وسكەمەندە مەكتەپ وقۋشىلارىنىڭ اراسىندا حالىقارالىق «ياسساۋيتانۋ» ءبىلىم بايقاۋىنىڭ وبلىستىق كەزەڭى ءوتتى. ۇلى ويشىلدىڭ  30-35 حيكمەتىن ناقىشىنا كەلتىرە جاتقا ايتقان قاتىسۋشىلار بىرىنەن-بىرى اساتىن ونەرلەرىن ورتاعا سالدى.

«رۋحاني جاڭعىرۋ» باعدارلاماسىن ىسكە اسىرۋ اياسىندا وبلىستىق ءبىلىم باسقارماسىنىڭ قوسىمشا ءبىلىم بەرۋ جانە دەنەشىنىقتىرۋ ورتالىعى ۇيىمداستىرعان ءىس-شارادا ءوڭىرىمىزدىڭ ءار اۋدانىنان ىرىكتەلگەن 6-11-سىنىپتار ارالىعىنداعى 13 وقۋشى ب ا ق سىنادى.

-ەلباسىمىزدىڭ «رۋحاني جاڭعىرۋ» باعدارلامالىق ماقالاسىندا تۋعان جەرگە تاعزىم ەتۋ، ادەت-عۇرپىمىزدى ءبىلۋ دەگەن ۇلكەن ماسەلە قوزعالدى. ءاربىر ۇرپاق ەلىنىڭ پاتريوتى بولۋ ءۇشىن تۋعان جەرىنىڭ بەدەلدى تۇلعالارىمەن قاتار، ءار تاسىنىڭ تاريحىن بىلگەنى ءجون. ماڭىزدىسى – جاستارىمىز ياسساۋي حيكمەتتەرىن جاتتاپ قانا قويماي، ويلارىنا ءتۇيىپ، ودان تاربيە الىپ، دوس-جاراندارىنا ناسيحاتتاي جۇرسە ەكەن،-دەيدى «ورلەۋ» بىلىكتىلىكتى ارتتىرۋ ۇلتتىق ورتالىعىنىڭ فيليالى، وبلىستىق پەداگوگيكالىق قىزمەتكەرلەردىڭ بىلىكتىلىگىن ارتتىرۋ ينستيتۋتىنىڭ اعا وقىتۋشىسى باقىتبەك نۇعىمانوۆ.

بايقاۋدىڭ العاشقى كەزەڭىندە ساراپشىلار بارلىعى 149 حيكمەتتىڭ  30-34ء-ىن جاتتاپ كەلگەن قاتىسۋشىلاردىڭ ونەرىن تاماشالاپ، بايقاۋ ەرەجەسىنە سايكەس ءۇش رەت مۇدىرگەن بالا سايىستان شىعىپ وتىردى. اسىرەسە، زايساندىق ديلناز قايىربەك پەن ابايلىق ادىلەت ايتمۇحانبەتتىڭ ونەرىنە ءتانتى بولدىق. «پەيىش پەن توزاقتىڭ تالاسى»، «وپاسىز ءفاني»، «پارۋارديگار»، «ھۋ» القاسى» حيكمەتتەرىن بىرىنەن سوڭ ءبىرى ۇزبەي ءىلىپ اكەتىپ، جاتقا ايتىپ وتىردى. بۇل جەردە دارىندى جەتكىنشەكتەردى جاستايىنان قاسيەتتى ءسوز ونەرىنە باۋلىپ جۇرگەن ا.بالعىن، ج.قوناقايەۆا، ج.سادۋاقاسوۆا سىندى جەتەكشىلەردىڭ ەڭبەكتەرىن ايرىقشا اتاپ وتكەن ءجون.

ال ءبىلىم سايىسىنىڭ ەكىنشى شەشۋشى كەزەڭىندە قاتىسۋشىلار قوجا احمەت ءياسساۋيدىڭ ءومىرى مەن قىزمەتى، ءىلىمى مەن مۇراسى، حيكمەتتەرىنىڭ ءمان-ماعىناسى، عۇلامانىڭ شاكىرتتەرى مەن ءىزباسارلارى جايلى ساۋالدارعا جاۋاپ بەرۋى ءتيىس بولدى.

بايقاۋ قورىتىندىسى بويىنشا اباي اۋدانىنداعى اۋەزوۆ ورتا مەكتەبىنىڭ 10-سىنىپ وقۋشىسى ادىلەت ايتمۇحانبەت پەن اياگوز اۋدانىنداعى د.باباتاي ۇلى ورتا مەكتەبىنىڭ 8-سىنىپ وقۋشىسى امانبول تۇرسىنعالييەۆ جۇلدەلى ەكىنشى ورىن السا، كاتونقاراعاي اۋدانى رىكوۆ اتىنداعى ورتا مەكتەپتىڭ 10-سىنىپ وقۋشىسى مەرۋەرت قادىلحانوۆا، وسى مەكتەپتىڭ  8-سىنىپ وقۋشىسى ايىم ءادىلحان، ۇلان اۋدانى بوزانباي ورتا مەكتەبىنىڭ 10-سىنىپ وقۋشىسى كۇنشۋاق ەستاي ءۇشىنشى ورىنعا يە بولدى.

ال زايسان اۋدانى اباي ورتا مەكتەبىنىڭ 8-سىنىپ وقۋشىسى ديلناز قايىربەك ساراپشىلاردىڭ شەشىمىمەن حالىقارالىق «ياسساۋيتانۋ» ءبىلىم بايقاۋىنىڭ وبلىستىق كەزەڭىنىڭ جەڭىمپازى اتاندى. الداعى قىركۇيەك ايىندا رەسپۋبليكالىق كەزەڭدە وبلىس نامىسىن قورعايتىن ديلنازعا ساتتىلىك سەرىك بولسىن دەيمىز.