قالباتاۋ اۋلىندا وليمپيادا ويىندارىنىڭ كۇمىس جانە قولا جۇلدەگەرى، الەم چەمپيونى، قسرو مەن قر-نىڭ ەڭبەك سىڭىرگەن سپورت شەبەرى داۋلەت تۇرلىحانوۆتىڭ جۇلدەسىنە ارنالعان، گرەك-ريم كۇرەسىنەن جاسوسپىرىمدەر اراسىندا اشىق وبلىستىق ءتۋرنيردىڭ جالاۋى جەلبىرەدى. سايىسقا وسكەمەن، سەمەي قالالارى، جارما، اياگوز جانە ءۇرجار اۋداندارىنان بولەك، الماتى وبلىسى، شىمكەنت، پاۆلودار ءارى الماتى شاھارىنان 200-دەن اسا جاس سپورتشى جينالدى.
-بۇل ءتۋرنيردىڭ باستى ماقساتى – جاسوسپىرىمدەردى سپورتقا باۋلۋ، ەكىنشىدەن گرەك-ريم كۇرەسىن ناسيحاتتاۋ ءارى دامىتۋ. ۇيىمداستىرۋ كوميتەتىنە العىسىمدى ايتامىن. بۇل جاستاعى پالۋاندارعا مۇنداي جارىستار كوبىرەك قاجەت. سەبەبى وسى جەردە ءار ايماقتان كەلگەن بالالار، يىق تىرەسىپ، تاجىريبە جيناقتايدى. سايىس وتە تارتىستى. شىنىمدى ايتسام، ءوزىم قىزىعىپ وتىرمىن. ويتكەنى ەرەسەكتەرگە قاراعاندا، بالالار ءتۇرلى ءادىس-ايلالاردى جاساۋعا تايسالمايدى. بۇگىنگى جارىس سونىسىمەن تارتىمدى، — دەگەن ويىمەن ءبولىستى ازيا كۇرەس قاۋىمداستىعىنىڭ پرەزيدەنتى، داڭقتى جەرلەسىمىز داۋلەت تۇرلىحانوۆ.
بوز كىلەمدەگى بەلدەسۋلەرگە كەلەر بولساق، جاس ورەندەر 10 سالماقتا ءوزارا مىقتىنى انىقتادى. وسى 10 سالماقتىڭ 8-دە شىعىسقازاقستاندىق جاسوسپىرىمدەرگە تەڭ كەلەر قارسىلاس تابىلعان جوق. سونىڭ اراسىنان 5 سالماق دارەجەسىندە جارمالىق بالعىندار التىننان القا تاعىندى. ناقتىراق ايتقاندا، 26 كەلىدە نۇرجان ءاشىمجانوۆ، 36 كەلىدە ەرنۇر ەلتاي، 39 كەلىدە ەردوس جۇماعۇلوۆ، 46 كەلىدە دياس قاجىمۇرات جانە 58-دەن جوعارى سالماقتا ۆلاديسلاۆ ديكتەريەۆ جەڭىس تۇعىرىنا كوتەرىلدى. وسىدان-اق جارمالىقتاردىڭ كلاسسيكالىق كۇرەستى قانداي دەڭگەيدە مەڭگەرگەندىگىن اڭعارۋعا بولادى. سونىمەن قاتار، اياگوزدىك دياس سەيىتقالي جانە ايبەك ايتكاريموۆپەن قاتار سەمەيلىك ەرقانات مۇقيات جەڭىمپاز اتاندى. بارلىق جەڭىمپازدار جانە جۇلدەگەرلەرگە، سونداي-اق جاتتىقتىرۋشىلارعا اقشالاي سىياقى تابىس ەتىلدى.
* جارىستارعا قاتىسقاندى ۇناتامىن. بۇگىنگى بەلدەسۋلەر وزىمە اسا قيىن بولمادى. دەسە دە جارتىلاي سىندا ءوز جەرلەسىممەن كەزدەستىم. سول كەزدەسۋ كۇردەلىرەك بولدى. وسكەندە داۋلەت تۇرلىحانوۆ جانە ايبەك نۇعىماروۆ سەكىلدى الەم چەمپيونى بولعىم كەلەدى، — دەيدى تۋرنير جەڭىمپازدارىنىڭ ءبىرى، جارمالىق نۇرجان ءاشىمجانوۆ.
