كەشە «وتباسى كۇنى» مەرەكەسىنە وراي ەلىمىزدەگى نازاربايەۆ زياتكەرلىك مەكتەپتەرىندە جالپىۇلتتىق اتا-انالار جينالىسى ءوتتى.
وسىعان بايلانىستى سەمەي قالاسىنداعى فيزيكا-ماتەماتيكا باعىتىنداعى نازاربايەۆ زياتكەرلىك مەكتەبىندە «رۋحاني جاڭعىرۋ» قوعامدىق سانانى جاڭعىرتۋ باعدارلاماسىن ىسكە اسىرۋ اياسىندا «ءبىلىمدى ۇلت – ساپالى وقىتۋ جانە وتباسىلىق قۇندىلىقتار» تاقىرىبىندا اتا-انالار كەڭەسىنىڭ مۇشەلەرى باس قوستى. جيىنى 38 ادام قاتىسقان جينالىستا بىرنەشە ماسەلە كۇن تارتىبىنە قويىلدى. ماسەلەن، مەكتەپ ديرەكتورى باعدان قايىرجانوۆ «رۋحاني جاڭعىرۋ» باعدارلاماسىنىڭ جۇزەگە اسىرىلۋى — ءبىلىم بەرۋدىڭ نەگىزى»، ديرەكتوردىڭ وقۋ ءىسى جونىندەگى ورىنباسارى گۇلنار قايىرحانوۆا «وقۋ جىلىنىڭ قورىتىندىسى، وقۋشىلاردىڭ ءبىلىم ساپاسى»،ال سەمەي قالالىق تىلدەردى وقىتۋ ورتالىعىنىڭ ديرەكتورى زاۋرەش رامازانوۆا بولسا قامقورشىلار كەڭەسىنىڭ جۇمىسى جايلى جينالعانداردى كەڭىرەك اقپاراتتاندىردى. بۇدان بولەك، وقۋ ءۇردىسىن سيفرلاۋ جايلى اعا ينجەنەر ايبەك كەرىمبايەۆ، وقۋلىقتاردى ازىرلەۋ تۋرالى ينفورماتيكا ءپانىنىڭ ءمۇعالىمى زويا جۋربەنكو جان-جاقتى ماعلۇمات بەرىپ، كەلەلى ويلارىن ورتاعا سالدى.
باسقوسۋدا ءسوز العان مەكتەپ باسشىسى ءبىلىم الۋشى ءاربىر وقۋشىنىڭ ءوز ەلىنە، جەرىنە جانى اشيتىن، ەلجاندى ازامات بولىپ وسۋىنە مەكتەپ پەن اتا-انالاردىڭ بىرلەسە اتسالىسۋعا شاقىرسا، ديرەكتوردىڭ تاربيە ءىسى جونىندەگى ورىنباسارى لاريسا ابىلقاسىموۆا سىنىپ ساعاتتارى، «شاڭىراق» ساعاتتارى، الەۋمەتتىك جوبالار ارقىلى وقۋشى بويىنا ءبىلىم مەن تاربيەنىڭ نەگىزى قاتار ءسىڭىرىلىپ جاتقانىن جەتكىزدى.
قامقورشىلىق كەڭەستە ءوز تاراپىنان اتقارىلۋعا ءتيىستى ىستەردىڭ ەڭسەرىلىپ جاتقانىن جينالىسقا كەلگەن اتا-انالار ەستىپ ءبىلدى. جينالىس سوڭىندا ۇرپاق تاربيەسى جولىنداعى وڭتايلى ۇسىنىستار مەن ورامدى ويلار ايتىلىپ، الداعى ۋاقىتتا وسى باعىتتا بىرلەسە جۇمىس اتقارۋ جوسپارلاندى.
