دەپ قاداپ ايتتى وبلىس اكىمى.

ايماق باسشىسى، قالاداعى كورنەكى جەرلەردىڭ سىزباسىن جاساپ، مارشۋرت ازىرلەۋدى تاپسىردى. شاھارعا وقۋشىلاردىڭ تەمىر جولمەن جانە اۆتوكولىكپەن قاتىناۋ مۇمكىندىكتەرىن قاراستىرۋدى تاپسىردى.