وتكەن جىلى «QAZAQSTAN» ۇلتتىق تەلەارناسىندا وتكەن «MEN QAZAQPYN» حالىقارالىق مەگاجوباسى ەكىشى مارتە جۇمىسىن باستاعالى جاتىر. «رۋحاني جاڭعىرۋ» باعدارلاماسى اياسىندا قولعا الىنعان بۇل جوبانىڭ ىرىكتەۋ جۇمىستارى جايلى وبلىستىق «ALTAI» تەلەارناسىنىڭ ديرەكتورى ايدا جاباعييەۆا مەن ديرەكتوردىڭ ورىنباسارى، باس رەداكتور ايدوس جۇقان ۇلى باسپا ءسوز ءماسليحاتىن وتكىزدى.
– ءبىز ىرىكتەۋىمىزدى مامىر ايىنىڭ 28 كۇنى ءۇرجار اۋدانىنان باستاعالى وتىرمىز. بيىلعى بايقاۋدىڭ باستى ەرەكشەلىگى ءار اۋداننان ىرىكتەلگەن ونەرپازداردى وبلىس ورتالىعىنا اكەلىپ جەڭىمپازداردى انىقتايمىز. ءار جانردىڭ جەڭىمپازى رەسپۋبليكالىق كەزەڭگە جولداما الادى، – دەدى تەلەارنا ديرەكتورى ايدا جاباعييەۆا.
سايىس ءداستۇرلى ءان، تەرمە ايتۋ، كۇي شەرتۋ سىندى ءۇش اتالىم بويىنشا وتەدى. ال قازىلار القاسىنا وبلىستىق ىشكى ساياسات باسقارماسىنان، مادەنيەت باسقارماسىنان، «ALTAI» تەلەارناسىنىڭ وكىلى جانە جەرگىلىكتى جەردەن بەلگىلى ءبىر ونەر يەسى تاعايىندالادى دەپ كۇتىلۋدە.
– تەلەارنا ديرەكتورى، ءيا بولماسا ءوزىم قازىلاردىڭ قاتارىندا مىندەتتى تۇردە بولامىز. مۇمكىندىگىمىزشە تامىر-تانىستىققا، جەرشىلدىك پەن رۋشىلدىققا جول بەرمەۋ ءۇشىن وسىلاي شەشتىك، — دەيدى ديرەكتوردىڭ ورىنباسارى ايدوس جۇقان ۇلى.
سايىسقا قاتىسقىسى كەلەتىندەردەن ەشقانداي مۋزىكالىق ءبىلىمىن انىقتايتىن قۇجاتتاردى تالاپ ەتپەيدى. سونداي-اق، ۇلتتىق كيىمى مەن ءار ءوڭىردىڭ ءداستۇرلى ءان مەكتەبىنىڭ بولماسا كۇي قاعىسىنىڭ مەكتەبىن ساقتاعان ونەرپازداردىڭ ەڭبەگى باعالاناتىن كورىنەدى.
وقىرماندارىمىزعا پايداسى ءتيسىن دەگەن نيەتپەن ءار اۋداندا ىرىكتەۋ وتەتىن كۇندەردى كورسەتە كەتەيىك.
28 مامىر ءۇرجار، 29 مامىر اياگوز، 4 ماۋسىم زايسان، 5 ماۋسىم تارباعاتاي، 6 ماۋسىم كوكپەكتى، 11 ماۋسىم ۇلان، 18 ماۋسىم كاتونقاراعاي، 19 ماۋسىم كۇرشىم اۋداندارىندا وتەدى. ال 30 ماۋسىم كۇنى وسكەمەن قالاسىندا وبلىستىق بايقاۋ ءوتىپ، رەسپۋبليكاعا باراتىن جەڭىمپازدار انىقتالادى.
ءار اۋداننان سۋىرىلىپ شىققان ونەرپازداردىڭ وبلىستىق بايقاۋىن «ALTAI» تەلەارناسى ارنايى ءتۇسىرىپ، جەڭىمپازداردىڭ جۇلدىزىنىڭ جارقىراۋىنا مۇمكىندىك بەرەدى. وتكەن جىلى بۇل بايقاۋعا مونعوليا، رەسەي، جۇڭگو سىندى كورشى ەلدەردەگى قاراكوزدەر دە كەلىپ قاتىسىپ، باعىن سىناعان ەدى. بيىل بۇل ماسەلەنى ۇلتتىق ارناداعى ۇيىمداستىرۋشىلار اقىلداسىپ جاتقانىن ايتتى باسپا ءسوز ءماجىلىسىن وتكىزۋشىلەر.
