وسكەمەندە وبلىس اكىمىنىڭ جۇلدەسى cاراپقا سالىنعان ءححى حالىقتىق سپورت ويىندارى مارەسىنە جەتتى. ءتورت كۇنگە سوزىلىپ، استانا قالاسىنىڭ 20 جىلدىق مەرەيتويىنا ارنالعان دوداعا وبلىسىمىزدىڭ بارلىق اۋدان-قالاسىنان 2 700-دەن استام سپورتشى قاتىستى.

بيىلعى جارىستىڭ باعدارلاماسىنا 22 سپورت ءتۇرى ەنگەن-دى. بۇل 21 جىلدىق تاريحى بار سپارتاكيادادا بۇرىن-سوڭدى تىركەلمەگەن رەكوردتىق كورسەتكىش. ءبىر ايتا كەتەرلىگى، جارىستى ۇيىمداستىرۋشىلارى حالىقتىق ويىنداردىڭ مارتەبەسىن ارتتىرۋ ماقساتىندا بيىل جاستار اراسىندا تانىمالدىلىققا يە ۆوركاۋت دەپ اتالاتىن سپورت ءتۇرىن دە ەنگىزىپتى. جالپى، وسى جىلعى ويىنداردىڭ اياسىندا وتكەن باسەكەلەردىڭ قاي-قايسىسىن الساڭ دا، تارتىسقا تولى بولدى. مۇنى بۇگىن وسكەمەندەگى يپپودرومدا وتكەن سپارتاكيادانىڭ جابىلۋ سالتاناتىندا وبلىستىق دەنە شىنىقتىرۋ جانە سپورت باسقارماسىنىڭ باسشىسى اسقار موجانوۆ ايتتى.

– بيىلعى جارىستا ەشكىم كۇتپەگەن ناتيجەلەر دە تىركەلدى. سول سەبەپتەن، ويىندار وتە تارتىستى، ءارى قىزىقتى ءوتتى دەپ ەسەپتەيمىز. ماسەلەن، اۋداندار اراسىنداعى جالپىكوماندالىق ەسەپتە ءۇشىنشى ورىننان اباي ەلىنىڭ سپورتشىلارى كورىندى. بۇعان دەيىنگى دودالاردا كوشتىڭ ورتا تۇسىندا نە سوڭىندا جۇرەتىن ابايلىقتار بيىل بارلىعىمىزدى دا تاڭداندىرا ءبىلدى. بۇل باسى عانا، الداعى سپارتاكيادالار بۇدان دا قىزىق وتەدى دەپ ويلايمىز، – دەگەن باسقارما باسشىسى كەلەسى سپورتتىق ويىنداردى سەمەي قالاسى وتكىزەتىنىن جەتكىزدى. ءقازىر اتالمىش شاھاردا وبلىس اكىمىنىڭ تاپسىرماسى بويىنشا سالىنىپ جاتقان ءبىرقاتار زاماناۋي سپورتتىق نىسان ەكى جىلدان كەيىن سپارتاكيادا سايىستارىن قابىلداۋعا ساقاداي ساي بولماق.

اسقار موجانوۆ، سونىمەن قاتار كەلەسى جىلعى «ساۋلەتاي» وبلىستىق بالالار سپارتاكياداسى دا ۇيىمداستىرىلۋى جاعىنان بۇعان دەيىنگى جارىستارعا قاراعاندا اناعۇرلىم جوعارى دەڭگەيگە وتەتىنىن ايتتى.

ال ەندى بيىلعى جارىستىڭ قورىتىندىلارىنا كەلەتىن بولساق، قالالار اراسىنداعى جالپىكوماندالىق ەسەپتە ءبىرىنشى ورىنعا وسكەمەن قالاسىنىڭ قۇراماسى (375 ۇپاي) يە بولسا، سەمەيلىك ساڭلاقتار ەكىنشى ورىندى ماسە تۇتۋعا ءماجبۇر بولدى. سەمەيلىكتەر جارىس جەڭىمپازدارىنان 36 ۇپايعا قالىپ قويدى. شاھارلار اراسىنداعى باسەكەنىڭ ۇزدىك ۇشتىگىن ريددەر قالاسىنىڭ كومانداسى تۇيىندەدى. كەنشىلەر قالاسىنىڭ قورجىنىندا 159 ۇپاي.

ال اۋداندار اراسىنداعى جارىستا تارباعاتاي سپورتشىلارىنا تەڭ كەلەر ەشكىم بولمادى. سپورتتىق ويىندار قورىتىندىسى بويىنشا 320 ۇپاي جيناعان تارباعاتايلىقتار ەكىنشى ورىن العان ۇلان اۋدانىنىڭ قۇراماسىنان (257 ۇپاي) ەداۋىر ۇزاپ كەتتى. ال ءۇشىنشى ورىنعا، جوعارىدا ايتىلعانداي اباي ەلىنىڭ ساڭلاقتارى يە بولدى. ولاردىڭ ەنشىسىندە 248،5 ۇپاي.

ەستەرىڭىزگە سالايىق، ەكى جىلدا ءبىر رەت وتەتىن حالىقتىق سپورت ويىندارى ءتورت كەزەڭنەن تۇرادى. ونىڭ بىرىنشىسىندە سپورتشىلار اۋىلدىق وكرۋگتەر اراسىندا ۇزدىكتى انىقتاسا، ودان كەيىن اۋداندىق، وبلىستىق جانە رەسپۋبليكالىق سايىستاردا كۇش سىنايدى. بيىلىعى دودانىڭ جەڭىمپازدارى دا الداعى ۋاقىتتا باتىس قازاقستان وبلىسىندا وتەتىن ەل پرەزيدەنتىنىڭ جۇلدەلەرى ساراپقا سالىناتىن حالىقتىق سپورت ويىندارىنىڭ رەسپۋبليكالىق كەزەڭىنە جولداما الىپ وتىر.