وسكەمەندە جاس اقىندار اراسىندا فورماتى ەرەكشە جىر دوداسى ءوتتى. دۋەل ۇلگىسىندە وتكەن سايىستا اقىندار استانانىڭ 20 جىلدىعىن ولەڭگە قوستى.

وبلىستىق «شابىت» اقىندار كلۋبى مەن س.امانجولوۆ اتىنداعى شقمۋ-دىڭ ۇيىمداستىرۋىمەن، وسكەمەن قالاسىنىڭ مادەنيەت جانە تىلدەردى دامىتۋ ءبولىمىنىڭ قولداۋىمەن وتكەن دوداعا ءتورت جۇپ اقىن قاتىستى. جارىس شارتى بويىنشا كەزەكتەسىپ ولەڭ وقىعان جۇپتاردىڭ ۇزدىگىن قازىلار القاسى انىقتادى. وسىلايشا جيىنى سەگىز اقىننان ىرىكتەلە كەلە ەكى ۇمىتكەر اقتىق ايقاسقا ءوتتى.

«شابىت» اقىندار كلۋبىنىڭ جەتەكشىسى قىزىربەك دۇرگىنباي ۇلىنىڭ ايتۋىنشا، بۇل شارا شىعىستاعى تالانتتى شايىرلاردى جالپاق جۇرتقا ينتەرنەت ارقىلى تانىتۋ ماقساتىندا ۇيىمداستىرىلعان.

-دوداعا تۇسكەن سەگىز اقىننىڭ كوبى س.امانجولوۆ اتىنداعى شقمۋ ستۋدەنتتەرى. ءبىلىم ورداسى جۋىقتا عانا جاس جۋرناليستەرگە ارناپ اشىلعان تەلەراديو كەشەنىن ۇسىنىپ، دۋەلدى باستان-اياق ءتۇسىرىپ الۋعا جاعداي جاساپ وتىر. كەلەشەكتە ءتۇسىرىلىم الاڭىندا قويىلعان سايىس ينتەرنەت ارقىلى قالىڭ وقىرماننىڭ نازارىنا قويىلادى. جاس اقىنداردى ىنتالاندىرۋ ءۇشىن قالالىق مادەنيەت جانە تىلدەردى دامىتۋ ءبولىمى باعالى سىيلىقتار ۇسىندى، — دەيدى ول.

ولەڭنىڭ قوزى جاۋىرىن جەبەسىن قارشا بوراتىپ، قارسىلاس شاق كەلتىرمەگەن تاسقىن قاليبەكوۆ سايىستىڭ باس جۇلدەسىن جەڭىپ السا، ورازاي جەڭىس ۇلى ءبىرىنشى ورىننان كورىندى. ەكىنشى ورىن داۋلەتبەردى جەكەيۇلىنا، ءۇشىنشى ورىن بالاۋسا مەلسقىزىنا بۇيىردى.